ನವದೆಹಲಿ: ಮಹಿಳೆಯೊಬ್ಬಳು ಪ್ರಿಯಕರನ ಜೊತೆ ಸೇರಿಕೊಂಡು ಪತಿಯನ್ನೇ ಕೊಲೆ ಮಾಡಿರುವ ಘಟನೆ ಹೊಸ ಉಸ್ಮಾನ್ಪುರ ಪ್ರದೇಶದಲ್ಲಿ ನಡೆದಿದೆ.
ಸುಬೋಧ್ ಜೈನ್ (42) ಕೊಲೆಯಾದ ವ್ಯಕ್ತಿ. ಪತ್ನಿ ಪ್ರೀತಿ ಜೈನ್ ತನ್ನ ಪ್ರೇಮಿ ರಾಹುಲ್ ಜೈನ್ ಜೊತೆ ಸೇರಿಕೊಂಡು ಕೊಲೆ ಮಾಡಿದ್ದಾಳೆ. ಸದ್ಯಕ್ಕೆ ದೆಹಲಿ ಪೊಲೀಸರು ಮೂರು ಆರೋಪಿಗಳನ್ನು ಕೊಲೆ ಪ್ರಕರಣದಲ್ಲಿ ಬಂಧಿಸಿದ್ದಾರೆ.
ಏನಿದು ಪ್ರಕರಣ?
ಮೇ 1 ರಂದು ಉಸ್ಮಾನ್ಪುರದ ನಿವಾಸದಲ್ಲಿ ಬೆಡ್ ಮೇಲೆ ಸುಬೋಧ್ ಜೈನ್ ಪ್ರಜ್ಞೆ ತಪ್ಪಿ ಬಿದ್ದಿದ್ದನು. ತಕ್ಷಣ ಆತನನ್ನು ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಆದರೆ ಅಷ್ಟರಲ್ಲಿ ಜೈನ್ ಮೃತಪಟ್ಟಿದ್ದಾನೆ ಎಂದು ವೈದ್ಯರು ತಿಳಿಸಿದ್ದಾರೆ. ಜೈನ್ನನ್ನು ಉಸಿರುಗಟ್ಟಿಸಿ ಕೊಲೆ ಮಾಡಲಾಗಿದೆ ಎಂದು ಮರಣೋತ್ತರ ಪರೀಕ್ಷೆಯಲ್ಲಿ ವರದಿಯಾಗಿದೆ. ನಂತರ ಮೇ 2 ರಂದು ಐಪಿಸಿ ಸೆಕ್ಷನ್ 302 (ಕೊಲೆ) ಅಡಿಯಲ್ಲಿ ಪೊಲೀಸರು ಎಫ್ಐಆರ್ ದಾಖಲಿಸಿದ್ದಾರೆ.
ಈ ಪ್ರಕರಣ ಕುರಿತಂತೆ ಅನುಮಾನದ ಮೇರೆಗೆ ಮೃತ ಜೈನ್ ಪತ್ನಿ ಪ್ರೀತಿ ಜೈನ್ನನ್ನು ಬಂಧಿಸಲಾಗಿತ್ತು. ವಿಚಾರಣೆ ವೇಳೆ ಆಕೆ ತನ್ನ ಪ್ರೇಮಿ ರಾಹುಲ್ ಜೈನ್ ಜೊತೆ ಸೇರಿಕೊಂಡು ಪತಿಯನ್ನು ಹತ್ಯೆ ಮಾಡಿದ್ದಾಳೆ ಎಂದು ತಿಳಿದು ಬಂದಿದೆ. ಅಷ್ಟೇ ಅಲ್ಲದೇ ಕೊಲೆ ಮಾಡಲು ರಾಹುಲ್ ತನ್ನ ಸ್ನೇಹಿತ ವಿಜಯ್ ಹೂಡನಿಗೆ 1,50,000 ರೂ. ಸುಫಾರಿ ಕೊಟ್ಟಿದ್ದನು ಎಂಬುದು ತಿಳಿದುಬಂದಿದೆ. ನಂತರ ಆತನನ್ನು ಪೊಲೀಸರು ಬಂಧಿಸಿದ್ದಾರೆ.
ಕೊಲೆ:
ಮೃತನ ಪತ್ನಿ ಪ್ರೀತಿ ಹರಿಯಾಣದ ಸೋನಿಪತ್ ನಿವಾಸಿ ರಾಹುಲ್ ಜೈನ್ (30) ಜೊತೆ ಆಗಾಗ ಮಾತನಾಡುತ್ತಿದ್ದಳು. ನಂತರ ಅವರಿಬ್ಬರು ಅನೈತಿಕ ಸಂಬಂಧ ಹೊಂದಿದ್ದರು. ದಿನಕಳೆದಂತೆ ಅವರಿಬ್ಬರಿಗೆ ಅಡ್ಡಿಯಾಗಿದ್ದ ಪತಿಯನ್ನು ಕೊಲೆ ಮಾಡಲು ಪ್ರೀತಿ ಮತ್ತು ರಾಹುಲ್ ಪ್ಲಾನ್ ಮಾಡಿದ್ದಾರೆ. ಅದರಂತೆಯೇ ರಾಹುಲ್ ಸ್ನೇಹಿತನಿಗೆ 1.50 ಲಕ್ಷ ಕೊಟ್ಟು ಕೊಲೆಗೆ ಸುಫಾರಿ ಕೊಟ್ಟಿದ್ದಾನೆ. ಒಂದು ದಿನ ರಾಹುಲ್ ಪ್ರೀತಿ ಮನೆಗೆ ಬಂದಿದ್ದು, ಆಗ ಪ್ರೀತಿ ಸುಬೋಧ್ಗೆ ನಿದ್ದೆ ಮಾತ್ರೆ ಹಾಕಿ ಹಾಲು ಕೊಟ್ಟಿದ್ದಾಳೆ. ಅದನ್ನು ಕುಡಿದ ಸುಬೋಧ್ ಪ್ರಜ್ಞೆ ಕಳೆದುಕೊಂಡು ಮಲಗಿದ್ದಾನೆ. ನಂತರ ಪ್ರೀತಿ ತನ್ನ ಮಗುವಿನ ಜೊತೆ ಮನೆಯಿಂದ ಹೋಗಿದ್ದಾಳೆ.
ಸಬೋಧ್ ನಿದ್ದೆ ಮಾತ್ರೆಯಿಂದಾಗಿ ಬೆಡ್ ಮೇಲೆಯೇ ಮಲಗಿದ್ದನು. ಆಗ ವಿಜಯ್ ಮನೆಗೆ ಬಂದು ಆತನನ್ನು ಉಸಿರುಗಟ್ಟಿಸಿ ಕೊಲೆ ಮಾಡಿದ್ದಾನೆ. ಕೊಲೆಯ ಬಗ್ಗೆ ಅನುಮಾನ ಬರದಂತೆ ಮನೆಯಲ್ಲಿದ್ದ ಲ್ಯಾಪ್ಟಾಪ್, ಮೊಬೈಲ್ ಇತರೆ ವಸ್ತುಗಳನ್ನು ಕದ್ದು ಹೋಗಿದ್ದನು ಎಂದು ಪೊಲೀಸರು ತಿಳಿಸಿದ್ದಾರೆ.
ಪೊಲೀಸರು ತನಿಖೆ ನಡೆಸಿದ ಬಳಿಕ ವಿಜಯ್ ಮತ್ತು ಕೊಲೆಗೆ ಬಳಸಿದ್ದ ಕಾರ್, ಲ್ಯಾಪ್ಟಾಪ್ ಮತ್ತು ಮೊಬೈಲ್ಗಳನ್ನು ವಶಪಡಿಸಿಕೊಂಡಿದ್ದಾರೆ. ಮೂವರು ಆರೋಪಿಗಳಾದ ಪ್ರೀತಿ ಜೈನ್, ರಾಹುಲ್ ಜೈನ್ ಮತ್ತು ವಿಜಯ್ ಹೂಡ ತಾವು ಮಾಡಿರುವ ಕೊಲೆಯನ್ನು ಒಪ್ಪಿಕೊಂಡಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.
