ಬೆಂಗಳೂರು: ಮೇಕ್ ಇನ್ ಇಂಡಿಯಾಗೆ (Make In India) ಮತ್ತಷ್ಟು ಬಲ ಬಂದಿದ್ದು ಇನ್ನು ಮುಂದೆ ರಫೇಲ್ (Rafale) ಯುದ್ಧ ವಿಮಾನಗಳಿಗೆ ಬಳಸುವ ಹ್ಯಾಮರ್ ಕ್ಷಿಪಣಿ (HAMMER Missile) ಭಾರತದಲ್ಲೇ ತಯಾರಾಗಲಿದೆ.
ಬೆಂಗಳೂರಿನಲ್ಲಿ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಮತ್ತು ಫ್ರಾನ್ಸಿನ ರಕ್ಷಣಾ ಸಚಿವೆ ಕ್ಯಾಥರೀನ್ ವೌಟ್ರಿನ್ ಹ್ಯಾಮರ್ ಕ್ಷಿಪಣಿಗಳ ತಯಾರಿಕೆಯ ಕುರಿತು ಒಪ್ಪಂದಕ್ಕೆ ಸಹಿ ಹಾಕಿದ್ದಾರೆ. ಸೇನಾ ಅಧಿಕಾರಿಗಳ ಪರಸ್ಪರ ನಿಯೋಜನೆ ಮತ್ತು 10 ವರ್ಷಗಳ ರಕ್ಷಣಾ ಸಹಕಾರ ಒಪ್ಪಂದವನ್ನು ನವೀಕರಿಸಿದ್ದೇವೆ ಎಂದು ರಾಜನಾಥ್ ಸಿಂಗ್ ಎಕ್ಸ್ನಲ್ಲಿ ಹೇಳಿದ್ದಾರೆ.
Delighted to have hosted Ms Catherine Vautrin, Minister of the Armed Forces and Veterans Affairs of France today in Bengaluru on her maiden visit to India.
Shared my thoughts on a wide range of issues with a special focus on defence industrial cooperation and emerging… pic.twitter.com/bebNsxx3QU
— Rajnath Singh (@rajnathsingh) February 17, 2026
ಭಾರತ್ ಎಲೆಕ್ಟ್ರಾನಿಕ್ಸ್ (BEL) ಮತ್ತು ಫ್ರಾನ್ಸ್ನ ಸಫ್ರಾನ್ ಎಲೆಕ್ಟ್ರಾನಿಕ್ಸ್ (Safran Electronics & Defence) ಜಂಟಿ ಹೂಡಿಕೆಯಲ್ಲಿ ಹ್ಯಾಮರ್ ವೆಪನ್ ಸಿಸ್ಟಂ ಪ್ರಾಜೆಕ್ಟ್ ರೂಪುಗೊಂಡಿದೆ. ಎರಡು ಸಂಸ್ಥೆಗಳು 50:50 ಇಕ್ವಿಟಿ ಪಾಲುದಾರಿಕೆ ಹೊಂದಿದೆ.
ಜಂಟಿ ಉದ್ಯಮದ ಮಂಡಳಿಯಲ್ಲಿ ಬಿಇಎಲ್ ಮತ್ತು ಸಫ್ರಾನ್ ಕಂಪನಿಯ ಇಬ್ಬರು ನಿರ್ದೇಶಕರು ಇರಲಿದ್ದಾರೆ.
ಹ್ಯಾಮರ್ ಕ್ಷಿಪಣಿ ವಿಶೇಷತೆ ಏನು?
ರಫೇಲ್ ಯುದ್ಧ ವಿಮಾನಗಳಲ್ಲಿಈ ಕ್ಷಿಪಣಿಯನ್ನು ಬಳಕೆ ಮಾಡಲಾಗುತ್ತಿದ್ದು ಅತ್ಯಂತ ನಿಖರವಾಗಿ ಗುರಿ ತಲುಪಬಹುದಾಗಿದೆ. ಸುಮಾರು 60-70 ಕಿಲೋ ಮೀಟರ್ ದೂರದವರೆಗೆ ನಿಖರ ದಾಳಿ ನಡೆಸುವ ಸಾಮರ್ಥ್ಯ ಹೊಂದಿದೆ.
ಪರಿಣಾಮಕಾರಿಯಾಗಿ ಪರ್ವತ ಪ್ರದೇಶಗಳು, ಶತ್ರುಗಳ ಬಲಿಷ್ಠ ಬಂಕರ್ಗಳು, ಸೇನಾನೆಲೆ, ಕಟ್ಟಡಗಳನ್ನು ಧ್ವಂಸಗೊಳಿಸುತ್ತದೆ. ಫೈರ್ ಅಂಡ್ ಫರ್ಗೆಟ್- ಒಮ್ಮೆ ಗುರಿಯನ್ನು ಲಾಕ್ ಮಾಡಿ ಕ್ಷಿಪಣಿ ಹಾರಿಸಿದರೆ ನಿಖರವಾಗಿ ಗುರಿ ಮುಟ್ಟುತ್ತದೆ. ಇದನ್ನೂ ಓದಿ: ವಾಯುಸೇನೆಗೆ 114 ರಫೇಲ್ ವಿಮಾನ – ಅತಿದೊಡ್ಡ ರಕ್ಷಣಾ ಖರೀದಿಗೆ ಅನುಮತಿ
ಒಂದು ರಫೇಲ್ ವಿಮಾನವು ಏಕಕಾಲದಲ್ಲಿ 6 ಹ್ಯಾಮರ್ ಕ್ಷಿಪಣಿಗಳನ್ನು ಹೊತ್ತೊಯ್ಯುತ್ತದೆ. ಒಂದೇ ಸಮಯದಲ್ಲಿ 6 ವಿಭಿನ್ನ ಗುರಿಗಳನ್ನು ಹೊಡೆದುರುಳಿಸಬಹುದು. ಪ್ರತೀ ಹ್ಯಾಮರ್ ತೂಕ 330 ಕೆಜಿ ಇರುತ್ತದೆ. ಪ್ರಸ್ತುತ ರಫೇಲ್ನಲ್ಲಿ ಬಳಸಲಾಗ್ತಿದ್ದು, ತೇಜಸ್ನಲ್ಲೂ ಬಳಸಬಹುದು.
ಹ್ಯಾಮರ್ ನಿರ್ಮಾಣಕ್ಕೆ ಕೈ ಹಾಕಿದ್ದು ಯಾಕೆ?
ಪ್ರಸ್ತುತ ಭಾರತದ ಬಳಿ 36 ರಫೇಲ್ ವಿಮಾನಗಳಿವೆ. ಆಪರೇಷನ್ ಸಿಂಧೂರದ ಸಮಯದಲ್ಲಿ ರಫೇಲ್ನಿಂದ ಹಾರಿಸಿದ್ದ ಹ್ಯಾಮರ್ ಕ್ಷಿಪಣಿ ಪಾಕ್ ಸೇನಾ ನೆಲೆಗಳನ್ನು ಮತ್ತು ಉಗ್ರರ ನೆಲೆಗಳನ್ನು ಧ್ವಂಸ ಮಾಡಿತ್ತು. ಇಲ್ಲಿಯವರೆಗೆ ಫ್ರಾನ್ಸ್ನಿಂದ ಈ ಕ್ಷಿಪಣಿಗಳನ್ನು ಆಮದು ಮಾಡಿಕೊಳ್ಳಲಾಗಿತ್ತು. ಆದರೆ ಇನ್ನು ಮುಂದೆ ಭಾರತವೇ ಈ ಹ್ಯಾಮರ್ ಕ್ಷಿಪಣಿಯನ್ನು ಅಭಿವೃದ್ಧಿ ಪಡಿಸಲಿದೆ.
