ಬೆಂಗಳೂರು: ಬ್ಲೂವೇಲ್ ಆಯ್ತು, ಈಗ ಪಬ್ ಜಿ ಕ್ರೇಜ್‍ಗೆ ಬೆಂಗಳೂರಿನ ಯುವ ಸಮೂಹ ಬಲಿಯಾಗುತ್ತಿರುವ ಆಘಾತಕಾರಿ ವಿಚಾರ ಬೆಳಕಿಗೆ ಬಂದಿದೆ.
ಹೌದು, ಹಿಂದೆ ಬ್ಲೂವೇಲ್ ನಂತಹ ಡೆಡ್ಲಿ ಗೇಮ್ ಸಾಕಷ್ಟು ಜನರ ಬಲಿ ಪಡೆದಿತ್ತು. ಆದ್ರೆ ಈಗ ಬಂದಿರುವ ಪಬ್ ಜಿ ಕೂಡ ಬ್ಲೂವೇಲ್‍ನಂತೆ ಡೆಡ್ಲಿ ಗೇಮ್ ಆಗಿ ಮಾರ್ಪಾಡಾಗುತ್ತಿದೆ. ಇತ್ತೀಚೆಗೆ ಪಬ್ ಜಿ ಗೇಮ್ ಗೆ ಸಾವಿರಾರು ಜನರು ಅಡಿಕ್ಟ್ ಆಗಿಹೋಗಿದ್ದಾರೆ. ಅದರಲ್ಲೂ ಯುವ ಪೀಳಿಗೆ ಪಬ್ ಜಿ ಗೇಮ್‍ನಲ್ಲಿಯೇ ಬಹುತೇಕ ಮುಳುಗಿ ಹೋಗಿದೆ.
ಈ ಪಬ್ ಜಿ ಗೇಮ್ ಕ್ರೇಜ್ ರಾಜಧಾನಿಯಲ್ಲಿ ಎಷ್ಟರ ಮಟ್ಟಿಗೆ ಇದೆ ಅಂದ್ರೆ, ಎಲ್ಲಿ ನೋಡಿದರೂ ಪಬ್ ಜಿ ಆಡುವ ಜನರೇ ಕಾಣಸಿಗುತ್ತಾರೆ. ಪಬ್ ಜಿ ಆಡುವವರು ಯಾವಾಗಲು ನಾವು ಸೈನಿಕರು ಎನ್ನುವ ಭ್ರಮೆಯಲ್ಲಿಯೇ ಇರುತ್ತಾರೆ. ಪಬ್ ಜಿ ಬಿಟ್ಟರೆ ಬೇರೆ ಪ್ರಪಂಚವೇ ಇಲ್ಲ ಎನ್ನುವ ರೀತಿ ವರ್ತಿಸುತ್ತಿರುತ್ತಾರೆ.
ಪ್ರತಿ ತಿಂಗಳು ನಿಮ್ಹಾನ್ಸ್ ಆಸ್ಪತ್ರೆಗೆ ಏನಿಲ್ಲಾ ಅಂದ್ರು ಸುಮಾರು 40 ಪಬ್ ಜಿ ಗೇಮ್‍ನಿಂದ ಮಾನಸಿಕ ಖಿನ್ನತೆಗೆ ಒಳಗಾದ ಕೇಸ್‍ಗಳು ದಾಖಲಾಗುತ್ತಿದೆ. ಇಲ್ಲಿಯವರೆಗೆ ಪಬ್ ಜಿ ಗೇಮ್ ಕ್ರೇಜ್‍ಗೆ ಸಂಬಂಧಿತ ಸರಿ ಸುಮಾರು 120 ಮೆಂಟಲ್ ಹೆಲ್ತ್ ಕಂಡಿಷನ್ ಕೇಸ್‍ಗಳು ನಿಮ್ಹಾನ್ಸ್‍ನಲ್ಲಿ ದಾಖಲಾಗಿದೆ.
ಡೆಡ್ಲಿ ಗೇಮ್ ನಿಂದ ಯುವ ಸಮೂಹ ಹೆಚ್ಚಾಗಿ ಮಾನಸಿಕ ಖಿನ್ನತೆಗೆ ಒಳಗಾಗುತ್ತಿದೆ. ಈ ಆಟದಿಂದ ಸಾಕಷ್ಟು ಜನರ ಜೀವನ ಹಾಳಾಗುತ್ತಿದೆ. ಚಿಕ್ಕ ಮಕ್ಕಳಿಂದ ಹಿಡಿದು ಯುವಕರವರೆಗೂ ಪಬ್ ಜಿ ಗೇಮ್ ಪ್ರಭಾವ ಬೀರುತ್ತಿದೆ. ಇದರಿಂದ ಹೆಚ್ಚಾಗಿ ವಿದ್ಯಾರ್ಥಿಗಳು ಮನಸಿಕ ಸಮಸ್ಯೆಗೆ ಒಳಗಾಗುತ್ತಿದ್ದಾರೆ ಎಂದು ಮನೋಶಾಸ್ರ್ತಜ್ಞ ಶ್ರೀಧರ್ ಆಟದ ಬಗ್ಗೆ ಆತಂಕ ವ್ಯಕ್ತಪಡಿಸಿದ್ದಾರೆ.
ಮೊದಲು ಬ್ಲೂವೇಲ್ ಗೇಮ್ ಕ್ರೇಜ್ ಜಗತ್ತಿನಾದ್ಯಂತ ಭಯ ಹುಟ್ಟಿಸಿತ್ತು. ಈಗ ಪಬ್ ಜಿ ಗೇಮ್ ಎಲ್ಲಿ ಬ್ಲೂವೇಲ್ ರೀತಿ ತಮ್ಮ ಮಕ್ಕಳನ್ನು ಬಲಿ ಪಡೆಯುತ್ತೋ ಎಂದು ಪೋಷಕರು ಚಿಂತಿಸುವಂತಾಗಿದೆ.
ಏನಿದು ಪಬ್ ಜಿ?
ಪಬ್ ಜಿ ಎನ್ನುವುದು ಒಂದು ಬ್ಯಾಟಲ್ ಫೀಲ್ಡ್ ಗೇಮ್ (ಯುದ್ಧ ಭೂಮಿ ಆಟ). ಈ ಆಟದ ಸಂಪೂರ್ಣ ಭೂಪಟವನ್ನು ಆಟಗಾರಿಗೆ ಮೊದಲು ತೋರಿಸಲಾಗುತ್ತದೆ. ಬಳಿಕ ಆಟಗಾರರು ತಮಗೆ ಬೇಕಾದ ಪ್ರದೇಶವನ್ನು ಆಯ್ದುಕೊಂದು ಆ ಪ್ರದೇಶಕ್ಕೆ ವಿವಾನದಿಂದ ಕೆಳಗೆ ಹಾರಿ ಮನೆಗಳತ್ತ ಓಡ್ತಾರೆ. ಆಟಗಾರರಿದ್ದ ಪ್ರದೇಶದಲ್ಲಿ ಸಿಕ್ಕ ಶಸ್ತ್ರಾಸ್ತ್ರಗಳನ್ನು, ಮೆಡಿಕಲ್ ಕಿಟ್‍ಗಳನ್ನು, ಯುದ್ಧಕ್ಕೆ ಬೇಕಾದ ಅಗತ್ಯ ವಸ್ತುಗಳನ್ನು ಆಯ್ದುಕೊಂಡು ಮುಂದೆ ಸಾಗುತ್ತಾರೆ. ಆಟಗಾರರು ಇಳಿದ ಪ್ರದೇಶದ ಸುತ್ತ ವೃತ್ತವೊಂದು ಸಣ್ಣದಾಗುತ್ತೆ. ಆಗ ಅಲ್ಲಿದ್ದ ನೂರಾರು ಜನರ ಜೊತೆ ಹೋರಾಡಿ ಉಳಿದರೇ ಗೆದ್ದಂತೆ, ಮೃತಪಟ್ಟರೆ ಸೋತಂತೆ. ಈ ಆಟದ ವಿಶೇಷ ಏನೆಂದರೆ ಸ್ನೇಹಿತರ ಜೊತೆ ಸೇರಿ ಆಡಬಹುದು.
ಪಬ್ಲಿಕ್ ಟಿವಿಯನ್ನು ಇನ್ ಸ್ಟಾಗ್ರಾಮ್ ನಲ್ಲಿ ಫಾಲೋ ಮಾಡಿ www.instagram.com/publictv , ಪಬ್ಲಿಕ್ ಟಿವಿ ಆ್ಯಪ್ ಡೌನ್‍ಲೋಡ್ ಮಾಡಿ: play.google.com/publictv
