Connect with us

Districts

ಸಮುದ್ರದಲ್ಲಿ ಸಿಕ್ತು ಅಪರೂಪದ ಕಾಯಿನ್ ಮೀನು!

Published

on

ಕಾರವಾರ: ಸಮುದ್ರದ ತಳದಲ್ಲಿ ವಾಸ ಮಾಡುವ ಅಪರೂಪದ ಜಲಚರ ಕಾಯಿನ್ ಮೀನು ಅಥವಾ ಸ್ಯಾಂಡ್ ಡಾಲರ್ ಮೀನು ಕಾರವಾರದ ರವೀಂದ್ರನಾಥ ಟಾಗೋರ್ ಬೀಚ್‍ನಲ್ಲಿ ಕಾಣಿಸಿಕೊಳ್ಳುವ ಮೂಲಕ ಜನರ ಆಕರ್ಷಣೆಯ ಜೊತೆಗೆ ಸಮುದ್ರ ಅಧ್ಯಯನಕಾರರ ಕುತೂಹಲಕ್ಕೆ ಕಾರಣವಾಗಿದೆ.

ಕಾರವಾರ ನಗರದ ರವೀಂದ್ರನಾಥ ಕಡಲ ತೀರದ ಮರಳಿನಲ್ಲಿ ಹತ್ತಾರು ಸಂಖ್ಯೆಯಲ್ಲಿ ಈ ಅಪರೂಪದ ಫಿಶ್ ಕಂಡುಬಂದಿದೆ. ನಕ್ಷತ್ರದ ಮೀನಿನ ಪ್ರಬೇಧಕ್ಕೆ ಸೇರಿದ ಇವುಗಳಿಗೆ ವೈಜ್ಞಾನಿಕವಾಗಿ ಕ್ಲಾಯಪೇಸ್ಟರ್ ರಾರಿಸ್ಪಯನಸ್ ಎಂದು ಕರೆಯಲಾಗುತ್ತದೆ. ಆಭರಣದಲ್ಲಿ ಅಳವಡಿಸುವ ಡಾಲರ್ ಮಾದರಿಯಲ್ಲಿಯೇ ಇವುಗಳ ದೇಹ ರಚನೆಯಿದೆ. ಇವು ಕಡಲಿನ ತಳದಲ್ಲಿರುವ 14 ರಿಂದ 15 ಮೀಟರ್ ಆಳದ ಮರಳುನಲ್ಲಿ ವಾಸ ಮಾಡುತ್ತವೆ. ಹಾಗಾಗಿ ಇವುಗಳು ಸ್ಯಾಂಡ್ ಡಾಲರ್ ಎಂದು ಪರಿಚಿತವಾಗಿದೆ.

ಸಮುದ್ರ ಸಂಶೋಧಕರು ಹೇಳುವುದು ಏನು?:
ಕರ್ನಾಟಕ ವಿಶ್ವ ವಿದ್ಯಾನಿಲಯದ ಮರಿನ್ ಬಯಾಲಜಿ ಪ್ರೊಪೇಸರ್ ಡಾ. ಶಿವಕುಮಾರ್ ಹರಿಗಿಯವರು ಹೇಳುವಂತೆ ಕಾರವಾರದ ಕಡಲತೀರದಲ್ಲಿ ಇವುಗಳನ್ನು ಕಂಡಿರಲಿಲ್ಲ. ಅರಬ್ಬಿ ಸಮುದ್ರದಲ್ಲಿ ದೇಶದ ಕರಾವಳಿ ಉದ್ದಕ್ಕೂ ಇವು ವಾಸಿಸುತ್ತವೆ. ಇದನ್ನೂ ಓದಿ: ಮೀನುಗಾರರ ಬಲೆಗೆ ಬಿತ್ತು ಚಪ್ಪಲಿ ಮೀನು – ಅಪರೂಪದ ಈ ಮೀನಿನ ವಿಶೇಷವೇನು ಗೊತ್ತಾ?

ರಾಜ್ಯದ ಕರಾವಳಿಯಲ್ಲಿ ಮೊದಲ ಬಾರಿಗೆ 2006ರಲ್ಲಿ ಭಟ್ಕಳ ಮತ್ತು ಮಂಗಳೂರಿನಲ್ಲಿ ಕಾಣಿಸಿಕೊಂಡಿದ್ದವು. ಉಳಿದಂತೆ ದಕ್ಷಿಣ ಆಫ್ರಿಕ, ನ್ಯೂಜಿಲೆಂಡ್, ಸ್ಪೇನ್ ಪೋರ್ಚುಗಲ್ ಮುಂತಾದ ದೇಶದ ಕರಾವಳಿಯಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿವೆ ಎಂದು ವಿವರಿಸಿದರು. ಇವು ಪರಿಸರದ ಬದಲಾವಣೆ ಯಿಂದಲೂ ಅಥವಾ ಮೀನುಗಾರರು ಬೀಸಿದ ಬಲೆಗೆ ಸಿಕ್ಕಿರಬಹುದು ಹಾಗಾಗಿ ಕಾರವಾರ ಕಡಲತೀರದಲ್ಲಿ ಕಾಣಿಸಿಕೊಂಡಿದೆ ಎನ್ನುತ್ತಾರೆ.

ವಿಶೇಷವೇನು?:
ಕರ್ನಾಟಕ ಕರಾವಳಿ ಭಾಗದಲ್ಲಿ ಅಪರೂಪದ್ದಾಗಿದೆ. ಇದರ ವಾಸ ಸಮುದ್ರದಾಳದ ಮರಳುಗಳು. ಇವುಗಳ ಮೇಲ್ಮೈ ಸ್ಪಲ್ಪ ಗಟ್ಟಿಯಾಗಿದ್ದು ದೇಹದ ರಕ್ಷಣೆಗಾಗಿ ಸುತ್ತಲೂ ಚಿಕ್ಕ ಮುಳ್ಳುಗಳಿರುತ್ತವೆ. ಮರಳಿನ ಬಣ್ಣವನ್ನೇ ಇವುಗಳು ಹೊಂದಿರುವುದರಿಂದ ಸುಲಭವಾಗಿ ಗುರುತಿಸುವುದು ಕಷ್ಟ .ಆದರೆ ಬಹುತೇಕ ಎಲ್ಲಾ ಮೀನುಗಳು ಮತ್ತು ದೊಡ್ಡ ಜಾತಿಯ ಸಮುದ್ರ ಏಡಿಗಳು ಇವುಗಳನ್ನು ಭೇಟೆಯಾಡಿ ತಿನ್ನುತ್ತವೆ. ಸ್ಯಾಂಡ್ ಡಾಲರ್ ಗಳಿಗೆ ಲಾರ್ವ, ಸೆಟ್ಟೆ ಮೀನುನ ಸಣ್ಣ ಮರಿಗಳು, ಆಲ್ಗೆ ಮುಂತಾದವೇ ಇವುಗಳ ಆಹಾರವಾಗಿದೆ. ಇದನ್ನೂ ಓದಿ: ನೇತ್ರಾಣಿ ಸಮುದ್ರ ಭಾಗದಲ್ಲಿ ಅಪರೂಪದ ಸ್ಪ್ಯಾನರ್ ಕ್ರಾಬ್ ಪತ್ತೆ

2 ರೂ. ಕಾಯಿನ್‍ನಂತಿರುವ ಈ ಮೀನುಗಳನ್ನು ನಾಣ್ಯದ ಮೀನು, ಡಾಲರ್ ಮೀನು ಎಂದು ಸ್ಥಳೀಯರು ಕರೆಯುತ್ತಾರೆ. ಸ್ಟಾರ್ ಫಿಶ್ ಪ್ರಬೇದದ ಮೀನು ಇದಾಗಿದ್ದು ಆಹಾರದಲ್ಲಿ ಬಳಕೆ ಇಲ್ಲ. ವಿಶ್ವದಲ್ಲಿ 600 ಜಾತಿಯ ಪ್ರಬೇಧದ ಡಾಲರ್ ಮೀನುಗಳಿದ್ದು ಭಾರತದಲ್ಲಿ ಗುಜರಾತ್, ಕೇರಳದಲ್ಲಿ ಮೂರು ಪ್ರಬೇಧಗಳು ಮಾತ್ರ ಕಾಣಸಿಗುತ್ತವೆ.

ಕಡಲಿನಲ್ಲಿ ಹವಾಮಾನ ಬದಲಾವಣೆಯಿಂದಾಗಿ ಈಗ ಕರ್ನಾಟಕದ ಕರಾವಳಿ ಭಾಗದಲ್ಲಿ ಸಹ ಗೋಚರವಾಗುತಿದ್ದು, ಅಪರೂಪದ ಮೀನುಗಳಲ್ಲಿ ಒಂದಾಗಿದೆ.

Click to comment

Leave a Reply

Your email address will not be published. Required fields are marked *