ಬೆಳಗ್ಗಿನ ತಿಂಡಿಗೆ ಆರೋಗ್ಯಕರ ಹಾಗೂ ಅಷ್ಟೇ ರುಚಿಕರವಾಗಿ ಅಡುಗೆ ಮಾಡುವುದು ಪ್ರತಿಯೊಬ್ಬರಿಗೂ ಸವಾಲು. ಮನೆ ಮಂದಿಯೂ ಪ್ರತಿ ದಿನ ಹೊಸ ರುಚಿಯನ್ನೇ ಬಯಸುತ್ತಾರೆ. ಈ ಸಮಯದಲ್ಲಿ ನೀವು ಫಟಾಫಟ್ ಅಂತ ತಯಾರಿಸಬಹುದಾದ ಸಿಂಪಲ್ ಆದ ಒಂದು ತಿಂಡಿಯನ್ನು ಹೇಳಿಕೊಡುತ್ತೇವೆ. ಬಾಳೆಕಾಯಿ ದೋಸೆ (Raw Banana Dosa) ರುಚಿಕರವೂ, ಆರೋಗ್ಯಕರವೂ ಮಾಡುವುದೂ ಸುಲಭವಾಗಿದೆ.
ಬೇಕಾಗುವ ಪದಾರ್ಥಗಳು:
ದೋಸೆ ಅಕ್ಕಿ – 1 ಕಪ್
ಬಳೆಕಾಯಿ – 2
ತೆಂಗಿನ ತುರಿ – ಕಾಲು ಕಪ್
ಹಸಿರು ಮೆಣಸಿನಕಾಯಿ – 2
ಜೀರಿಗೆ – ಅರ್ಧ ಟೀಸ್ಪೂನ್
ಉಪ್ಪು – ರುಚಿಗೆ ತಕ್ಕಷ್ಟು
ನೀರು – ಅಗತ್ಯಕ್ಕೆ ತಕ್ಕಂತೆ ಇದನ್ನೂ ಓದಿ: ಉಳಿದ ಬ್ರೆಡ್ನಿಂದ ಫಟಾಫಟ್ ಅಂತ ಮಾಡಿ ಉಪ್ಪಿಟ್ಟು
ಮಾಡುವ ವಿಧಾನ:
* ಮೊದಲಿಗೆ ಅಕ್ಕಿಯನ್ನು ತೊಳೆದು 3-4 ಗಂಟೆಗಳ ಕಾಲ ನೆನೆಸಿಡಿ (ರಾತ್ರಿಯಿಡೀ ನೆನೆಸಬಹುದು).
* ಈಗ ಬಾಳೆಕಾಯಿಗಳನ್ನು ತೆಗೆದುಕೊಂಡು, ಅದರ ಸಿಪ್ಪೆ ಸುಲಿದು ದೊಡ್ಡ ಡೊಡ್ಡ ತುಂಡುಗಳಾಗಿ ಕತ್ತರಿಸಿಕೊಳ್ಳಿ. ಅದರ ಬಣ್ಣ ಬದಲಾಗದಂತೆ ತಡೆಯಲು ನೀರಿನ ಪಾತ್ರೆಯಲ್ಲಿ ಹಾಕಿಡಿ.
* ಈಗ ಮಿಕ್ಸರ್ ಜಾರ್ಗೆ ಬಾಳೆಕಾಯಿ, ಅಕ್ಕಿ, ಹಸಿ ಮೆಣಸಿನಕಾಯಿ, ಜೀರಿಗೆ, ತೆಂಗಿನ ತುರಿ ಹಾಗೂ ಉಪ್ಪು ಹಾಕಿ ನಯವಾಗಿ ರುಬ್ಬಿಕೊಳ್ಳಿ.
* ದೋಸೆ ಹಿಟ್ಟಿನ ಹದಕ್ಕೆ ಬರುವಂತೆ ನೀರು ಸೇರಿಸಿ ಮಿಶ್ರಣ ಮಾಡಿ.
* ಈಗ ದೋಸೆಯ ಕಾವಲಿಯನ್ನು ಬಿಸಿ ಮಾಡಿ, ಒಂದು ಸೌಟು ಹಿಟ್ಟನ್ನು ಸುರಿದು ತೆಳ್ಳನೆಯ ದೋಸೆಯನ್ನು ಹರಡಿ.
* ದೋಸೆ ಸುತ್ತಲೂ 1 ಟೀಸ್ಪೂನ್ ಎಣ್ಣೆ ಹಾಕಿ, ಗರಿಗರಿಯಾಗುವವರೆಗೆ ದೋಸೆಯನ್ನು ಕಾಯಿಸಿ.
* 1-2 ನಿಮಿಷ ಮಧ್ಯಮ ಉರಿಯಲ್ಲಿ ಮುಚ್ಚಿ ಬೇಯಿಸಿ. ದೋಸೆಯನ್ನು ತಿರುವಿ ಹಾಕುವ ಅಗತ್ಯವಿಲ್ಲ. ಬಳಿಕ ನಿಧಾನವಾಗಿ ಕಾವಲಿಯಿಂದ ದೋಸೆಯನ್ನು ತೆಗೆಯಿರಿ.
* ಇದೀಗ ಬಾಳೆಕಾಯಿ ದೋಸೆ ತಯಾರಾಗಿದ್ದು, ಸಾಂಬಾರ್ ಅಥವಾ ಚಟ್ನಿಯೊಂದಿಗೆ ಸವಿಯಿರಿ. ಇದನ್ನೂ ಓದಿ: ರುಚಿಯಾದ ಡ್ರೈ ಫ್ರೂಟ್ಸ್ ಮಿಲ್ಕ್ ಶೇಕ್ ನೀವೊಮ್ಮೆ ಮಾಡಿ ಸವಿಯಿರಿ
