ನವದೆಹಲಿ: ಸುಪ್ರೀಂ ಕೋರ್ಟ್ ಆದೇಶದಂತೆ ಇಂದಿನಿಂದ ಹೆದ್ದಾರಿಗಳಲ್ಲಿ ಮದ್ಯ ಮಾರಾಟ ನಿಷೇಧವಾಗಲಿದೆ. ಬಾರ್ಗಳಷ್ಟೇ ಅಲ್ಲದೆ ಹೆದ್ದಾರಿಗಳಲ್ಲಿರುವ ಪಬ್, ಹೋಟೆಲ್ ಮತ್ತು ರೆಸ್ಟೊರೆಂಟ್ಗಳಲ್ಲೂ ಕೂಡ ಮದ್ಯವನ್ನು ಮಾರುವಂತಿಲ್ಲ ಎಂದು ಸುಪ್ರೀಂ ಕೋರ್ಟ್ ಸ್ಪಷ್ಟಪಡಿಸಿದೆ.
ದೇಶದಲ್ಲಿ ಸಾಕಷ್ಟು ಅಪಘಾತಗಳಿಗೆ ಕುಡಿದು ವಾಹನ ಚಾಲನೆ ಮಾಡುವುದೇ ಕಾರಣವಾಗಿದ್ದು, ಈ ಆದೇಶದಲ್ಲಿ ಯಾವುದೇ ಬದಲಾವಣೆ ಇಲ್ಲ ಎಂದು ನ್ಯಾ. ಜೆಎಸ್ ಕೆಹೆರ್ ನೇತೃತ್ವದ ಪೀಠ ಹೇಳಿದೆ. ಈ ಆದೇಶದಿಂದಾಗಿ ರಾಷ್ಟ್ರೀಯ ಹೆದ್ದರಿಗಳಿಂದ 500 ಮೀಟರ್ ಒಳಗಿರುವ ಪಂಚ ತಾರಾ ಹೋಟೆಲ್ಗಳು ಹಾಗೂ ಪಬ್ಗಳು ಮದ್ಯ ಮಾರಾಟವನ್ನು ನಿಷೇಧಿಸಬೇಕಿದೆ ಅಥವಾ ಸಂಪೂರ್ಣವಾಗಿ ಬಂದ್ ಆಗಬೇಕಿದೆ.
ಆದರೂ ಶುಕ್ರವಾರದಂದು ಸುಪ್ರೀಂ ಕೋರ್ಟ್ ಈ ಆದೇಶದಲ್ಲಿ ಸಣ್ಣ ಮಾರ್ಪಾಡು ಮಾಡಿದ್ದು, ರಾಜ್ಯ ಮತ್ತು ರಾಷ್ಟ್ರೀಯ ಹೆದ್ದಾರಿಗಳ 500 ಮೀಟರ್ ಅಂತರವನ್ನು 20 ಸಾವಿರದವರೆಗೆ ಜನಸಂಖ್ಯೆ ಇರುವ ಪ್ರದೇಶಗಳಲ್ಲಿ 220 ಮೀಟರ್ಗೆ ಇಳಿಸಿದೆ. 20 ಸಾವಿರಕ್ಕಿಂತಲೂ ಕಡಿಮೆ ಜನಸಂಖ್ಯೆ ಇರುವ ಸಣ್ಣ ನಗರಗಳಲ್ಲಿ ಮದ್ಯ ಮಾರಾಟಕ್ಕೆ ಅವಕಾಶ ನೀಡಲಾಗಿದೆ. ಆದ್ರೂ ಈ ಅಂಗಡಿಗಳು ರಸ್ತೆಯಿಂದ ಕಣ್ಣಿಗೆ ಕಣುವಂತೆ ಇರಬಾರದು. ಹೆದ್ದಾರಿಯಿಂದ ಕನಿಷ್ಠ 220 ಮೀಟರ್ ದೂರವಿರಬೇಕು ಎಂದು ಹೇಳಿದೆ.
ಇನ್ನು 2016ರ ಡಿಸೆಂಬರ್ 15ಕ್ಕೂ ಮುಂಚೆ ನೀಡಲಾದ ಮದ್ಯ ಮಾರಾಟದ ಲೈಸೆನ್ಸ್ ತೆಲಂಗಾಣದಲ್ಲಿ ಸೆಪ್ಟೆಂಬರ್ 30ರವರೆಗೆ ಚಾಲ್ತಿಯಲ್ಲಿರುತ್ತದೆ ಹಾಗೂ ಆಂಧ್ರಪ್ರದೇಶದಲ್ಲಿ ಜೂನ್ 30ರವರೆಗೆ ಚಾಲ್ತಿಯಲ್ಲಿರುತ್ತದೆ. ಅನಂತರ ಅವರು ಮದ್ಯದಂಗಡಿಗಳನ್ನು ಸ್ಥಳಾಂತರಿಸಬೇಕು ಎಂದು ಕೋರ್ಟ್ ಹೇಳಿದೆ.
