ಪುನೀತ್ ರಾಜ್‌ಕುಮಾರ್ (Puneeth Rajkumar) 50ನೇ ಹುಟ್ಟುಹಬ್ಬದ ಹಿನ್ನೆಲೆ ‘ಅಪ್ಪು’ (Appu) ರೀ-ರಿಲೀಸ್ ಆಗಿದೆ. ಹಾಗಾಗಿ ರಾಘವೇಂದ್ರ ರಾಜ್‌ಕುಮಾರ್ ಕುಟುಂಬ ಚಿತ್ರಮಂದಿರಕ್ಕೆ ಆಗಮಿಸಿ ‘ಅಪ್ಪು’ ಚಿತ್ರ ವೀಕ್ಷಿಸಿದ್ದಾರೆ. ಈ ವೇಳೆ, ಸಿನಿಮಾ ನೋಡಿ ಅಪ್ಪು ವಾಪಸ್ ಬಂದು ಬಿಡುತ್ತಾನೋ ಅನಸ್ತು ಎಂದು ಸಹೋದರನನ್ನು ನೆನೆದು ರಾಘಣ್ಣ ಭಾವುಕರಾಗಿದ್ದಾರೆ.
‘ಅಪ್ಪು’ ಸಿನಿಮಾ ವೀಕ್ಷಿಸಿದ ಬಳಿಕ ಮಾಧ್ಯಮಕ್ಕೆ ರಾಘಣ್ಣ (Raghavendra Rajkumar) ಮಾತನಾಡಿ, ಅಭಿಮಾನಿಗಳ ಜಾತ್ರೆ ನೋಡಿದ್ರೆ ಒಂದು ಕಡೆ ನೋವಾಗುತ್ತದೆ, ಇನ್ನೊಂದು ಕಡೆ ಖುಷಿಯಾಗುತ್ತದೆ. ‘ಅಪ್ಪು’ ಸಿನಿಮಾ ರಿಲೀಸ್ ಆದ ಆ ದಿನಕ್ಕೆ ನಾವು ಹೋಗಬಾರದು. ಆಗ ಅಪ್ಪಾಜಿ, ಅಮ್ಮ, ಅಪ್ಪು ಇದ್ದರು. ಆ ದಿನಗಳು ನೆನಪಾಗುತ್ತದೆ. ಹೀಗಿರುವಾಗ ಈಗ ಸಿನಿಮಾ ರಿಲೀಸ್ ಆಗಿ 23 ವರ್ಷ ಆದ್ರೂ ‘ಅಪ್ಪು’ ಸಿನಿಮಾದ ಡೈಲಾಗ್, ಲಿರಿಕ್ಸ್ ಅನ್ನು ಅಭಿಮಾನಿಗಳು ಮರೆತಿಲ್ಲ. ಎಲ್ಲರೂ ಅಪ್ಪುನ ಸಂಭ್ರಮಿಸಿದರು ಎಂದಿದ್ದಾರೆ.
ಪುನೀತ್ ಈಗ ಇಲ್ಲ ತುಂಬಾ ಕಷ್ಟ ಆಗುತ್ತದೆ. ಪಿಕ್ಚರ್ ನೋಡಿದಾಗ ಅಪ್ಪು ಬಂದು ಬಿಡುತ್ತಾನೆ ಅನಿಸುತ್ತಿತ್ತು. ಈ ಸಿನಿಮಾದಿಂದ ನೀವೆಲ್ಲಾ ಅವರಿಗೆ ಪವರ್ ಸ್ಟಾರ್ ಅಂತ ಬಿರುದು ನೀಡಿದ್ರಿ. ಅದನ್ನು ನಾವು ಯಾವತ್ತೂ ಮರೆಯೋದಿಲ್ಲ. ನಿಮ್ಮ ಅಪ್ಪು ಸಿನಿಮಾ ಮೂಲಕ ನಮ್ಮ ಜೊತೆಯಿದ್ದಾರೆ. ಹೀಗೆ ಅವರ ಸಿನಿಮಾ ರಿಲೀಸ್ ಮಾಡಿ ನೋಡ್ತಾ ಇರೋಣ ಎಂದು ರಾಘಣ್ಣ ಮಾತನಾಡಿದ್ದಾರೆ.
ಇನ್ನೂ ಪುರಿ ಜಗನ್ನಾಥ್ ನಿರ್ದೇಶನದ ‘ಅಪ್ಪು’ ಸಿನಿಮಾದಲ್ಲಿ ಪುನೀತ್‌ಗೆ ನಾಯಕಿಯಾಗಿ ರಕ್ಷಿತಾ ನಟಿಸಿದ್ದರು. ಪಾರ್ವತಮ್ಮ ರಾಜ್‌ಕುಮಾರ್ ನಿರ್ಮಾಣ ಮಾಡಿದ್ದರು. 2002ರಲ್ಲಿ ಈ ಸಿನಿಮಾದ ಮೂಲಕ ಪುನೀತ್ ಚಿತ್ರರಂಗಕ್ಕೆ ಎಂಟ್ರಿ ಕೊಟ್ಟರು.
