ಯಶ್ ಫಿಟ್ನೆಸ್ ವಿಡಿಯೋದಿಂದ ಸ್ಫೂರ್ತಿಗೊಂಡ ವಿದೇಶಿ ಮಹಿಳೆ- ವಿಡಿಯೋ ನೋಡಿ

ಬೆಂಗಳೂರು: ದೇಶಾದ್ಯಂತ ನಟ-ನಟಿಯರು, ದೇಶದ ಗಣ್ಯರು ಫಿಟ್ನೆಸ್ ಚಾಲೆಂಜ್‍ನ ಅಭಿಯಾನದಲ್ಲಿ ಪಾಲ್ಗೊಳ್ಳುತ್ತಿದ್ದಾರೆ. ಈಗ ಈ ಫಿಟ್ನೆಸ್ ಚಾಲೆಂಜ್ ಸ್ಯಾಂಡಲ್‍ವುಡ್‍ನಲ್ಲೂ ಸದ್ದು ಮಾಡುತ್ತಿದ್ದು, ರಾಕಿಂಗ್ ಸ್ಟಾರ್ ಯಶ್ ಅವರ ಫಿಟ್ನೆಸ್ ವಿಡಿಯೋದಿಂದ ವಿದೇಶಿ ಮಹಿಳೆಯೊಬ್ಬರು ಸ್ಫೂರ್ತಿಗೊಂಡಿದ್ದಾರೆ.

ಇತ್ತೀಚೆಗೆ ರಾಕಿಂಗ್ ಸ್ಟಾರ್ ಯಶ್ ಸುದೀಪ್ ಚಾಲೆಂಜ್ ಸ್ವೀಕರಿಸಿ ಅದರಲ್ಲಿ ಒಂದು ಟ್ವಿಸ್ಟ್ ನೀಡಿದ್ದರು. ಫಿಟ್ನೆಸ್ ಚಾಲೆಂಜ್ ಸ್ವೀಕರಿಸಿದ ಯಶ್ ಫಿಟ್ನೆಸ್ ವಿಡಿಯೋವೊಂದನ್ನು ತಮ್ಮ ಫೇಸ್‍ಬುಕ್‍ನಲ್ಲಿ ಹಂಚಿಕೊಂಡಿದ್ದರು. ವಿಡಿಯೋದಲ್ಲಿ ಯಶ್ ತಾವು ವರ್ಕೌಟ್ ಮಾಡುವ ಬದಲು ತಮ್ಮ ಬಾಲ್ಯ ಸ್ನೇಹಿತನನ್ನು ವರ್ಕೌಟ್ ಮಾಡಿಸಿ ಅವರ ವಿಡಿಯೋವನ್ನು ಫೇಸ್‍ಬುಕ್‍ನಲ್ಲಿ ಹಂಚಿಕೊಳ್ಳುವುದರ ಮೂಲಕ ಸುದೀಪ್ ಫಿಟ್ನೆಸ್ ಚಾಲೆಂಜ್‍ಗೆ ಟ್ವಿಸ್ಟ್ ನೀಡಿದ್ದರು.

ಆಗ ಜೀವನದಲ್ಲೇ ನನ್ನ ಸ್ನೇಹಿತ ಫಿಟ್ ಆಗಿರಲು ಸಾಧ್ಯವಿಲ್ಲ ಎಂದು ಕಾಣುವ ನನ್ನ ಸ್ನೇಹಿತನೊಬ್ಬ ಇದ್ದಾನೆ. ಆತನ ಹೆಸರು ಚೇತನ್ ಅಲಿಯಾಸ್ ಚಕ್ಕಲಿ ಈತ ನನ್ನ ಬಾಲ್ಯ ಸ್ನೇಹಿತ. ಅವನಿಂದ ನಾನು ಈ ಚಾಲೆಂಜ್ ಮಾಡಿಸುತ್ತೇನೆ ಎಂದು ಹೇಳಿ ತಮ್ಮ ಸ್ನೇಹಿತನಿಂದ ಫಿಟ್ನೆಸ್ ಚಾಲೆಂಜ್ ಮಾಡಿಸಿದ್ದರು. ಈಗ ಯಶ್ ಅವರ ಈ ಫಿಟ್ನೆಸ್‍ಯಿಂದ ಸ್ಫೂರ್ತಿಗೊಂಡ ವಿದೇಶಿ ಮಹಿಳೆಯೊಬ್ಬರು ತಮ್ಮ ಸ್ನೇಹಿತೆಯನ್ನು ವರ್ಕೌಟ್ ಮಾಡಿಸಿ ಆ ವಿಡಿಯೋವನ್ನು ತಮ್ಮ ಫೇಸ್‍ಬುಕ್ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ.

“ಹಾಯ್, ನನ್ನ ಹೆಸರು ಲೀಯಾ ಎಂ ಸೆನ್ಟ್ರಾಚಿಯೋ, ನಾನು ಇಲ್ಲಿ ಜಿಮ್‍ನಲ್ಲಿದ್ದೇನೆ ಹಾಗೂ ನಾನು ‘ಹಮ್ ಫಿಟ್ ತೋ ಇಂಡಿಯಾ ಫಿಟ್’ ಚಾಲೆಂಜ್‍ನಲ್ಲಿ ಭಾಗಿಯಾಗುತ್ತಿದ್ದೇನೆ. ಈ ಅಭಿಯಾನ ಸದ್ಯ ವಿಶ್ವಾದ್ಯಂತ ಸದ್ದು ಮಾಡುತ್ತಿದೆ. ಅಮೆರಿಕಾ ಜನತೆ ಇಂತಹ ಚಾಲೆಂಜ್ ತುಂಬಾ ಸೀರಿಯಸ್ ಆಗಿ ತೆಗೆದುಕೊಳ್ಳುತ್ತಾರೆ. ನಾನು ರಾಕಿಂಗ್ ಸ್ಟಾರ್ ಯಶ್ ಅಭಿಮಾನಿಯಾಗಿದ್ದು, ಅವರು ತಮ್ಮ ಫಿಟ್ನೆಸ್ ಚಾಲೆಂಜ್ ವಿಡಿಯೋದಲ್ಲಿ ಮಾಡಿದ್ದನ್ನು ನಾನು ನನ್ನ ಸ್ನೇಹಿತೆಯ ಹತ್ತಿರ ಅದೇ ರೀತಿ ಮಾಡಿಸುತ್ತೇನೆ” ಎಂದು ಹೇಳಿ ತನ್ನ ಸ್ನೇಹಿತೆ ಹತ್ತಿರ ವ್ಯಾಯಾಮ ಮಾಡಿಸಿದ್ದಾರೆ.

ಈ ವಿಡಿಯೋವನ್ನು ಯಶ್ ಪೋಸ್ಟ್ ಮಾಡಿ “ಇಂಡಿಯಾ ಫಿಟ್ ಆಗಿ ಇರೋಣ ಹಾಗೂ ನಮ್ಮ ಜೊತೆಯಲ್ಲಿ ಇರುವವರನ್ನು ಫಿಟ್ ಆಗಿ ಇರಿಸೋಣ” ಎಂದು ಯಶ್ ಈ ವಿಡಿಯೋ ಮೂಲಕ ತಿಳಿಸಿದ್ದರು.