-4 ಲಕ್ಷದ 3 ಚೆಕ್ ಹಸ್ತಾಂತರಿಸಿ ಸಾಂತ್ವನ
ಮಡಿಕೇರಿ: ಕಳೆದ ಆಗಸ್ಟ್ ನಲ್ಲಿ ಸಂಭವಿಸಿದ ಭೂ ಕುಸಿತಕ್ಕೆ ಒಳಗಾಗಿ ಕಣ್ಮರೆ ಆದವರನ್ನು ವಿಶೇಷ ಪ್ರಕರಣವೆಂದು ಪರಿಗಣಿಸಿ ಆ ಕುಟುಂಬಗಳಿಗೆ ಸಚಿವ ವಿ.ಸೋಮಣ್ಣ ತಲಾ 4 ಲಕ್ಷದ ಪರಿಹಾರ ಚೆಕ್ ವಿತರಿಸಿದ್ದಾರೆ.
ಕೊಡಗು ಜಿಲ್ಲೆಯ ವಿರಾಜಪೇಟೆ ತಾಲೂಕಿನ ತೋರಾ ಗ್ರಾಮದಲ್ಲಿ ಭೂ ಕುಸಿತವಾದ ಸ್ಥಳಕ್ಕೆ ಜಿಲ್ಲಾ ಉಸ್ತುವಾರಿ ಸಚಿವ ವಿ.ಸೋಮಣ್ಣ ಭೇಟಿ ನೀಡಿದ್ದಾರೆ. ಅಲ್ಲದೆ ಕಣ್ಮರೆಯಾದವರ ಕುಟುಂಬದ ಸದಸ್ಯರನ್ನು ಭೇಟಿ ಮಾಡಿ 4 ಲಕ್ಷದ 3 ಚೆಕ್ ಹಸ್ತಾಂತರಿಸಿ ಸಾಂತ್ವನ ಹೇಳಿದರು.
ಭೂ ಕುಸಿತದಿಂದ ತೋರಾ ಗ್ರಾಮದ ಪ್ರಭು ಕುಟುಂಬದ 3 ಮಂದಿ ಹಾಗೂ ಹರೀಶ್ ಕುಟುಂಬದ ಒಬ್ಬರು ಕಣ್ಮರೆ ಆಗಿದ್ದರು. ಹಲವು ದಿನಗಳು ನಿರಂತರವಾಗಿ ಎಷ್ಟೇ ಹುಡುಕಾಟ ನಡೆಸಿದರೂ ಕಣ್ಮರೆ ಆದವರ ಮೃತದೇಹದ ಸುಳಿವೇ ಪತ್ತೆಯಾಗಿರಲಿಲ್ಲ.
ಈ ಹಿನ್ನೆಲೆಯಲ್ಲಿ ವಿಶೇಷ ಪ್ರಕರಣವೆಂದು ಪರಿಗಣಿಸುವಂತೆ ಕೊಡಗು ಜಿಲ್ಲಾಧಿಕಾರಿ ಅನೀಸ್ ಕೆ. ಜಾಯ್ ರಾಜ್ಯ ಸರ್ಕಾರಕ್ಕೆ ಪತ್ರ ಬರೆದಿದ್ದರು. ಮನವಿ ಪುರಸ್ಕರಿಸಿದ ಸರ್ಕಾರ ವಿಶೇಷ ಪ್ರಕರಣವೆಂದು ಪರಿಗಣಿಸಿತ್ತು. ಆರಂಭದಲ್ಲಿ 1 ಲಕ್ಷ ನೀಡಿದ್ದರಿಂದ ಈಗ ತಲಾ 4 ಲಕ್ಷ ಚೆಕ್ ವಿತರಿಸಲಾಗಿದೆ.
ಸಚಿವ ವಿ. ಸೋಮಣ್ಣ ಅವರೊಂದಿಗೆ ಶಾಸಕ ಕೆ.ಜಿ ಬೋಪಯ್ಯ, ಜಿಲ್ಲಾಧಿಕಾರಿ ಅನೀಸ್ ಕಣ್ಮನಿ ಜಾಯ್ ಹಾಗೂ ಸಿಇಓ ಲಕ್ಷ್ಮಿಪ್ರಿಯ ಸಾಥ್ ನೀಡಿದರು.
