ಹೈದರಾಬಾದ್: ಸೌಥ್ ಸಿನಿ ಇಂಡಸ್ಟ್ರಿಯ ಪ್ರಸಿದ್ಧ ಜೋಡಿಗಳಾದ ಅನುಷ್ಕಾ ಶೆಟ್ಟಿ ಹಾಗೂ ಪ್ರಭಾಸ್ ಯಾವಾಗಲು ಒಂದಲ್ಲಾ ಒಂದು ವಿಷಯಕ್ಕೆ ಸುದ್ದಿಯಾಗುತ್ತಿರುತ್ತಾರೆ. ಸದ್ಯ ಇಬ್ಬರ ನಡುವಿನ ಹೊಸ ಸಮಾಚಾರವೊಂದು ಟಾಲಿವುಡ್ ವಲಯದಿಂದ ಕೇಳಿ ಬಂದಿದೆ.
38ನೇ ಜನ್ಮದಿನದ ಅಂಗವಾಗಿ ಅನುಷ್ಕಾ ಶೆಟ್ಟಿ ಪ್ರಭಾಸ್ ಗೆ ಡಿಸೈನರ್ ವಾಚನ್ನು ವಿಶೇಷವಾದ ಉಡುಗರೆಯನ್ನಾಗಿ ನೀಡಿದ್ದಾರೆ ಎನ್ನುವ ಸುದ್ದಿ ಸಿಕ್ಕಿದೆ. ಮೂಲಗಳ ಪ್ರಕಾರ, ಪ್ರಭಾಸ್ಗೆ ಡಿಸೈನರ್ ವಾಚ್ ಇಷ್ಟವಂತೆ. ಹೀಗಾಗಿ ಅನುಷ್ಕಾ ಪ್ರಭಾಸ್ಗೆ ವಾಚನ್ನೇ ಗಿಫ್ಟ್ ನೀಡಿದ್ದಾರೆ ಎಂಬ ಸುದ್ದಿ ಹರಿದಾಡುತ್ತಿದೆ. ಈ ಬಗ್ಗೆ ಟಾಲಿವುಡ್ನಲ್ಲಿ ಈಗ ವಿಶೇಷ ಚರ್ಚೆ ಶುರುವಾಗಿದ್ದು, ಈ ಜೋಡಿ ಏನೇ ಮಾಡಿದರೂ ಇವರ ಮೇಲೆ ಒಂದು ಕಣ್ಣುಟ್ಟಿರುವ ಗಾಸಿಪ್ ಪಂಡಿತರ ಬಾಯಿಗೆ ಅಗೆಯೋದಕ್ಕೆ ಹೊಸ ತಂಬೂಲ ಸಿಕ್ಕಂತ್ತಾಗಿದೆ.
ಈ ಹಿಂದೆ ಪ್ರಭಾಸ್-ಅನುಷ್ಕಾ ಮಧ್ಯೆ ರಿಯಲ್ ಲವ್ ಇದೆ ಎಂಬ ಮಾತುಗಳು ಕೇಳಿ ಬಂದಿದ್ದವು. ಇಬ್ಬರೂ ಮದುವೆ ಆಗಲಿದ್ದಾರೆ ಎಂಬ ಸುದ್ದಿ ಜೋರಾಗಿ ಹಬ್ಬಿತ್ತು. ಇಂತಹ ಗಾಸಿಪ್ಗಳನ್ನು ಪ್ರಭಾಸ್ ನೇರವಾಗಿ ತಳ್ಳಿ ಹಾಕಿದ್ದರು.
ಹುಟ್ಟುಹಬ್ಬದ ಸಂಭ್ರಮದಲ್ಲಿ ಪ್ರಭಾಸ್ ರ ಮುಂದಿನ ಚಿತ್ರವಾದ `ಸಾಹೋ’ ಚಿತ್ರ ತಂಡವು ಅಭಿಮಾನಿಗಳಿಗೆ ಭರ್ಜರಿ ಗಿಫ್ಟ್ ನೀಡಿದೆ. ‘ಸಾಹೋ’ ಫಸ್ಟ್ ಲುಕ್ ಇಂದು ರಿಲೀಸ್ ಆಗಿದೆ. ಬಿಡುಗಡೆಯಾಗಿರುವ ಫಸ್ಟ್ ಲುಕ್ನಲ್ಲಿ ಪ್ರಭಾಸ್ ಬ್ಲ್ಯಾಕ್ ಕೋಟ್ನಲ್ಲಿ ಸ್ಟೈಲಿಶ್ ಆಗಿ ಫೋನ್ನಲ್ಲಿ ಮಾತನಾಡುತ್ತಾ ಬರುತ್ತಿದ್ದಾರೆ. ಪೋಸ್ಟರ್ನಲ್ಲಿ ಪ್ರಭಾಸ್ ಕಣ್ಣುಗಳೇ ಹೈಲೈಟ್ ಆಗಿದ್ದು, ಚಿತ್ರದ ಬಗ್ಗೆ ಮತ್ತಷ್ಟು ಕುತೂಹಲ ಮೂಡಿಸಿದೆ.
ಸುಜಿತ್ ನಿರ್ದೇಶನದಲ್ಲಿ ಸಾಹೋ ಚಿತ್ರ ಮೂಡಿಬರುತ್ತಿದ್ದು, ಪ್ರಭಾಸ್ಗೆ ನಾಯಕಿಯಾಗಿ ಬಾಲಿವುಡ್ ಬೆಡಗಿ ಶ್ರದ್ಧಾ ಕಪೂರ್ ಅಭಿನಯಿಸುತ್ತಿದ್ದಾರೆ.
