ನವದೆಹಲಿ: ಮೆಡಿಕಲ್ ಶಾಪ್ ಮಾಲೀಕ ನೀಡಿದ ಇಂಜೆಕ್ಷನ್‍ಯಿಂದ 2 ವರ್ಷದ ಬಾಲಕಿ ರಕ್ತಕಾರಿ ಸಾವನ್ನಪ್ಪಿರುವ ಘಟನೆ ದೆಹಲಿಯ ಶಹದಾರಾ ಜಿಟಿವಿ ಎನ್‍ಕ್ಲೇವ್ ಪ್ರದೇಶದಲ್ಲಿ ನಡೆದಿದೆ.
ಈ ವಿಚಾರದ ಬಗ್ಗೆ ಮಾಹಿತಿ ನೀಡಿರುವ ಪೊಲೀಸರು, ಬುಧವಾರ ಮಗುವಿಗೆ ಜ್ವರ ಮತ್ತು ಕೆಮ್ಮು ಕಾಣಿಸಿಕೊಂಡಿದೆ. ಅದಕ್ಕೆ ತಾಯಿ ಮಗುವನ್ನು ಆಸ್ಪತ್ರೆಗೆ ಕರೆದುಕೊಂಡು ಹೋಗದೆ ಮೆಡಿಕಲ್ ಶಾಪ್‍ಗೆ ತೆರಳಿ ಮಾತ್ರ ತಂದು ನೀಡಿದ್ದಾಳೆ. ಆದರೆ ಮಾತ್ರೆ ಸೇವಿಸಿದರೂ ಮಗುವಿನ ಕಾಯಿಲೆ ವಾಸಿ ಆಗಿರಲಿಲ್ಲ.
ಮಾತ್ರೆ ನೀಡಿದರೂ ಜ್ವರ ಮತ್ತು ಕೆಮ್ಮು ಹೋಗಿಲ್ಲ ಎಂದು ಮಗುವನ್ನು ಆಕೆ ಗುರುವಾರ ಮೆಡಿಕಲ್ ಶಾಪ್‍ಗೆ ಮತ್ತೆ ಕರೆದುಕೊಂಡು ಹೋಗಿದ್ದಾಳೆ. ಆಗ ಅಲ್ಲಿ ಮೆಡಿಕಲ್ ಶಾಪ್ ಮಾಲೀಕ ಮಗುವಿಗೆ ಇಂಜೆಕ್ಷನ್ ಮಾಡಿದ್ದಾನೆ. ನಂತರ ಮನೆಗೆ ಬಂದಾಗ ಮಗು ತೀವ್ರ ಅಸ್ವಸ್ಥವಾಗಿ ರಕ್ತದ ವಾಂತಿ ಮಾಡಲು ಶುರು ಮಾಡಿದೆ. ಆಗ ಹೆದರಿದ ತಾಯಿ ಹತ್ತಿರದ ಆಸ್ಪತ್ರೆಗೆ ಕರೆದುಕೊಂಡು ಹೋಗಿದ್ದಾಳೆ ಅಲ್ಲಿ ಮಗು ಮೃತಪಟ್ಟಿದೆ ಎಂದು ಪೊಲೀಸರು ಹೇಳಿದ್ದಾರೆ.
ಈ ಸಂಬಂಧ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ಹೆಚ್ಚಿನ ತನಿಖೆ ಮಾಡುತ್ತಿದ್ದಾರೆ
