Latest
ವಾರದಲ್ಲಿ ತಲಾ 3 ದಿನ ಪತಿಯೊಂದಿಗೆ ಇರಲು ಇಬ್ಬರು ಪತ್ನಿಯರ ಒಪ್ಪಂದ
– ಪತಿಗೆ ವಾರದಲ್ಲಿ ಒಂದು ದಿನದ ರಜೆ
ರಾಂಚಿ: ಜಾರ್ಖಂಡ್ ರಾಜಧಾನಿ ರಾಂಚಿಯ ಸದರ್ ಪೊಲೀಸ್ ಠಾಣೆಯಲ್ಲಿ ಶನಿವಾರ ಒಂದು ವಿಚಿತ್ರ ಪ್ರಕರಣ ಬೆಳಕಿಗೆ ಬಂದಿದೆ. ಇಬ್ಬರು ಪತ್ನಿಯರು ಪತಿಯನ್ನು ವಾರದಲ್ಲಿ ಮೂರು ದಿನಗಳಂತೆ ವಿಭಜಿಸಿಕೊಂಡಿದ್ದಾರೆ.
ರಾಂಚಿಯ ರಾಜೇಶ್ ಕುಮಾರ್ ಇಬ್ಬರು ಮಹಿಳೆಯರನ್ನು ಮದುವೆಯಾಗಿದ್ದ. ಹೀಗಾಗಿ ಪತಿ ರಾಜೇಶ್ ಇಬ್ಬರ ಬಳಿಯು ತಲಾ ಮೂರು ದಿನ ಇರುವುದಾಗಿ ಒಪ್ಪಂದ ಮಾಡಿಕೊಂಡಿದ್ದ. ಆದರೆ ಶನಿವಾರ ಆತನ ಎರಡನೇ ಪತ್ನಿ ಸದರ್ ಪೊಲೀಸ್ ಠಾಣೆಗೆ ಹೋಗಿ, ನನ್ನ ಪತಿ ಐದು ದಿನಗಳಿಂದ ಮನೆಗೆ ಬಂದಿಲ್ಲ. ಅವನು ತನ್ನ ಮೊದಲ ಪತ್ನಿಯೊಂದಿಗೆ ವಾಸಿಸುತ್ತಿದ್ದಾನೆ ಎಂದು ದೂರಿದ್ದಳು.
ಮಹಿಳೆ ದೂರಿನಿಂದ ಪೊಲೀಸರು ಕೂಡ ತೊಂದರೆಗೆ ಸಿಲುಕಿದರು. ಹೀಗಾಗಿ ಪ್ರಕರಣ ದಾಖಲಿಸಿಕೊಳ್ಳದೆ ಪೊಲೀಸರು ಪತಿ ರಾಜೇಶ್ ಕುಮಾರ್ ನನ್ನು ಠಾಣೆಗೆ ಕರೆತಂದು ವಿಚಾರಣೆ ನಡೆಸಿದರು. ಈ ವೇಳೆ ಪತ್ನಿಯರ ವಾದ ಆಲಿಸಿದ ಪೊಲೀಸರು ಕಂಗಾಲಾದರು.
ಪತಿಯೊಂದಿಗೆ ವಾಸಿಸಲು ತಲಾ ಮೂರು ದಿನವನ್ನು ವಿಂಗಡಿಸಿಕೊಂಡಿದ್ದೇವೆ. ಅದರಂತೆ ಪತಿಯು ವಾರದಲ್ಲಿ ಮೂರು ದಿನಗಳು ಮೊದಲ ಪತ್ನಿಯೊಂದಿಗೆ ಮತ್ತು ಮೂರು ದಿನ ಎರಡನೇ ಪತ್ನಿಯೊಂದಿಗೆ ಪತಿ ಇರಬೇಕು. ಜೊತೆಗೆ ವಾರದಲ್ಲಿ ಒಂದು ದಿನ ಆತನಿಗೆ ರಜೆ ನೀಡಲಾಗಿದೆ ಎಂದು ಪತ್ನಿಯರು ಪೊಲೀಸರ ಮುಂದೆ ಹೇಳಿಕೊಂಡಿದ್ದಾರೆ.
ಆದರೆ, ಪತಿ ಮೊದಲ ಹೆಂಡತಿಯೊಂದಿಗೆ ಐದು ದಿನಗಳ ಕಾಲ ಇದ್ದರಿಂದ, ಎರಡನೇ ಪತ್ನಿ ಪೊಲೀಸರಿಗೆ ದೂರು ನೀಡಿದ್ದಾಳೆ. ಇದನ್ನು ಆಲಿಸಿದ ಪೊಲೀಸರು ಹೊಂದಾಣಿಕೆಯಿಂದ ಬಾಳಿ ಎಂದು ಪೊಲೀಸರು ದಂಪತಿಗೆ ಹೇಳಿ ಕಳಿಸಿದ್ದಾರೆ.
