ಸ್ಯಾಂಡಲ್ ವುಡ್ ಕ್ವೀನ್ ರಮ್ಯಾ ಅವರು ಮತ್ತೆ ಸಿನಿಮಾ ರಂಗಕ್ಕೆ ಬರುವ ಕುರಿತು ಹಲವು ತಿಂಗಳಿಂದ ಚರ್ಚೆ ನಡೆಯುತ್ತಿದೆ. ಅಂದುಕೊಂಡಂತೆ ಆಗಿದ್ದರೆ, ಪುನೀತ್ ರಾಜ್ ಕುಮಾರ್ ಅವರ ಜೊತೆಯೇ ಸಿನಿಮಾ ರಂಗಕ್ಕೆ ರಮ್ಯಾ ವಾಪಸ್ಸಾಗಬೇಕಿತ್ತು. ಈ ಕುರಿತು ರಮ್ಯಾ ಮತ್ತು ಪುನೀತ್ ರಾಜ್ ಕುಮಾರ್ ಮಾತುಕತೆ ಆಡಿಯೂ ಆಗಿತ್ತು. ಆದರೆ, ವಿಧಿ ಅದಕ್ಕೆ ಅವಕಾಶ ಕೊಡದೇ ಅಪ್ಪು ಅವರನ್ನು ಕರೆದುಕೊಂಡುಬಿಟ್ಟ. ಹಾಗಾಗಿ ರಮ್ಯಾ ಕನಸು ಕನಸಾಗಿಯೇ ಉಳಿಯಿತು.
ಸಿನಿಮಾ ರಂಗಕ್ಕೆ ರಮ್ಯಾ ವಾಪಸ್ಸಾಗಬೇಕು ಎನ್ನುವುದು ಪುನೀತ್ ರಾಜ್ ಕುಮಾರ್ ಕನಸಾಗಿತ್ತು. ಅದನ್ನು ನನಸು ಮಾಡುವುದಕ್ಕಾಗಿ ಮತ್ತೆ ರಮ್ಯಾ ವಾಪಸ್ಸಾಗುತ್ತಿದ್ದಾರೆ. ಆದರೆ, ಯಾವ ಸಿನಿಮಾದ ಮೂಲಕ ಎನ್ನುವುದೇ ಸಸ್ಪನ್ಸ್. ಇತ್ತೀಚೆಗಂತೂ ಸಿನಿಮಾ ಸಂಬಂಧಿ ಅನೇಕ ಚಟುವಟಿಕೆಗಳಲ್ಲಿ ಅವರು ತೊಡಗಿಕೊಂಡಿದ್ದಾರೆ. ಹೊಸ ಕಲಾವಿದರ, ತಂತ್ರಜ್ಞರ ಸಿನಿಮಾಗಳಿಗೆ ವಿಶ್ ಮಾಡುತ್ತಿದ್ದಾರೆ. ತಮ್ಮ ಕೈಲಾದಷ್ಟು ಪ್ರಚಾರ ಕೂಡ ಮಾಡುತ್ತಿದ್ದಾರೆ. ಹಾಗಾಗಿ ಸಿನಿಮಾ ರಂಗಕ್ಕೆ ಅವರು ವಾಪಸ್ಸು ಬರುವುದು ಪಕ್ಕಾ ಆಗಿದೆ. ಇದನ್ನೂ ಓದಿ:Breaking-ಬಿಗ್ ಬಾಸ್ ಸೀಸನ್ 8 ಶೂಟಿಂಗ್ ಶುರು: ಪ್ರೊಮೋ ಚಿತ್ರೀಕರಣದಲ್ಲಿ ಸುದೀಪ್ ಭಾಗಿ
ಮೊನ್ನೆಯಷ್ಟೇ ಹೊಂಬಾಳೆ ಫಿಲ್ಮ್ಸ್ ಬ್ಯಾನರ್ ನಲ್ಲಿ ನಿರ್ಮಾಣವಾಗುತ್ತಿರುವ ಹೊಯ್ಸಳ ಸಿನಿಮಾದ ಶೂಟಿಂಗ್ ಸೆಟ್ ಗೂ ಹೋಗಿದ್ದ ರಮ್ಯಾ, ಕೆಲ ಹೊತ್ತು ಅಲ್ಲಿ ಕಳೆದಿದ್ದಾರೆ. ಮತ್ತಷ್ಟು ಇದೇ ಬ್ಯಾನರ್ ನಲ್ಲಿ ಸಿನಿಮಾ ಮಾಡುವ ಮಾತುಕತೆಯನ್ನೂ ಆಡಿದ್ದಾರೆ ಎನ್ನಲಾಗುತ್ತಿದೆ. ಹಾಗಾಗಿ ಇದೇ ಬ್ಯಾನರ್ ಮೂಲಕವೇ ರಮ್ಯಾ ಸ್ಯಾಂಡಲ್ ವುಡ್ ಗೆ ವಾಪಸ್ಸಾಗಲಿದ್ದಾರೆ ಎನ್ನುವ ಸುದ್ದಿ ದಟ್ಟವಾಗಿದೆ. ಪುನೀತ್ ಕನಸನ್ನು ಇದೇ ಬ್ಯಾನರ್ ಮೂಲಕ ನನಸಾಗಿಸಲಿದ್ದಾರೆ ಎಂದು ಹೇಳಲಾಗುತ್ತಿದೆ.
