38ನೇ ವಯಸ್ಸಿನಲ್ಲಿ 20ನೇ ಬಾರಿ ಗರ್ಭಿಣಿಯಾದ 16 ಮಕ್ಕಳ ತಾಯಿ

ಮುಂಬೈ: 16 ಮಕ್ಕಳ ತಾಯಿಯೊಬ್ಬರು ತಮ್ಮ 38ನೇ ವಯಸ್ಸಿನಲ್ಲಿ 20ನೇ ಬಾರಿ ಗರ್ಭಿಣಿ ಆಗಿರುವ ಅಪರೂಪದ ಸಂಗತಿಯೊಂದು ಮಹಾರಾಷ್ಟ್ರದ ಬೀಡ್ ಜಿಲ್ಲೆಯಲ್ಲಿ ಬೆಳಕಿಗೆ ಬಂದಿದೆ.

ಲಂಕಾಬಾಯಿ ಖರತ್(38) 20ನೇ ಮಗುವಿಗೆ ಜನ್ಮ ನೀಡಲಿರುವ ಮಹಿಳೆ. ಲಂಕಾಬಾಯಿ ಅವರು ಈವರೆಗೂ 16 ಮಕ್ಕಳಿಗೆ ಜನ್ಮ ನೀಡಿದ್ದು, ಮೂರು ಅರ್ಬಾಷನ್ ಆಗಿದೆ. ಈಗ ಅವರು ಮತ್ತೆ 7 ತಿಂಗಳು ಗರ್ಭಿಣಿ ಆಗಿದ್ದಾರೆ ಎಂದು ವೈದ್ಯರು ತಿಳಿಸಿದ್ದಾರೆ.

ಅಲ್ಲದೆ ಪ್ರತಿ ಬಾರಿ ಅವರು ಒಂದು ಮಗುವಿಗೆ ಜನ್ಮ ನೀಡುತ್ತಿದ್ದರು. ಹೀಗೆ ಡೆಲಿವರಿ ಆದ ಕೆಲವೇ ದಿನಗಳಲ್ಲಿ ಅಥವಾ ಕೆಲವೇ ಗಂಟೆಗಳಲ್ಲಿ ಮಗು ಸಾವನ್ನಪ್ಪುತ್ತಿತ್ತು. ಹೀಗೆ 5 ಮಕ್ಕಳು ಮೃತಪಟ್ಟಿವೆ. ಈಗ ಅವರ 11 ಮಕ್ಕಳು ಬದುಕಿದ್ದಾರೆ. ಲಂಕಾಬಾಯಿ ಮೂರು ತಿಂಗಳ ಗರ್ಭಿಣಿಯಾಗಿದ್ದಾಗ ಮೂರು ಬಾರಿ ಗರ್ಭಪಾತ ಆಗಿದೆ. 38 ವರ್ಷದಲ್ಲಿ ಅವರು 20ನೇ ಬಾರಿ ಗರ್ಭಿಣಿ ಆಗಿದ್ದಾರೆ ಎಂದು ಬೀಡ್ ಜಿಲ್ಲೆಯ ಸಿವಿಲ್ ಸರ್ಜನ್ ಡಾ. ಅಶೋಕ್ ತೋರಟ್ ತಿಳಿಸಿದ್ದಾರೆ.

ಇದೇ ವೇಳೆ ಮಾತನಾಡಿದ ಮತ್ತೊಬ್ಬ ವೈದ್ಯರು, ಅವರು ಗರ್ಭಿಣಿ ಎಂಬ ವಿಷಯ ತಿಳಿದಾಗ ಮೊದಲು ಅವರನ್ನು ಸಿವಿಲ್ ಆಸ್ಪತ್ರೆಗೆ ಕರೆದುಕೊಂಡು ಹೋಗಿ ಅಗತ್ಯವಿರುವ ಎಲ್ಲ ಪರೀಕ್ಷೆ ನಡೆಸಿದ್ದೇವೆ. ಸದ್ಯ ತಾಯಿ ಹಾಗೂ ಮಗು ಕ್ಷೇಮವಾಗಿದ್ದಾರೆ. ಇದು ಆಸ್ಪತ್ರೆಯಲ್ಲಿ ಮಹಿಳೆಯ ಮೊದಲ ಹೆರಿಗೆ ಆಗಿದ್ದು, ಈ ಹಿಂದೆ ಎಲ್ಲ ಹೆರಿಗೆ ಮನೆಯಲ್ಲೇ ನಡೆದಿತ್ತು. ಆರೋಗ್ಯದ ಅಪಾಯವನ್ನು ತಪ್ಪಿಸಲು ಎರಡು ತಿಂಗಳಲ್ಲಿ ನಿಗದಿಯಾದ ಹೆರಿಗೆಗಾಗಿ ಸ್ಥಳೀಯ ಸರ್ಕಾರಿ ಆಸ್ಪತ್ರೆಗೆ ದಾಖಲಾಗುವಂತೆ ಸಲಹೆ ನೀಡಿದ್ದೇವೆ ಎಂದು ಹೇಳಿದ್ದಾರೆ.