ಭಾರತದ ಇತಿಹಾಸದಲ್ಲಿ ಯಾವುದೇ ಚುನಾವಣಾ ಪೂರ್ವ ಮೈತ್ರಿ ಸಫಲವಾಗಿಲ್ಲ, ನಾವು ಸಾಧನೆ ಮಾಡಿದ್ದೇವೆ: ಎನ್‌ಡಿಎ ಕೊಂಡಾಡಿದ ಮೋದಿ

– ನಮ್ಮದು 30 ವರ್ಷದ ಹಿಂದಿನ ಮೈತ್ರಿ

ನವದೆಹಲಿ: ಭಾರತದ ಮೈತ್ರಿ ಇತಿಹಾಸದಲ್ಲಿ ಎನ್‌ಡಿಎ (NDA) ರೀತಿ ಯಾವುದೇ ಚುನಾವಣಾ ಪೂರ್ವ ಮೈತ್ರಿ ಸಫಲವಾಗಿಲ್ಲ. ಆದರೆ ನಮ್ಮ ಮೈತ್ರಿ ಸಾಧನೆ ಮಾಡಿದ್ದೇವೆ. ಇದು ಮೈತ್ರಿಯ ವಿಜಯವಾಗಿದೆ. ನಾವು ಬಹುಮತ ಪಡೆದಿದ್ದೇವೆ ಎಂದು ಪ್ರಧಾನಿ ನರೇಂದ್ರ ಮೋದಿ (PM Narendra Modi)  ಎನ್‌ಡಿಎ ಮೈತ್ರಿಯನ್ನು ಕೊಂಡಾಡಿದ್ದಾರೆ.

ಸಂಸತ್‌ ಭವನದ ಸೆಂಟ್ರಲ್‌ ಹಾಲ್‌ನಲ್ಲಿ ನಡೆದ ಎನ್‌ಡಿಎ ಸಂಸತ್‌ ಸದಸ್ಯರ ಸಭೆಯಲ್ಲಿ ಮಾತನಾಡಿದ ಅವರು, ಸರ್ಕಾರ ನಡೆಸಲು ಬಹುಮತ ಅವಶ್ಯಕತೆ ಇದೆ. ಇದು ಪ್ರಜಾಪ್ರಭುತ್ವ ನಿಯಮ. ಆದರೆ ದೇಶ ನಡೆಸಲು ಸರ್ವಾನುಮತ ಮುಖ್ಯ. ಸರ್ವಾನುಮತದಿಂದ ದೇಶವನ್ನು ಮುನ್ನಡೆಸುಕೊಂಡು ಹೋಗುತ್ತೇವೆ ಎಂದು ನಾನು ದೇಶದ ಜನರಿಗೆ ಭರವಸೆ ನೀಡುತ್ತೇನೆ ಎಂದು ಹೇಳಿದರು.

ನಿಮಗೆ ಎಷ್ಟು ಧನ್ಯವಾದ ಹೇಳಿದರೂ ಕಡಿಮೆಯೇ. ಎನ್‌ಡಿಎ 22 ರಾಜ್ಯಗಳಲ್ಲಿ ಸರ್ಕಾರ ನಡೆಸಲು ಜನರು ಆಶೀರ್ವಾದ ನೀಡಿದ್ದಾರೆ. ನಮ್ಮ ಮೈತ್ರಿ ಭಾರತದ ಆತ್ಮ ಎಂದು ಬಣ್ಣಿಸಿದರು.

ಎನ್‌ಡಿಎ ಒಕ್ಕೂಟ ರಚನೆಯಾಗಿ ಮೂರು ದಶಕಗಳಾಗಿದೆ. ಇಂತಹ ದೊಡ್ಡ ಪ್ರಜಾಪ್ರಭುತ್ವ ವ್ಯವಸ್ಥೆ, ವಿವಿಧತೆ ಇರುವ ದೇಶದಲ್ಲಿ ಸಾಮಾನ್ಯ ಮಾತಲ್ಲ. ಇದು ಅತ್ಯಂತ ಯಶಸ್ವಿ ಮೈತ್ರಿಯಾಗಿದೆ.  ನಾವು ಇದನ್ನು ಹೆಮ್ಮಯಿಂದ ಹೇಳಬಹುದು. ಮೂವತ್ತು ವರ್ಷದಲ್ಲಿ ಐದು ವರ್ಷಗಳ ಮೂರು ಅವಧಿ ಆಡಳಿತ ನಡೆಸಿದೆ. ನಾಲ್ಕನೇ ಬಾರಿಗೆ ಸರ್ಕಾರ ರಚಿಸಲು ಹೊರಟಿದೆ. ಎನ್‌ಡಿಎ ಕಾರ್ಯಕರ್ತರ ಶ್ರಮಕ್ಕೆ ಬೆಲೆ ಕಟ್ಟಲು ಸಾಧ್ಯವಿಲ್ಲ ಎಂದು ಹೇಳಿದರು.