ಬಡಾವಣೆಯೊಂದರಲ್ಲಿಯೇ 18 ಮನೆಗಳಲ್ಲಿ ಚಪ್ಪಲಿ, ಶೂ ಎಗರಿಸಿದ ಖದೀಮರು

ಬೆಂಗಳೂರು: ಸಾರ್ವಜನಿಕರೇ ಹುಷಾರ್.. ಮನೆ ಮುಂದೆ ಚಪ್ಪಲಿ ಬಿಡುವ ಮುನ್ನ ಎಚ್ಚರವಾಗಿರಿ. ನಗರದಲ್ಲಿ ಚಪ್ಪಲಿ ಕಳ್ಳರು ಹುಟ್ಟಿಕೊಂಡಿದ್ದಾರೆ.

ನಗರದಲ್ಲಿ ಮನೆ ಮುಂದೆ ಇಟ್ಟಿದ್ದ ಚಪ್ಪಲಿಗಳನ್ನು ಬೆಳಗಾಗುವಷ್ಟರಲ್ಲೇ ಖದೀಮರು ಎಗರಿಸುತ್ತಿದ್ದಾರೆ. ಕಳ್ಳರು ಬ್ರಾಂಡೆಡ್ ಕಂಪೆನಿಯ ಶೂ ಮತ್ತು ಚಪ್ಪಲಿಗಳನ್ನು ಟಾರ್ಗೆಟ್ ಮಾಡುತ್ತಿದ್ದು, ಒಂದು ಜೊತೆ ಚಪ್ಪಲಿಯನ್ನು ಬಿಡದೆ ಹೊತ್ತೊಯ್ಯುತ್ತಿದ್ದಾರೆ.

ಸೋಮವಾರ ರಾತ್ರಿ ನಗರದ ಅಬ್ಬಿಗೆರೆಯ ವೆಂಕಟೇಶ್ವರ ಬಡಾವಣೆಯಲ್ಲಿ ವಿಚಿತ್ರ ಘಟನೆ ನಡೆದಿದೆ. ಈ ಬಡಾವಣೆಯಲ್ಲಿ ಸುಮಾರು 18 ಮನೆಗಳಲ್ಲಿ ಚಪ್ಪಲಿ ಮತ್ತು ಶೂ ಗಳನ್ನ ಖದೀಮರು ಎಗರಿಸಿದ್ದಾರೆ. ಇದರಿಂದ ಸ್ಥಳೀಯರು ಚಪ್ಪಲಿ ಕಳ್ಳರಿಗೆ ಹಿಡಿಶಾಪ ಹಾಕಿದ್ದಾರೆ.