ರಿತೇಶ್ ದೇಶ್ಮುಖ್ (Riteish Deshmukh) ದ್ವಿಪಾತ್ರದಲ್ಲಿ ನಟಿಸುವುದರ ಜೊತೆಗೆ ನಿರ್ದೇಶನ ಮಾಡುತ್ತಿರುವ ಸಿನಿಮಾ `ರಾಜಾ ಶಿವಾಜಿ’ (Raja Shivaji). ಈ ಸಿನಿಮಾದಲ್ಲಿ ಸಂಜಯ್ ದತ್, ಅಭಿಷೇಕ್ ಬಚ್ಚನ್, ಮಹೇಶ್ ಮಂಜ್ರೇಕರ್, ಸಚಿನ್ ಖೇಡೇಕರ್, ಭಾಗ್ಯಶ್ರೀ, ಫರ್ದೀನ್ ಖಾನ್, ಜಿತೇಂದ್ರ ಜೋಶಿ, ಅಮೋಲ್ ಗುಪ್ತೆ ಮತ್ತು ಜೆನೆಲಿಯಾ ದೇಶ್ಮುಖ್ ಸೇರಿದಂತೆ ಅತಿದೊಡ್ಡ ತಾರಾಗಣವಿದೆ. ಈ ತಂಡಕ್ಕೆ ಈಗ ಹೊಸದಾಗಿ ನಟಿ ವಿದ್ಯಾ ಬಾಲನ್ ಸೇರಿಕೊಂಡಿದ್ದಾರೆ.
ಅಂದಹಾಗೆ ವಿದ್ಯಾ ಬಾಲನ್ (Vidya Balan) ಈ ಸಿನಿಮಾದ ಮುಖ್ಯಪಾತ್ರದಲ್ಲಿ ನಟಿಸಲಿದ್ದು, ಆ ಪಾತ್ರದಲ್ಲಿ ನಟಿಸಲು ವಿದ್ಯಾ ಬಾಲನ್ ಕೂಡಾ ತುಂಬಾ ಕೌತುಕದಿಂದ ಕಾಯುತ್ತಿದ್ದಾರಂತೆ. ಭಾರತೀಯ ಇತಿಹಾಸದಲ್ಲಿ ವೀರಗಾಥೆಯ ಸಿನಿಮಾ ಇದಾಗಲಿದ್ದು, ಈ ಸಿನಿಮಾದ ಪಾತ್ರವರ್ಗ ದಿನದಿಂದ ದಿನಕ್ಕೆ ದೊಡ್ಡದಾಗುತ್ತಾ ಹೋಗುತ್ತಿದೆ. ಇನ್ನು ಈ ಸಿನಿಮಾದ ಪಾತ್ರಕ್ಕೆ ವಿದ್ಯಾ ಬಾಲನ್ ಲುಕ್‌ಟೆಸ್ಟ್ ಮಾಡಿಸಿದ್ದಾರಂತೆ.
ಛತ್ರಪತಿ ಶಿವಾಜಿಯವರ ಕುರಿತಾಗಿ ಈಗಾಗಲೇ ಸಾಕಷ್ಟು ಸಿನಿಮಾಗಳು ಬಂದಿವೆ. ಈ ಸಿನಿಮಾ ಕೆಲವೊಂದಿಷ್ಟು ವಿಶೇಷ ಎಲಿಮೆಂಟ್ಸ್‌ನಿಂದ ವಿಭಿನ್ನ ಹಾಗೂ ವಿಶಿಷ್ಟವಾಗಿರಲಿದೆಯಂತೆ. ಮರಾಠಿಯಲ್ಲಿ ಶೂಟಿಂಗ್ ಮಾಡಿ ತದನಂತರ ಪ್ಯಾನ್ ಇಂಡಿಯನ್ ಕಾನ್ಸೆಪ್ಟ್‌ನಲ್ಲಿ ಸಿನಿಮಾವನ್ನ ಭಾರತೀಯ ಎಲ್ಲ ಭಾಷೆಯಲ್ಲೂ ತೆರೆಗೆ ತರುವ ಪ್ರಯತ್ನ ನಡೆಯುತ್ತಿದೆ.
ರಾಜಾ ಶಿವಾಜಿ ಸಿನಿಮಾ 2026ರ ಮೇ 1ರಂದು ತೆರೆಗೆ ಬರಲಿದ್ದು, ಸಕಲ ಸಿದ್ಧತೆಯಲ್ಲಿ ಚಿತ್ರತಂಡ ತೊಡಗಿಕೊಂಡಿದೆ. ಈ ಸಿನಿಮಾ ಮುಖ್ಯಪಾತ್ರದಲ್ಲಿ ಬಣ್ಣಹಚ್ಚಲು ವಿದ್ಯಾ ಬಾಲನ್ ಕೂಡಾ ತಯಾರಾಗಿದ್ದಾರೆ.
