ಧಾರವಾಡ: ತಾಲೂಕಿನ ನರೇಂದ್ರ ಗ್ರಾಮದಲ್ಲಿ ಕೋತಿಯೊಂದು ಸೋಮವಾರ ಮಕ್ಕಳ ತಲೆಯಲ್ಲಿದ್ದ ಹೇನು ಆರಿಸಿ ಎಲ್ಲರ ಗಮನ ಸೆಳೆದಿದೆ. ಗ್ರಾಮಸ್ಥರು ಈ ದೃಶ್ಯವನ್ನು ತಮ್ಮ ಮೊಬೈಲ್‍ನಲ್ಲಿ ಸೆರೆ ಹಿಡಿದಿದ್ದು, ಇದೀಗ ಆ ವಿಡಿಯೋ ವೈರಲ್ ಆಗಿದೆ.
ಸೋಮವಾರ ರಾಜ್ಯ ಬಂದ್ ಹಿನ್ನೆಲೆಯಲ್ಲಿ ಧಾರವಾಡದ ಯಾವ ಶಾಲೆಗಳಿಗೂ ರಜೆ ಘೋಷಿಸಿರಲಿಲ್ಲ. ಆದರೆ ನರೇಂದ್ರ ಗ್ರಾಮದ ಕೆಲ ಶಾಲಾ ಮಕ್ಕಳು ಶಾಲೆಗೆ ಹೋಗಿರಲಿಲ್ಲ. ಈ ಮಧ್ಯೆ ಗ್ರಾಮದ ಬೇವಿನ ಕಟ್ಟೆಯ ಮೇಲೆ ಬಂದು ಕುಳಿತಿದ್ದ ಕಪ್ಪು ಮೂತಿಯ ಕೋತಿ ಕೈಯಲ್ಲಿ ಶಾಲಾ ಮಕ್ಕಳು ಹೇನು ಆರಿಸಿಕೊಂಡು ಸಂತಸಪಟ್ಟರು.
ಕೋತಿಯೊಂದು ಕಟ್ಟೆಯ ಮೇಲೆ ಬಂದು ಕುಳಿತಿತ್ತು. ಸುಮಾರು ಹೊತ್ತು ಅಲ್ಲೇ ಕುಳಿತ ಕೋತಿಯನ್ನು ಕಂಡ ಕೆಲ ಗ್ರಾಮಸ್ಥರು ಇಬ್ಬರು ಹುಡುಗರನ್ನು ಅದರ ಬಳಿ ಕಳುಹಿಸಿ ಅದರ ಮುಂದೆ ತಲೆಬಾಗುವಂತೆ ಹೇಳಿದ್ದಾರೆ. ಅವರ ಮಾತಿನಂತೆ ಆ ಕೋತಿ ಬಳಿ ಹೋದ ಹುಡುಗರು ಕೋತಿ ಮುಂದೆ ತಲೆ ತೋರಿಸಿ ಬಾಗುತ್ತಿದ್ದಂತೆ ಕೋತಿ ಆ ಬಾಲಕರ ತಲೆಯಲ್ಲಿ ಹೇನು ಆರಿಸಲು ಪ್ರಾರಂಭಿಸಿದೆ.
ಕೆಲಹೊತ್ತು ಆ ಕೋತಿ ಕೈಯಿಂದಲೇ ಹೇನು ಆರಿಸಿಕೊಂಡ ಮಕ್ಕಳು ಮಜಾ ಮಾಡಿದರು. ಕೆಲವರು ಈ ದೃಶ್ಯವನ್ನು ತಮ್ಮ ಮೊಬೈಲ್‍ನಲ್ಲಿ ಸೆರೆ ಹಿಡಿದುಕೊಂಡಿದ್ದು, ಆ ವಿಡಿಯೋ ವೈರಲ್ ಅಗಿದೆ.
