ಮತ್ತೆ ಬರ್ತಿದೆ ರಂಗಿತರಂಗ ಜೋಡಿ- ಇದು ಅವರ ಕಥೆಯಲ್ಲ, ನನ್ನ ಕಥೆ ಅಂತಿದೆ ರಾಜರಥ ನೋಡಿ

ಬೆಂಗಳೂರು: ರಂಗಿತರಂಗ ಖ್ಯಾತಿಯ ಅನೂಪ್ ಭಂಡಾರಿ ನಿರ್ದೇಶನದ ರಾಜರಥ ಚಿತ್ರದ ಟ್ರೇಲರ್ ರಿಲೀಸ್ ಆಗಿದೆ.

ಒಂದಾನೊಂದು ಊರಲ್ಲಿ, ಒಂದಾನೊಂದು ಕಾಲೇಜಲ್ಲಿ ಒಬ್ಬ ಸುಂದರವಾಗಿ ಹುಡುಗಿ ಇದ್ಳು. ಅವ್ಳಿಗೆ ಒಬ್ಬ ಹೀರೋ ಇದ್ದ. ಆದ್ರೆ ಇವ್ನು ಹೀರೋ ಅಲ್ಲ ಅಂತ ಪವರ್ ಸ್ಟಾರ್ ಪುನೀತ್ ರಾಜ್‍ಕುಮಾರ್ ಧ್ವನಿಯಲ್ಲಿ ಟ್ರೇಲರ್ ಆರಂಭವಾಗುತ್ತೆ. ಮುಂದೆ ಪುನೀತ್ ಪಾತ್ರಗಳ ಪರಿಚಯ ಮಾಡಿಸ್ತಾರೆ. ಇದು ಇವರ ಕಥೆಯಲ್ಲ, ನನ್ನ ಕಥೆ. ನನ್ನ ಹೆಸರು ರಾಜರಥ ಅಂತ ಟ್ರೇಲರ್ ಅಂತ್ಯವಾಗುತ್ತೆ ಟ್ರೇಲರ್ ನಿಂದಲೇ ಚಿತ್ರದ ಕಥೆ ಬಗ್ಗೆ ನಿರೀಕ್ಷೆ ಹುಟ್ಟಿಸಿದೆ.

ಕನ್ನಡ ಮತ್ತು ತೆಲುಗು ಭಾಷೆಯಲ್ಲಿ ಚಿತ್ರೀಕರಣವಾದ ರಾಜರಥಕ್ಕೆ ತೆಲುಗಿನಲ್ಲಿ ರಾಣಾ ದಗ್ಗುಬಾಟಿ ಬ್ಯಾಗ್ರೌಂಡ್ ಧ್ವನಿ ನೀಡಿದ್ದಾರೆ. ಈ ಚಿತ್ರದ ಟ್ರೇಲರ್ ನಲ್ಲಿ ಪುನೀತ್ ರಾಜ್‍ಕುಮಾರ್ ಅವರ ಧ್ವನಿ ಆಕರ್ಷಣೀಯವಾಗಿದೆ.

ಈ ಚಿತ್ರದಲ್ಲಿ ಅನೂಪ್ ಭಂಡಾರಿ ಅವರ ತಮ್ಮ ನಿರೂಪ್ ಭಂಡಾರಿ ನಾಯಕನಾಗಿದ್ದು, ತಮಿಳು ನಟ ಆರ್ಯ ಪ್ರಮುಖ ಪಾತ್ರದಲ್ಲಿ ಅಭಿನಯಿಸಿದ್ದಾರೆ. ನಿರೂಪ್ ಭಂಡಾರಿಗೆ ನಾಯಕಿಯಾಗಿ ಅವಂತಿಕಾ ಶೆಟ್ಟಿ ಅಭಿನಯಿಸಿದ್ದಾರೆ. ರವಿಶಂಕರ್ ಕೂಡ ಈ ಚಿತ್ರದಲ್ಲಿ ನಟಿಸಿದ್ದು, ಹಾಸ್ಯನಟನಾಗಿ ಕಾಣಿಸಿಕೊಂಡಿದ್ದಾರೆ.