ಕಲಬುರಗಿ: ರಸ್ತೆ ಬದಿ ಸುಲಗಾಯಿ ಮಾರಾಟ ಮಾಡುತ್ತಾ ಕೂತಿದ್ದ ವೃದ್ಧೆಯ ಪಾದದ ಮೇಲೆ ಪೋಲೀಸ್ ಜೀಪ್ ಹರಿದು ಹೋಗಿದ್ದು, ಕೂದಲೆಳೆ ಅಂತರದಲ್ಲಿ ವೃದ್ಧೆ ಪಾಣಾಪಾಯದಿಂದ ಪಾರಾಗಿದ್ದಾರೆ.
ಕಲಬುರಗಿ ನಗರದ ಹಳೆ ಜೇವರ್ಗಿ ರಸ್ತೆಯ ಎನ್‍ಜಿಓ ಕಾಲೋನಿ ಬಳಿ ಈ ಘಟನೆ ನಡೆದಿದೆ. ರಸ್ತೆ ಬದಿಯ ಅಂಗಡಿ ಮುಂದೆ ಹೊಟ್ಟೆಪಾಡಿಗೆ ಸುಲಗಾಯಿ ಮಾರಾಟ ಮಾಡಿಕೊಂಡು ವೃದ್ಧೆ ಕುಳಿತಿದ್ದರು. ಈ ವೇಳೆ ಏಕಾಏಕಿ ಪೊಲೀಸ್ ಜೀಪ್ ಅವರು ಕೂತಿದ್ದ ಜಾಗಕ್ಕೆ ನುಗ್ಗಿದ್ದು, ತಕ್ಷಣ ವೃದ್ಧೆ ಎಚ್ಚೆತ್ತುಕೊಂಡು ಪಕ್ಕಕ್ಕೆ ಸರಿದಿದ್ದಕ್ಕೆ ಕೇವಲ ಪಾದದ ಮೇಲೆ ಜೀಪ್ ಹರಿದಿದೆ. ಒಂದು ವೇಳೆ ವೃದ್ಧೆ ಸರಿಯದಿದ್ದಿದ್ದರೆ ಅವರ ಮೇಲೆಯೇ ಜೀಪ್ ಹರಿದು ಹೋಗುತ್ತಿತ್ತು.
ಈ ಘಟನೆ ನಡೆದ ತಕ್ಷಣ ಸ್ಥಳದಲ್ಲಿದ್ದವರು ತಕ್ಷಣ ವೃದ್ಧೆಯ ಸಹಾಯಕ್ಕೆ ಬಂದು ಅವರನ್ನು ಆಸ್ಪತ್ರೆಗೆ ರವಾನಿಸಿದ್ದಾರೆ. ಅಷ್ಟೇ ಅಲ್ಲದೆ ಈ ಘಟನೆಯಲ್ಲಿ ಓರ್ವ ಮಹಿಳೆಯೂ ಗಾಯಗೊಂಡಿದ್ದಾರೆ. ಗಾಯಗೊಂಡ ಮಹಿಳೆ ಹೆಸರು ಪುಷ್ಪಾವತಿ ಎಂದು ತಿಳಿದು ಬಂದಿದ್ದು, ಅವರು ಜಿಲ್ಲಾಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.
ಈ ಅಪಘಾತದ ದೃಶ್ಯವು ಸ್ಥಳೀಯ ಸಿಸಿಟಿವಿಯಲ್ಲಿ ಸೆರೆಯಾಗಿದ್ದು, ವೃದ್ಧೆ ಕೂದಲೆಳೆ ಅಂತರದಲ್ಲಿ ಅಪಾಯದಿಂದ ಪಾರಾಗುವ ದೃಶ್ಯ ನೋಡಿದರೆ ಎದೆ ಝಲ್ ಎನ್ನುತ್ತೆ. ಕೆಲ ತಾಂತ್ರಿಕ ದೋಷದಿಂದ ಚಾಲಕನ ನಿಯಂತ್ರಣ ತಪ್ಪಿ ಏಕಾಏಕಿ ಜೀಪ್ ವೃದ್ಧೆ ಕೂತಿದ್ದ ಸ್ಥಳಕ್ಕೆ ನುಗ್ಗಿತು ಎನ್ನಲಾಗಿದೆ.
