ಓಟಿಟಿಯಿಂದ ವಿಕ್ಕಿ-ಕತ್ರಿನಾ ವೆಡ್ಡಿಂಗ್ ಕ್ಲಿಪ್ಸ್ 100 ಕೋಟಿ ರೂ. ಆಫರ್

ಮುಂಬೈ: ಬಾಲಿವುಡ್ ಸ್ಟಾರ್ ಜೋಡಿ ಕತ್ರಿನಾ ಕೈಫ್ ಮತ್ತು ವಿಕ್ಕಿ ಕೌಶಲ್ ವೆಡ್ಡಿಂಗ್ ಕ್ಲಿಪ್ಸ್ 100 ಕೋಟಿ ರೂ. ಕೊಟ್ಟು ತೆಗೆದುಕೊಳ್ಳಲು ಓಟಿಟಿ ಮುಂದಾಗಿದೆ ಎಂಬ ಸುದ್ದಿ ಬಾಲಿವುಡ್ ಅಂಗಳದಲ್ಲಿ ಕೇಳಿಬರುತ್ತಿದೆ.

ವಿಕ್ಕಿ-ಕತ್ರಿನಾ ಡಿಸೆಂಬರ್ 9 ರಂದು ರಾಜಸ್ಥಾನದ ಖಾಸಗಿ ಹೋಟೆಲ್ ನ ಗಾಜಿನ ಮಂಟಪದಲ್ಲಿ ಮದುವೆಯಾಗಲಿದ್ದಾರೆ ಎಂಬ ಸುದ್ದಿ ಕೇಳಿಬರುತ್ತಿದ್ದು, ಈ ಜೋಡಿ ಮಾತ್ರ ಎಲ್ಲಿಯೂ ಈ ಕುರಿತು ಅಧಿಕೃತವಾಗಿ ಹೇಳಿಕೊಂಡಿಲ್ಲ. ವರದಿಗಳ ಪ್ರಕಾರ ಈ ಜೋಡಿಯ ಮದುವೆ ಮಾತ್ರ ರಾಯಲ್ ಆಗಿ ನಡೆಯುತ್ತಿದ್ದು, ಇವರ ಮದುವೆ ಕ್ಲಿಪ್ಸ್‍ಗೆ ಓಟಿಟಿ ಫ್ಲಾಟ್‍ಫಾರ್ಮ್ 100 ಕೋಟಿ ರೂ. ಆಫರ್ ಮಾಡಿದೆ ಎಂಬ ಸುದ್ದಿ ವರದಿಗಳಿಂದ ತಿಳಿದುಬಂದಿದೆ. ಇದನ್ನೂ ಓದಿ: 7 ಬಿಳಿ ಕುದುರೆಗಳ ಜೊತೆ ಮಂಟಪಕ್ಕೆ ವಿಕ್ಕಿ ಕೊಡಲಿದ್ದಾರೆ ರಾಯಲ್ ಎಂಟ್ರಿ

ಸವಾಯಿ ಮಾಧೋಪುರದ ಸಿಕ್ಸ್ ಸೆನ್ಸ್ ಫೋರ್ಟ್ ಬರ್ವಾರಾದಲ್ಲಿ ವಿವಾಹವಾಗಲಿರುವ ಈ ಸೆಲೆಬ್ರಿಟಿ ಜೋಡಿ ಓಟಿಟಿಯ ಆಫರ್ ಅನ್ನು ಸ್ವೀಕರಿಸುತ್ತಾರೆಯೇ ಎಂಬ ಕುತೂಹಲ ಎಲ್ಲರಲ್ಲಿಯೂ ಮೂಡಿದೆ. ಒಂದು ವೇಳೆ ಕತ್ರಿನಾ-ವಿಕ್ಕಿ 100 ಕೋಟಿ ರೂ. ಒಪ್ಪಂದಕ್ಕೆ ಒಪ್ಪಿಕೊಂಡರೆ, ಇವರ ವಿವಾಹವನ್ನು ಓಟಿಟಿ ವೇದಿಕೆಯಲ್ಲಿ ಅಭಿಮಾನಿಗಳು ಮನೆಯಲ್ಲಿಯೇ ಕುಳಿತು ನೋಡಬಹುದು. ಅದು ಅಲ್ಲದೇ ಕತ್ರಿನಾ-ವಿಕ್ಕಿ ಕುಟುಂಬ, ಸ್ನೇಹಿತರು ಮತ್ತು ಆಪ್ತರ ವಿಶೇಷ ಸಂದರ್ಶನಗಳನ್ನು ಸಹ ಈ ವೀಡಿಯೋ ಒಳಗೊಂಡಿರುತ್ತೆ ಎಂದು ಮೂಲಗಳಿಂದ ತಿಳಿದುಬಂದಿದೆ.

ಬಾಲಿವುಡ್ ನಲ್ಲಿ ಸೆಲೆಬ್ರಿಟಿಗಳು ತಮ್ಮ ಮದುವೆಯ ದೃಶ್ಯಗಳು, ಫೋಟೋಗಳನ್ನು ನಿಯತಕಾಲಿಕೆಗಳಿಗೆ ಮತ್ತು ಕೆಲವೊಮ್ಮೆ ಚಾನಲ್‍ಗಳಿಗೆ ಮಾರಾಟ ಮಾಡುವುದು ಸಾಮಾನ್ಯವಾಗಿದೆ. ಏಕೆಂದರೆ ಇವರ ಮದುವೆಯ ಪ್ರತಿಯೊಂದು ಕ್ಷಣಗಳನ್ನು ವೀಕ್ಷಿಸಲು ಅಭಿಮಾನಿಗಳು ಬಹಳಷ್ಟು ಕಾತುರದಿಂದ ಇರುತ್ತಾರೆ. ಈ ಹಿನ್ನೆಲೆ ಸೆಲೆಬ್ರಿಟಿಗಳು ತಮ್ಮ ಮದುವೆಯ ವೀಡಿಯೋ ಮತ್ತು ಫೋಟೋಗಳನ್ನು ಮಾರಾಟ ಮಾಡುವುದು ಇದೆ. ಇದನ್ನೂ ಓದಿ: ಅರಬ್ಬಿ ಸಮುದ್ರದ ಹತ್ತು ಮೀಟರ್ ಆಳದಲ್ಲಿ ಸ್ಕೂಬಾ ಡೈವ್ ಮಾಡಿದ್ರು ಅಪ್ಪು

2018ರಲ್ಲಿ ಮದುವೆಯಾದ ಬಾಲಿವುಡ್ ಪವರ್ ಫುಲ್ ದಂಪತಿ ದೀಪಿಕಾ ಪಡುಕೋಣೆ ಮತ್ತು ರಣವೀರ್ ಸಿಂಗ್ ಅವರ ಮದುವೆ ಕ್ಲಿಪ್ಸ್ ಗಳನ್ನು ಓಟಿಟಿ ಕೇಳಿದ್ದು, ಈ ದಂಪತಿ ತಮ್ಮ ಖಾಸಗಿ ಕ್ಷಣಗಳನ್ನು ಓಟಿಟಿಗೆ ನೀಡಲು ನಿರಾಕರಿಸಿದ್ದರು.