ಮ್ಯಾಂಗೋ ಪರೋಟಾ. ಇದು ಹೆಸರು ಕೇಳಿದ ತಕ್ಷಣ ಬಾಯಲ್ಲಿ ನೀರೂರಿಸುವಂತಹ ಒಂದು ಸ್ಪೆಷಲ್ ತಿಂಡಿ. ಮಾವಿನ ಹಣ್ಣಿನ ಸೀಸನ್‌ನಲ್ಲಿ, ಈ ರುಚಿಕರವಾದ ಪರೋಟಾವನ್ನು (Mango Paratha) ತಯಾರಿಸಿ ಸವಿಯುವುದು ಒಂದು ಹಬ್ಬದೂಟವೇ ಸೈ! ಈ ಸ್ಪೆಷಲ್ ಮ್ಯಾಂಗೋ ಪರೋಟಾ (Mango Paratha Recipe) ಮಾಡಲು ಬೇಕಾಗುವ ಸಾಮಗ್ರಿಗಳು ಮತ್ತು ವಿಧಾನವನ್ನು ತಿಳಿದುಕೊಳ್ಳೋಣ.
ಮ್ಯಾಂಗೋ ಪರೋಟಾ ತಯಾರಿಸಲು ಬೇಕಾಗುವ ಸಾಮಗ್ರಿಗಳು
• ಗೋಧಿ ಹಿಟ್ಟು – 2 ಕಪ್
• ಉಪ್ಪು – 1/2 ಚಮಚ
• ಎಣ್ಣೆ ಅಥವಾ ತುಪ್ಪ – 1 ಚಮಚ
• ನೀರು – ಅಗತ್ಯಕ್ಕೆ ತಕ್ಕಷ್ಟು (ಹಿಟ್ಟು ಕಲಸಲು)
• ಮ್ಯಾಂಗೋ (ಮಾವಿನ ಹಣ್ಣಿನ ತಿರುಳು) – 1 ಕಪ್
• ಸಕ್ಕರೆ – 2 ರಿಂದ 3 ಚಮಚ
• ಏಲಕ್ಕಿ ಪುಡಿ – 1/2 ಚಮಚ
• ಸೋಂಪು – 1/2 ಚಮಚ
• ತುಪ್ಪ ಅಥವಾ ಎಣ್ಣೆ – ಪರೋಟಾ ಬೇಯಿಸಲು
ಮಾಡುವ ವಿಧಾನ
ಮೊದಲಿಗೆ ಪರೋಟಾ ಹಿಟ್ಟು ತಯಾರಿಸೋಣ. ಒಂದು ದೊಡ್ಡ ಪಾತ್ರೆಯಲ್ಲಿ ಗೋಧಿ ಹಿಟ್ಟು ಮತ್ತು ಉಪ್ಪು ಮಿಕ್ಸ್ ಮಾಡಿ. ಇದಕ್ಕೆ 1 ಚಮಚ ಎಣ್ಣೆ ಅಥವಾ ತುಪ್ಪ ಹಾಕಿ. ಹಿಟ್ಟು ಮೃದುವಾಗುವವರೆಗೆ ಚೆನ್ನಾಗಿ ಮಿಕ್ಸ್ ಮಾಡಬೇಕು. ಸ್ವಲ್ಪ ಸ್ವಲ್ಪ ನೀರು ಸೇರಿಸುತ್ತಾ, ಮೃದುವಾದ ಹಿಟ್ಟನ್ನು ಕಲಸಿಕೊಳ್ಳಬೇಕು. ಹಿಟ್ಟು ತುಂಬಾ ಗಟ್ಟಿಯಾಗಿಯೂ ಇರಬಾರದು ಮತ್ತು ತುಂಬಾ ಸಡಿಲವಾಗಿಯೂ ಇರಬಾರದು. ಈಗ ಹಿಟ್ಟನ್ನು ಮುಚ್ಚಿ 15 ರಿಂದ 20 ನಿಮಿಷಗಳ ಕಾಲ ನೆನೆಯಲು ಬಿಡಬೇಕು.
ಈಗ ಮಾವಿನಕಾಯಿ ಸ್ಟಫಿಂಗ್ ತಯಾರಿಸಿಕೊಳ್ಳಿ. ಒಂದು ಬಾಣಲೆಯಲ್ಲಿ ಮಾವಿನ ಹಣ್ಣಿನ ತಿರುಳನ್ನು ತೆಗೆದುಕೊಳ್ಳಿ. ಅದಕ್ಕೆ ಸಕ್ಕರೆ ಮತ್ತು ಏಲಕ್ಕಿ ಪುಡಿ ಹಾಕಿ. ಮಧ್ಯಮ ಉರಿಯಲ್ಲಿ, ಮಿಶ್ರಣವು ಗಟ್ಟಿಯಾಗುವವರೆಗೆ ಮತ್ತು ಅದರ ಎಲ್ಲಾ ನೀರು ಆವಿಯಾಗುವವರೆಗೆ ಸ್ವಲ್ಪ ಕಾಲ ಬೆರೆಸಿ. ಅದು ಜಾಮ್‌ನಂತಿರಬೇಕು. ಬಳಿಕ ಮಿಶ್ರಣವನ್ನು ತಣ್ಣಗಾಗಲು ಬಿಡಿ. ತಣ್ಣಗಾದ ನಂತರ, ಅದು ಇನ್ನಷ್ಟು ಗಟ್ಟಿಯಾಗುತ್ತದೆ.
ಬಳಿಕ ಪರೋಟಾ ಮಾಡಿ. ಕಲಸಿದ ಹಿಟ್ಟಿನಿಂದ ನಿಂಬೆಹಣ್ಣಿನ ಗಾತ್ರದ ಉಂಡೆ ತೆಗೆದುಕೊಂಡು ಸ್ವಲ್ಪ ಲಟ್ಟಿಸಿ. ಲಟ್ಟಿಸಿದ ಉಂಡೆಯ ಮಧ್ಯದಲ್ಲಿ 1 ರಿಂದ 2 ಚಮಚ ತಯಾರಿಸಿದ ಮ್ಯಾಂಗೋ ಸ್ಟಫಿಂಗ್ ಅನ್ನು ಹಾಕಿ. ಬಳಿಕ, ಉಂಡೆಯನ್ನು ಎಲ್ಲಾ ಕಡೆಗಳಿಂದ ಮೇಲಕ್ಕೆತ್ತಿ, ಸ್ಟಫಿಂಗ್ ಅನ್ನು ಚೆನ್ನಾಗಿ ಮುಚ್ಚಿ. ಅಂದರೆ, ನೀವು ಆಲೂ ಪರೋಟದಲ್ಲಿ ಮಾಡುವಂತೆ. ಸ್ವಲ್ಪ ಒಣ ಹಿಟ್ಟನ್ನು ಬಳಸಿಕೊಂಡು, ಲಘುವಾಗಿ ಒತ್ತಿ. ದುಂಡಗೆ ಪರೋಟಾದ ಆಕಾರಕ್ಕೆ ಲಟ್ಟಿಸಿ. ಸ್ಟಫಿಂಗ್ ಹೊರಗೆ ಬರದಂತೆ ನೋಡಿಕೊಳ್ಳಿ.
ಈಗ ಪರೋಟಾ ಬೇಯಿಸಲು ಪ್ರಾರಂಭಿಸಿ. ಒಂದು ತವಾವನ್ನು ಬಿಸಿ ಮಾಡಿ. ಲಟ್ಟಿಸಿದ ಪರೋಟಾವನ್ನು ಬಿಸಿ ತವದ ಮೇಲೆ ಹಾಕಿ. ಒಂದು ಕಡೆ ಸ್ವಲ್ಪ ಬೆಂದ ಮೇಲೆ, ಅದನ್ನು ತಿರುಗಿಸಿ. ಎರಡೂ ಕಡೆ ಸ್ವಲ್ಪ ತುಪ್ಪ ಅಥವಾ ಎಣ್ಣೆ ಹಾಕಿ, ಗೋಲ್ಡೆನ್‌ ಕಲರ್ ಬರುವವರೆಗೆ ಬೇಯಿಸಿ. ಪರೋಟಾ ಉಬ್ಬಲು ಪ್ರಾರಂಭವಾಗುತ್ತದೆ. ಆಗ ಪರೋಟಾವನ್ನು ತೆಗೆಯಿರಿ. ಇಷ್ಟು ಮಾಡಿದರೆ ಸಾಕು, ಮ್ಯಾಂಗೋ ಪರೋಟಾ ಸವಿಯಲು ತಯಾರಾಗುತ್ತದೆ.
