– ಐಪಿಎಲ್‌ನಲ್ಲಿ ದಾಖಲಾಯ್ತು ಎರಡನೇ ಅತ್ಯಧಿಕ ಮೊತ್ತ

ಮೊಹಾಲಿ: ಸಿಕ್ಸರ್‌, ಬೌಂಡರಿಗಳ ಸುರಿಮಳೆ ಆಟದಲ್ಲಿ ಲಕ್ನೋ ಸೂಪರ್‌ ಜೈಂಟ್ಸ್‌ (Lucknow Super Giants) ಪಂಜಾಬ್‌ ಕಿಂಗ್ಸ್‌ (Punjab Kings) ವಿರುದ್ಧ 56 ರನ್‌ಗಳ ಭರ್ಜರಿ ಜಯ ಸಾಧಿಸಿದೆ.

ಟಾಸ್‌ ಸೋತು ಮೊದಲು ಬ್ಯಾಟಿಂಗ್‌ ಮಾಡಿದ ಲಕ್ನೋ 5 ವಿಕೆಟ್‌ ನಷ್ಟಕ್ಕೆ 257 ರನ್‌ ಹೊಡೆಯಿತು. ಭಾರೀ ಸವಾಲಿನ ಮೊತ್ತವನ್ನು ಬೆನ್ನಟ್ಟಿದ ಪಂಜಾಬ್‌ 19.5 ಓವರ್‌ಗಳಲ್ಲಿ 201 ರನ್‌ಗಳಿಗೆ ಆಲೌಟ್‌ ಆಯ್ತು

ಪಂಜಾಬ್‌ ಆರಂಭದಲ್ಲೇ ತನ್ನ ಪ್ರಮುಖ ಎರಡು ವಿಕೆಟ್‌ ಕಳೆದುಕೊಂಡಿತ್ತು. ನಾಯಕ ಶಿಖರ್‌ ಧವನ್‌ 1 ರನ್‌ ಗಳಿಸಿ ಔಟಾದರೆ ಪ್ರಭಾಸಿಮ್ರಾನ್ ಸಿಂಗ್ 9 ರನ್‌ ಗಳಿಸಿ ಔಟಾದರು. ಆದರೆ ಅಥರ್ವ ತೈದೆ ಮತ್ತು ಸಿಕಂದರ್ ರಜಾ ಮೂರನೇ ವಿಕೆಟಿಗೆ 47 ಎಸೆತದಲ್ಲಿ 78 ರನ್‌ ಜೊತೆಯಾಟವಾಡಿದರು.

ಅಥರ್ವ ತೈದೆ 66 ರನ್‌(36 ಎಸೆತ, 8 ಬೌಂಡರಿ, 2 ಸಿಕ್ಸರ್)‌, ಸಿಕಂದರ್‌ ರಾಜಾ 36 ರನ್‌(22 ಎಸೆತ, 4 ಬೌಂಡರಿ, 1 ಸಿಕ್ಸರ್‌) ಹೊಡೆದು ಔಟಾದರು. ಸ್ಯಾಮ್‌ ಕರ್ರನ್‌ 21 ರನ್‌(11 ಎಸೆತ, 2 ಬೌಂಡರಿ, 1 ಸಿಕ್ಸರ್‌), ಜಿತೇಶ್‌ ಶರ್ಮಾ 24 ರನ್‌( 10 ಎಸೆತ, 3 ಸಿಕ್ಸರ್‌) ಸಿಡಿಸಿ ಸ್ವಲ್ಪ ಪ್ರತಿರೋಧ ತೋರಿದರು. ಉಳಿದ ಆಟಗಾರರಿಂದ ನಿರೀಕ್ಷಿತ ಆಟ ಬಾರದ ಕಾರಣ ಪಂಜಾಬ್‌ 201 ರನ್‌ಗಳಿಗೆ ಆಲೌಟ್‌ ಆಯ್ತು. ಪಂಜಾಬ್‌ ಬ್ಯಾಟರ್‌ಗಳನ್ನು ನಿಯಂತ್ರಿಸಲು ಲಕ್ನೋ ಪರವಾಗಿ 8 ಮಂದಿ ಬೌಲ್‌ ಮಾಡಿದ್ದರು.

ರನ್‌ ಸುರಿಮಳೆ:
ಲಕ್ನೋ ತಂಡ ಆರಂಭದಿಂದಲೇ ಬ್ಯಾಟ್‌ ಬೀಸಲು ಆರಂಭಿಸಿತ್ತು. ಕೆಎಲ್‌ ರಾಹುಲ್‌ 12 ರನ್‌(9 ಎಸೆತ, 4 ಬೌಂಡರಿ, 1 ಸಿಕ್ಸರ್‌) ಹೊಡೆದು ಔಟಾದರು. ಕೈಲ್‌ ಮೇಯರ್ಸ್‌ ಮತ್ತು ಮಾರ್ಕಸ್ ಸ್ಟೊಯಿನಿಸ್ ಮೂರನೇ ವಿಕೆಟಿಗೆ 47 ಎಸೆತಗಳಲ್ಲಿ 89 ರನ್‌ ಜೊತೆಯಾಟವಾಡಿದರು. ನಾಲ್ಕನೇ ವಿಕೆಟಿಗೆ ಸ್ಟೊಯಿನಿಸ್ ಮತ್ತು ನಿಕೂಲಸ್‌ ಪೂರನ್‌ 30 ಎಸೆತಗಳಲ್ಲಿ 76 ರನ್‌ ಚಚ್ಚಿದರು.

ಕೈಲ್‌ ಮೇಯರ್ಸ್‌ 54 ರನ್‌(24 ಎಸೆತ, 7 ಬೌಂಡರಿ, 4 ಸಿಕ್ಸರ್)‌ , ಆಯುಷ್ ಬದೋನಿ 43 ರನ್‌(24 ಎಸೆತ, 3 ಬೌಂಡರಿ, 3 ಸಿಕ್ಸರ್‌), ಸ್ಟೊಯಿನಿಸ್ 72 ರನ್‌(40 ಎಸೆತ, 6 ಬೌಂಡರಿ, 5 ಸಿಕ್ಸರ್‌), ನಿಕೂಲಸ್‌ ಪೂರನ್‌ 45 ರನ್‌(19 ಎಸೆತ, 7 ಬೌಂಡರಿ, 1 ಸಿಕ್ಸರ್)‌ ಹೊಡೆದು ಔಟಾದರು.

ಲಕ್ನೋ ಬ್ಯಾಟರ್‌ಗಳನ್ನು ಕಟ್ಟಿ ಹಾಕಲು ಪಂಜಾಬ್‌ ತಂಡ 7 ಬೌಲರ್‌ಗಳನ್ನು ಬಳಸಿತ್ತು. ಅಷ್ಟೇ ಅಲ್ಲದೇ ಇತರ ರೂಪದಲ್ಲಿ 15 ರನ್‌(ಲೆಗ್‌ ಬೈ6, ನೋಬಾಲ್‌ 4, ವೈಡ್‌ 5) ನೀಡಿದ ಪರಿಣಾಮ ಲಕ್ನೋ 5 ವಿಕೆಟ್‌ ನಷ್ಟಕ್ಕೆ 257 ರನ್‌ ಹೊಡೆದಿತ್ತು.

ಈ ಪಂದ್ಯದಲ್ಲಿ ಲಕ್ನೋ ಪರ 14 ಸಿಕ್ಸ್‌, 27 ಬೌಂಡರಿ ದಾಖಲಾದರೆ ಪಂಜಾಬ್‌ ಪರ 8 ಸಿಕ್ಸ್‌ 16 ಬೌಂಡರಿ ಸಿಡಿಯಲ್ಪಟ್ಟಿತ್ತು.

ಎರಡನೇ ಅತ್ಯಧಿಕ ಮೊತ್ತ:
ಲಕ್ನೋ ಇಂದು ಹೊಡೆದ 257 ರನ್‌ ಐಪಿಎಲ್‌ (IPL) ಇತಿಹಾಸದಲ್ಲಿ ತಂಡವೊಂದರ ಎರಡನೇ ಅತ್ಯಧಿಕ ಸ್ಕೋರ್‌ ಆಗಿದೆ. ಈ ಹಿಂದೆ 2013ರಲ್ಲಿ ಬೆಂಗಳೂರಿನಲ್ಲಿ ಪುಣೆ ವಾರಿಯರ್ಸ್‌ ವಿರುದ್ಧ ಆರ್‌ಸಿಬಿ 5 ವಿಕೆಟ್‌ ನಷ್ಟಕ್ಕೆ 263 ರನ್‌ ಹೊಡೆದಿತ್ತು. ಇದು ಈವರೆಗಿನ ತಂಡವೊಂದರ ಅತ್ಯಧಿಕ ಮೊತ್ತವಾಗಿದೆ.