-ಕೊರೊನಾ ಸೋಂಕಿತರಿಗೆ ಚಿಕಿತ್ಸೆ ನೀಡ್ತಿರುವ ಡಾಕ್ಟರ್
ನವದೆಹಲಿ: ಕೊರೊನಾ ಸೋಂಕಿತರಿಗೆ ಚಿಕಿತ್ಸೆ ನೀಡುತ್ತಿರುವ ವೈದ್ಯೆ ತಮ್ಮ ಪೋಷಕರನ್ನು ನೆನೆದು ಕಣ್ಣೀರಿಟ್ಟಿರುವ ವಿಡಿಯೋ ಸೋಶಿಯಲ್ ಮೀಡಿಯಾದಲ್ಲಿ ಹರಿದಾಡುತ್ತಿದೆ.
ಸುದ್ದಿ ಸಂಸ್ಥೆ ಜೊತೆ ಮಾತನಾಡಿರುವ ದೆಹಲಿಯ ಏಮ್ಸ್ ವೈದ್ಯೆ ಡಾ.ಅಂಬಿಕಾ, ಕುಟುಂಬಸ್ಥರಿಂದ ದೂರವಿದ್ದು ಕೆಲಸ ಮಾಡಬೇಕು ಎಂದು ಸರಳವಾಗಿ ಹೇಳಬಹುದು. ಆದ್ರೆ ಕುಟುಂಬಸ್ಥರ ಜೊತೆ ಮಾತನಾಡುವಾಗ ಮತ್ತು ಅವರಿಂದ ದೂರವಿದ್ದಾಗ ಸಹಜವಾಗಿ ನೋವು ಆಗುತ್ತದೆ. ಮನೆಗೆ ಹೋದ್ರೆ ನಮ್ಮಿಂದ ಅವರಿಗೆ ಸೋಂಕು ತಗಲುವ ಸಾಧ್ಯತೆಗಳಿರುತ್ತವೆ. ಒಂದು ವೇಳೆ ನಮ್ಮಿಂದ ಕುಟುಂದವರಿಗೆ ಸೋಂಕು ತಾಗಿದ್ರೆ ಆ ತಪ್ಪಿನಿಂದ ಕ್ಷಮೆ ಸಿಗಲಾರದು ಎಂದು ಹೇಳುತ್ತಾ ಭಾವುಕರಾದರು.
ನಿಮ್ಮ ಜೊತೆ ಮಾತನಾಡುತ್ತಾ ನನಗೆ ಪೋಷಕರು ನೆನಪು ಆಗುತ್ತಿದ್ದಾರೆ. ಬಹಳ ದಿನಗಳಿಂದ ಅವರನ್ನು ನಾನು ಭೇಟಿಯಾಗಿಲ್ಲ ಎಂದು ಹೇಳಿ ಕಣ್ಣೀರಿಟ್ಟರು. ಇದೀಗ ನಿಮ್ಮ ಮೂಲಕ ಅವರಿಗೆ ಸಂದೇಶ ಕಳುಹಿಸುತ್ತಿದ್ದೇನೆ. ನಮ್ಮದು ಸುಂದರವಾದ ಕುಟುಂಬ. ಫೋನ್ ಮಾಡಿದಾಗ ಒಮ್ಮೆಯೂ ಮನೆಗೆ ಹಿಂದಿರುಗಿ ಬಾ ಅಂತ ಹೇಳಿಲ್ಲ. ಜೀವವಿದ್ರೆ ಏನ್ ಬೇಕಾದ್ರೂ ಸಾಧಿಸಬಹುದು ನಿನ್ನ ಕೆಲಸ ಬಿಟ್ಟು ಬಾ ಅಂತ ಹೇಳಿರೋದನ್ನ ಕೇಳಿಸಿಕೊಂಡಿಲ್ಲ ಎಂದು ಹೇಳಿದರು.
ಅಮ್ಮನಿಗೆ ನನ್ನ ಊಟದ್ದೇ ಚಿಂತೆ: ಕೆಲಸದ ಜೊತೆ ಆರೋಗ್ಯದ ಬಗ್ಗೆ ಎಚ್ಚರಿಕೆ ತೆಗೆದುಕೊಳ್ಳಬೇಕು. ಚಿಕಿತ್ಸೆ ನೀಡುವಾಗ ಮುಂಜಾಗ್ರತ ಕ್ರಮಗಳನ್ನು ತೆಗದುಕೊಳ್ಳಬೇಕೆಂದು ಸಲಹೆ ನೀಡುತ್ತಾರೆ. ಇನ್ನು ಅಮ್ಮನಿಗೆ ನನ್ನ ಊಟದ್ದೇ ಚಿಂತೆ. ಸರಿಯಾದ ಸಮಯಕ್ಕೆ ಊಟ ಮಾಡಬೇಕು ಎಂದು ಪದೇ ಪದೇ ಹೇಳುತ್ತಾರೆ. ಇಂತಹ ಸಂದರ್ಭದಲ್ಲಿ ಎಲ್ಲವನ್ನು ಮ್ಯಾನೇಜ್ ಮಾಡಿಕೊಳ್ಳಬೇಕು ಎಂಬುವುದು ವೈದ್ಯೆಯ ಮಾತು.
ಇದೊಂದು ಯುದ್ಧ: ಕೊರೊನಾ ವಿರುದ್ಧ ನಮ್ಮೆಲ್ಲರದ್ದು ಒಂದು ರೀತಿಯ ಯುದ್ಧ. ದೇಶದ ಗಡಿಯಲ್ಲಿ ಯುದ್ಧ ನಡೆದರೆ ಯಾರು ತಾನೇ ಅವರ ಮಕ್ಕಳನ್ನು ಮನೆಗೆ ಕರೆಯುತ್ತಾರೆ. ನಮ್ಮ ಆಶೀರ್ವಾದ ನಿಮ್ಮ ಜೊತೆಯಲ್ಲಿರುತ್ತೆ ಯುದ್ಧಕ್ಕೆ ಹೋಗು ಅಂತ ಹೇಳ್ತಾರೆ. ಹಾಗೆಯೇ ಕೊರೊನಾ ಯುದ್ಧದಲ್ಲಿ ಆರೋಗ್ಯ ಸಿಬ್ಬಂದಿ ಸೈನಿಕರಂತೆ ಹೋರಾಡುತ್ತಿದ್ದಾರೆ ಎಂದು ತಮ್ಮ ಕೆಲಸದ ಬಗ್ಗೆ ಹೆಮ್ಮೆ ವ್ಯಕ್ತಪಡಿಸಿದರು.
#WATCH Dr Ambika, who is posted at #COVID19 treatment ward of Delhi AIIMS, breaks down while speaking about her professional challenges amid coronavirus pandemic. pic.twitter.com/erNNUIh7Il
— ANI (@ANI) April 6, 2020
