Asian Games 2026 | ಭಾರತಕ್ಕೆ ಮತ್ತೊಂದು ಪದಕ – ಬೆಳ್ಳಿಗೆ ಇಶಾ ಶೂಟ್‌

ನಗೋಯಾ: ಏಷ್ಯನ್‌ ಗೇಮ್ಸ್‌ನಲ್ಲಿ ಭಾರತದ ಪದಕ ಬೇಟೆ ಮುಂದುವರಿದಿದೆ. ಭಾರತೀಯ ಮಹಿಳಾ ಶೂಟರ್‌ (Indian Women Shooter) ಇಂದು ಬೆಳ್ಳಿ ಪದಕ ಗೆಲ್ಲುವ ಮೂಲಕ ಭಾರತದ ಒಟ್ಟು ಪದಕಗಳ ಸಂಖ್ಯೆ 38ಕ್ಕೆ ಏರಿಸಿದ್ದಾರೆ.

ಹೌದು. ಸೋಮವಾರ (ಸೆಪ್ಟೆಂಬರ್ 28) ನಡೆದ ಮಹಿಳೆಯರ 25 ಮೀಟರ್ ಪಿಸ್ತೂಲ್ ವಿಭಾಗದಲ್ಲಿ ಭಾರತದ ಶೂಟರ್ ಇಶಾ ಸಿಂಗ್ (Esha Singh) ಬೆಳ್ಳಿ ಪದಕ ಗೆದ್ದುಕೊಂಡಿದ್ದಾರೆ. ಸತತ 5 ‘ಶೂಟ್-ಆಫ್’ (ನಿರ್ಣಾಯಕ ಸುತ್ತು) ಹಂತಗಳನ್ನ ಎದುರಿಸಿದ ಇಶಾ, ಬೆಳ್ಳಿ ಪದಕ ಗೆದ್ದುಕೊಂಡರು.

ಹೈದರಾಬಾದ್ ಮೂಲದ 21 ವರ್ಷದ ಶೂಟರ್ ಇಶಾ, ಅರ್ಹತಾ ಸುತ್ತಿನಲ್ಲಿ 580 ಅಂಕಗಳು ಮತ್ತು 22 ‘X’ ಗಳೊಂದಿಗೆ 8ನೇ ಸ್ಥಾನ ಪಡೆಯುವ ಮೂಲಕ ಫೈನಲ್‌ಗೆ ಪ್ರವೇಶಿಸಿದ್ದರು. ಫೈನಲ್‌ನಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡುವ ಮೂಲಕ ಚಿನ್ನದ ಪದಕವನ್ನೇ ಗೆಲ್ಲುವ ಭರವಸೆ ಮೂಡಿಸಿದ್ದರು. ದುರದೃಷ್ಟವಶಾತ್‌ ಕೇವಲ ಒಂದು ಶಾಟ್‌ ಅಂತರದಿಂದ ಚಿನ್ನದ ಪದಕ ಕೈತಪ್ಪಿತು.

ಪ್ರಸ್ತುತ ವಿಶ್ವದ ನಂ.1 ಶೂಟರ್ ಆಗಿರುವ ಇಶಾ, ಬೆಳ್ಳಿ ಪದಕಕ್ಕಾಗಿ (Silver Medal) ನಡೆದ ಪೈಪೋಟಿಯಲ್ಲಿ 3 ನಿರ್ಣಾಯಕ ಸುತ್ತುಗಳಲ್ಲಿ ಗೆಲುವು ಸಾಧಿಸಿದ್ದರು. ನಿಗದಿತ ಸುತ್ತುಗಳ ಅಂತ್ಯಕ್ಕೆ ಇಬ್ಬರೂ ತಲಾ 38 ಅಂಕಗಳನ್ನ ಹೊಂದಿದ್ದರು, ಆದರೆ ಅಂತಿಮ ಶಾಟ್‌ನಲ್ಲಿ ಇಶಾ ಹಿನ್ನಡೆ ಅನುಭವಿಸಿ 2ನೇ ಸ್ಥಾನಕ್ಕೆ ತೃಪ್ತಿಪಡಬೇಕಾಯಿತು.

ಇಶಾ ಅವರನ್ನು ಮಣಿಸಿದ ಚೀನಾದ ಶಿಯಾವೊ ಜಿಯಾರುಯಿಶುವಾನ್ ಚಿನ್ನದ ಪದಕ ತಮ್ಮದಾಗಿಸಿಕೊಂಡರು. ಉತ್ತರ ಕೊರಿಯಾದ ಕಿಮ್ ಹ್ಯೋನ್ ಸುಕ್, 34 ಅಂಕಗಳೊಂದಿಗೆ ಕಂಚಿನ ಪದಕ ಪಡೆದರು.

ಭಾರತ, ಇಶಾ ಸಿಂಗ್‌, ಶೂಟರ್‌, ಕಂಚಿನ ಪದಕ, ಏಷ್ಯನ್‌ ಗೇಮ್ಸ್‌, Shooter, Esha Singh, Silver Medal, India, Asian Games 2026