ಬೆಂಗಳೂರು: ಮಕ್ಕಳ ನೃತ್ಯ ಪ್ರದರ್ಶನಕ್ಕೆ (Dace Show) 40 ರಿಂದ 60 ಸಾವಿರ ರೂ. ಪಡೆದು ಕೊನೆಗೆ ನೃತ್ಯ ಪ್ರದರ್ಶನಕ್ಕೆ ಅವಕಾಶ ನೀಡದ್ದಕ್ಕೆ ಪೋಷಕರು ಆಯೋಜಕಿಯನ್ನು ತರಾಟೆಗೆ ತೆಗೆದುಕೊಂಡ ಘಟನೆ ಟೌನ್ಹಾಲ್ನಲ್ಲಿ (Town Hall) ನಡೆದಿದೆ.
ನಗರದ ಟೌನ್ಹಾಲ್ನಲ್ಲಿ ನೃತ್ಯಾಂಗನ ಕಾರ್ಯಕ್ರಮ ಆಯೋಜನೆಗೊಂಡಿತ್ತು. ಹೀನಾ ಜೈನ್ ಎಂಬವರು ಆಯೋಜಿಸಿದ್ದ ಕಾರ್ಯಕ್ರಮಕ್ಕೆ ಖ್ಯಾತ ಚಲನಚಿತ್ರ ನಟಿ ಜಯಪ್ರದಾ (Jaya Prada) ಅವರು ಮುಖ್ಯ ಅತಿಥಿಯಾಗಿ ಆಗಮಿಸಿದ್ದರು.
ಸಮಯದ ಅಭಾವ ಹಾಗೂ ಬಿಸಿನೆಸ್ ಅವಾರ್ಡ್ ನೆಪದಲ್ಲಿ ಡ್ಯಾನ್ಸ್ ಗ್ರೂಪ್ಗಳಿಗೆ ಆಯೋಜಕರು ಅವಕಾಶ ನೀಡಿರಲಿಲ್ಲ. ಮಕ್ಕಳ ನೃತ್ಯ ಪ್ರದರ್ಶನಕ್ಕೆ ಸಿಟ್ಟಾದ ಪೋಷಕರು ಆಯೋಜಕಿಯನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ. ಇದನ್ನೂ ಓದಿ: ಒಂದೇ ತಿಂಗಳಲ್ಲಿ ಹೃದಯಾಘಾತಕ್ಕೆ 13 ಬಲಿ – ಕೋವಿಡ್ ಲಸಿಕೆ ಕಾರಣವಲ್ಲ ತನಿಖೆಯಲ್ಲಿ ಬಯಲು
ಸುಮಾರು 100ಕ್ಕೂ ಹೆಚ್ಚು ನೃತ್ಯ ತಂಡಗಳು ಆಗಮಿಸಿವೆ. 3-4 ನಿಮಿಷದ ನೃತ್ಯಕ್ಕೆ ಒಬ್ಬ ವಿದ್ಯಾರ್ಥಿಯಿಂದ 2-3 ಸಾವಿರ ರೂ. ಪಡೆಯಲಾಗಿದೆ. ಒಂದೊಂದು ತಂಡದಿಂದ 40 ರಿಂದ 60 ಸಾವಿರ ರೂ. ಹಣವನ್ನು ಪಡೆದಿದ್ದಾರೆ. ಬೆಳಗ್ಗೆ 6 ಗಂಟೆಯಿಂದ ರಾತ್ರಿ 12 ಗಂಟೆಯವರೆಗೆ ಕಾದಿದ್ದೆವು. ಆದರೆ ನಮ್ಮ ಮಕ್ಕಳ ನೃತ್ಯಕ್ಕೆ ಅವಕಾಶ ನೀಡಲಿಲ್ಲ. ಹೀಗಾಗಿ ನಾವು ಪಾವತಿಸಿದ್ದ ಹಣವನ್ನು ವಾಪಸ್ ನೀಡಬೇಕೆಂದು ಪೋಷಕರು ಆಗ್ರಹಿಸಿದ್ದಾರೆ.
ಪೋಷಕರ ಆರೋಪಕ್ಕೆ ಅಯೋಜಕಿ ಹೀನಾ ಜೈನ್ ಪ್ರತಿಕ್ರಿಯಿಸಿ, ನಾವು ಯಾರಿಗೂ ಮೋಸ ಮಾಡಿಲ್ಲ, ಸಮಯದ ಅಭಾವವಿತ್ತು. ಜಯಪ್ರದಾ ಅವರು ಕಾರ್ಯಕ್ರಮಕ್ಕೆ ಸ್ವಲ್ಪ ತಡವಾಗಿ ಬಂದಿದ್ದರಿಂದ ಎಲ್ಲರಿಗೂ ಅವಕಾಶ ನೀಡಲು ಸಾಧ್ಯವಾಗಿಲ್ಲ. ಸುಮಾರು 110 ಡ್ಯಾನ್ಸ್ ತಂಡಗಳು ಹೆಸರು ಕೊಟ್ಟಿದ್ದರಿಂದ ಎಲ್ಲರಿಗೂ ಅವಕಾಶ ಸಿಗಲಿಲ್ಲ. ಕಾರ್ಯಕ್ರಮದಲ್ಲಿ ಸ್ವಲ್ಪ ವ್ಯತ್ಯಾಸಗಳು ಆಗಿವೆ. ಪೂರ್ತಿ ಹಣವನ್ನು ವಾಪಸ್ ನೀಡಲು ಸಾಧ್ಯವಿಲ್ಲ. 1 ತಿಂಗಳ ಸಮಯಾವಕಾಶ ನೀಡಿದರೆ ಸ್ವಲ್ಪ ಹಣ ಹಣ ವಾಪಸ್ ಮಾಡಲಾಗುವುದು ಎಂದು ತಿಳಿಸಿದರು.
