ವಾಷಿಂಗ್ಟನ್: ಮೂರು ದೊಡ್ಡ ತಂತ್ರಜ್ಞಾನ ಕಂಪನಿಗಳಾದ ಗೂಗಲ್, ಆಪಲ್ ಹಾಗೂ ಮೈಕ್ರೋಸಾಫ್ಟ್ ಪಾಸ್ವರ್ಡ್ ಬಳಕೆಯನ್ನು ಸಂಪೂರ್ಣವಾಗಿ ತೆಗೆದು ಹಾಕಲು ನಿರ್ಧರಿಸಿವೆ.
ಹೌದು, ಇನ್ನು ಮುಂದೆ ಜನರು ತಮ್ಮ ಮೊಬೈಲ್, ಡೆಸ್ಕ್ ಟಾಪ್ ಹಾಗೂ ಬ್ರೌಸರ್ ಸಾಧನಗಳಲ್ಲಿ ಪಾಸ್ವರ್ಡ್ಗಳನ್ನು ನಮೂದಿಸುವ ಅಗತ್ಯವಿರುವುದಿಲ್ಲ. ಈ ಮೂರು ದೈತ್ಯ ತಂತ್ರಜ್ಞಾನ ಕಂಪನಿಗಳು ಒಟ್ಟಾಗಿ ಬಳಕೆದಾರರಿಗೆ ಪಾಸ್ವರ್ಡ್ ರಹಿತ ಸೇವೆ ನೀಡಲು ಮುಂದಾಗಿವೆ.
ಆಪಲ್, ಗೂಗಲ್ ಹಾಗೂ ಮೈಕ್ರೋಸಾಫ್ಟ್ ಮೂಲಕ ಕಾರ್ಯನಿರ್ವಹಿಸುವ ಐಒಎಸ್, ಮ್ಯಾಕ್ ಒಎಸ್, ಆಂಡ್ರಾಯ್ಡ್, ವಿಂಡೋಸ್ ಬ್ರೌಸರ್ಗಳಾದ ಕ್ರೋಮ್, ಎಡ್ಜ್, ಸಫಾರಿ ಹಾಗೂ ಪ್ರಮುಖ ತಂತ್ರಜ್ಞಾನ ಸಾಧನಗಳ ಪ್ಲಾಟ್ಫಾರ್ಮ್ಗಳಿಗೆ ಪಾಸ್ವರ್ಡ್ ರಹಿತ ದೃಢೀಕರಣ ತರುವ ನಿಟ್ಟಿನಲ್ಲಿ ಈ 3 ಕಂಪನಿಗಳು ಕಾರ್ಯನಿರ್ವಹಿಸುತ್ತಿವೆ. ಇದನ್ನೂ ಓದಿ: 2024ರಲ್ಲಿ ಶುಕ್ರಯಾನಕ್ಕೆ ISRO ಸಜ್ಜು- ಇಲ್ಲಿದೆ ಶುಕ್ರಗ್ರಹದ ಸ್ವಾರಸ್ಯಕರ ಸಂಗತಿ
ಬಳಕೆದಾರರ ಆನ್ಲೈನ್ ಖಾತೆಗಳಿಗೆ ಸೈನ್ ಇನ್ ಮಾಡಲು ತಯಾರಾಗುತ್ತಿರುವ ಪಾಸ್ವರ್ಡ್ ರಹಿತ ಸೇವೆ, ಪಾಸ್ವರ್ಡ್ ಮೂಲಕ ಅನ್ಲಾಕ್ ಮಾಡುವುದಕ್ಕಿಂತಲೂ ಸುಲಭ ಹಾಗೂ ಸುರಕ್ಷಿತವಾಗಿರಲಿದೆ. ನಿಮ್ಮ ಫೋನ್ ಅನ್ನು ಅನ್ಲಾಕ್ ಮಾಡಲು ನೀವು ಪಾಸ್ವರ್ಡ್, ಪಿನ್ ಅಥವಾ ಪ್ಯಾಟರ್ನ್ ಅನ್ನು ಬಳಸುತ್ತೀರಿ ಹಾಗೂ ಫೋನ್ ಅನ್ನು ಅನ್ಲಾಕ್ ಮಾಡಲು ಪ್ರತಿ ಬಾರಿಯೂ ಇದನ್ನೇ ಬಳಸುತ್ತೀರಿ. ನಿಮ್ಮ ಆನ್ಲೈನ್ ಖಾತೆಗಳಿಗೂ ಅನುಮತಿಸಲು ಇದೇ ಪ್ರಕ್ರಿಯೆಯನ್ನು ಬಳಸಿದರೆ ಆಯ್ತು. ಪಾಸ್ವರ್ಡ್ ನಮೂದಿಸುವ ಅಗತ್ಯ ಇರುವುದಿಲ್ಲ.
ಈ 3 ಕಂಪನಿಗಳು ಕಾರ್ಯನಿರ್ವಹಿಸುತ್ತಿರುವ ಹೊಸ ಎಫ್ಐಡಿಒ(ಫಾಸ್ಟ್ ಐಡಿ ಆನ್ಲೈನ್) ಸೇವೆ ಸಹಾಯದಿಂದ ಪಾಸ್ವರ್ಡ್ ರಹಿತವಾಗಿ ಅನ್ಲಾಕ್ ಮಾಡಲು ಸಹಾಯವಾಗಲಿದೆ ಎಂದು ಕಂಪನಿಗಳು ತಿಳಿಸಿವೆ. ಇದನ್ನು ಪಾಸ್ಕೀ ಎಂತಲೂ ಕರೆಯಲಾಗುತ್ತಿದ್ದು, ಬಳಕೆದಾರರು ತಮ್ಮ ಮೊಬೈಲ್ ಹಾಗೂ ವೆಬ್ಸೈಟ್ಗಳಲ್ಲಿ ಪಾಸ್ವರ್ಡ್ ರಹಿತವಾಗಿ ಸೈನ್ ಇನ್ ಆಗಲು ಸಹಾಯವಾಗಲಿದೆ. ಇದನ್ನೂ ಓದಿ: ಭಾರತದಲ್ಲಿ ಡೆಬಿಟ್, ಕ್ರೆಡಿಟ್ ಕಾರ್ಡ್ ಮೂಲಕದ ಪಾವತಿಯನ್ನು ಸ್ಥಗಿತಗೊಳಿಸಿದ ಆಪಲ್
ಪಾಸ್ಕೀ ಸಹಾಯದಿಂದ ಬಳಕೆದಾರರು ಇನ್ನು ಮುಂದೆ ತಮ್ಮ ಪಾಸ್ವರ್ಡ್ಗಳನ್ನು ನೆನಪಿಟ್ಟುಕೊಳ್ಳುವ ಅಗತ್ಯ ಇರುವುದಿಲ್ಲ. ಕೆಲವರು ಪಾಸ್ವರ್ಡ್ಗಳನ್ನು ನೆನಪಿಟ್ಟುಕೊಳ್ಳಬೇಕೆಂಬ ಕಾರಣಕ್ಕೆ ತಮ್ಮ ಹಲವಾರು ಬೇರೆ ಬೇರೆ ರೀತಿಯ ಸಾಮಾಜಿಕ ಮಾಧ್ಯಮ ಅಕೌಂಟ್ಗಳಿಕೆ ಒಂದೇ ರೀತಿಯ ಪಾಸ್ವರ್ಡ್ ಬಳಸುತ್ತಾರೆ. ಈ ಕಾರಣದಿಂದ ಹ್ಯಾಕರ್ಗಳು ಸುಲಭವಾಗಿ ಬಳಕೆದಾರರ ಖಾತೆಗಳನ್ನು ಹ್ಯಾಕ್ ಮಾಡುತ್ತಾರೆ. ಆದರೆ ಪಾಸ್ಕೀ ಇಂತಹ ಅಪಾಯಗಳನ್ನು ಕಡಿಮೆ ಮಾಡುತ್ತದೆ ಎಂದು ಕಂಪನಿಗಳು ತಿಳಿಸಿವೆ.
ಈ ಹೊಸ ಪಾಸ್ವರ್ಡ್ ರಹಿತ ದೃಢೀಕರಣ ವ್ಯವಸ್ಥೆಯನ್ನು ಆಪಲ್, ಗೂಗಲ್ ಹಾಗೂ ಮೈಕ್ರೋಸಾಫ್ಟ್ ಮುಂದಿನ ವರ್ಷ ಹೊರತರಲಿದೆ. ಒಂದುವೇಳೆ ನಿಮ್ಮ ಫೋನ್ ಅಥವಾ ಇತರ ಸಾಧನಗಳು ಕಳೆದು ಹೋದಲ್ಲಿ ಕ್ಲೌಡ್ ಬ್ಯಾಕ್ಅಪ್ ಮೂಲಕ ಪಾಸ್ಕೀಗಳನ್ನು ಹೊಸ ಸಾಧನಗಳಿಗೆ ಸಿಂಕ್ ಮಾಡಬಹುದು ಎಂದು ಗೂಗಲ್ ತಿಳಿಸಿದೆ.