ಬೆಂಗಳೂರು: ಸಾಹಸಸಿಂಹ ವಿಷ್ಣುವರ್ಧನ್ ಅವರ ಮೇಲಿನ ಅತೀವ ಪ್ರೀತಿಯಿಂದ ತಯಾರಾಗಿರೋ ಪಡ್ಡೆ ಹುಲಿಯ ಸಾಂಗು ಹೊರ ಬಂದಿದೆ. ಪಿಆರ್‍ಕೆ ಸಂಸ್ಥೆಯ ಯೂಟ್ಯೂಬ್ ಚಾನೆಲ್ ಮೂಲಕ ಈ ಹಾಡು ಅದ್ಧೂರಿಯಾಗಿ ಬಿಡುಗಡೆಗೊಂಡಿದೆ. ಪ್ರೇಕ್ಷಕರು, ವಿಷ್ಣು ಅಭಿಮಾನಿಗಳು ಈ ಹಾಡನ್ನು ಭರ್ಜರಿಯಾಗಿಯೇ ಸ್ವಾಗತಿಸಿದ್ದಾರೆ.
ನಾ ತುಂಬಾ ಹೊಸಬ ಬಾಸು ಎಂಬ ಈ ಹಾಡನ್ನು ನಿರ್ಮಾಪಕ ಕೆ.ಮಂಜು ವಿಷ್ಣುವರ್ಧನ್ ಅವರಿಗೆ ಅರ್ಪಿಸಿದ್ದಾರೆ. ಮೊನ್ನೆ ತಾನೇ ವಿಷ್ಣು ಅಭಿಮಾನಿಗಳಿಗೆಂದೇ ಈ ಹಾಡಿನ ವಿಶೇಷ ಪ್ರದರ್ಶನವನ್ನೂ ಏರ್ಪಡಿಸಲಾಗಿತ್ತು. ಇದನ್ನು ಕಂಡು ಅಭಿಮಾನಿಗಳೆಲ್ಲ ಕುಣಿದು ಕುಪ್ಪಳಿಸಿದ್ದರು. ಈ ಹಾಡೀಗ ಪ್ರೇಕ್ಷಕರನ್ನೂ ತಲುಪಿಕೊಂಡಿದೆ.
ಕೆ.ಮಂಜು ಒಂದು ಕಾಲದಲ್ಲಿ ವಿಷ್ಣು ವರ್ಧನ್ ಅವರ ಆಪ್ತ ವಲಯದಲ್ಲಿದ್ದವರು. ಅಷ್ಟಕ್ಕೂ ಪಡ್ಡೆಹುಲಿಯ ಕಥೆ ಕೂಡಾ ಸ್ವತಃ ವಿಷ್ಣು ಅವರೇ ಹೇಳಿದ್ದ ಒಂದೆಳೆಯನ್ನ ಆಧರಿಸಿದೆ. ನಿರ್ದೇಶಕ ಗುರು ದೇಶಪಾಂಡೆ ಅದನ್ನು ಬಲು ಆಸ್ಥೆಯಿಂದಲೇ ಚಿತ್ರೀಕರಿಸಿದ್ದಾರೆ. ಪಡ್ಡೆಹುಲಿಯ ಪ್ರತಿಯೊಂದು ವಿಚಾರದಲ್ಲಿಯೂ ಕೂಡಾ ಮಂಜು ವಿಷ್ಣು ಮೇಲಿನ ತಮ್ಮ ಪ್ರೀತಿ ಮತ್ತು ಅಭಿಮಾನವನ್ನ ತೋರ್ಪಡಿಸಿಕೊಳ್ಳುತ್ತಿದ್ದಾರೆ.
ಇಂಥಾ ಗಾಢವಾದ ಪ್ರೀತಿಯಿಂದಲೇ ಈಗ ಹೊರ ಬಂದಿರೋ ಹಾಡು ಕೂಡಾ ರೂಪಿಸಲ್ಪಟ್ಟಿದೆ. ಇದು ಪಡ್ಡೆಹುಲಿ ಚಿತ್ರದಲ್ಲಿ ನಾಯಕನನ್ನು ಪರಿಚಯಿಸೋ ಹಾಡು. ನಿಜಕ್ಕೂ ಇದು ಜಬರ್ದಸ್ತಾಗಿ ಮೂಡಿ ಬಂದಿದೆ. ಬಿಡುಗಡೆಯಾದಾಕ್ಷಣವೇ ಅದ್ಧೂರಿ ಸ್ವಾಗತವೂ ಸಿಕ್ಕಿದೆ.
