ಫ್ರೈಡ್‌ ರೈಸ್ ಅಂದರೆ ನಿಮ್ಗೆ ಇಷ್ಟನಾ? ಚಿಕನ್, ಎಗ್ ಫ್ರೈಡ್‌ ರೈಸ್ ತಿಂದು ಬೇರೆ ವೆರೈಟಿ ಫ್ರೈಡ್‌ ರೈಸ್ ತಿನ್ನಬೇಕು ಅಂತಾ ಅಂದ್ಕೊಂಡಿದ್ರೆ, ಸ್ಪೆಷಲ್ ಆಗಿ ಸೀ ಫುಡ್‌ನಲ್ಲಿ ಫ್ರೈಡ್‌ನ ಟ್ರೈ ಮಾಡಿ. ಹೌದು, ನಾವಿವತ್ತು ಸಮುದ್ರದಲ್ಲಿ ಸಿಗುವ ಸಿಗಡಿ ಅಂದ್ರೆ ಪ್ರಾನ್ಸ್ ಫ್ರೈಡ್‌ ರೈಸ್ ಮಾಡೋದು ಹೇಗೆ ಅಂತಾ ಹೇಳಿ ಕೊಡ್ತೀವಿ. ನೀವು ಮನೆಯಲ್ಲೇ ಟ್ರೈ ಮಾಡಿ ಟೇಸ್ಟಿ ಪ್ರಾನ್ಸ್ ಫ್ರೈಡ್‌ ರೈಸ್.
ಪ್ರಾನ್ಸ್ ಫ್ರೈಡ್‌ ರೈಸ್‌ಗೆ ಬೇಕಾಗುವ ಸಾಮಾಗ್ರಿಗಳು:
ಸಿಗಡಿ – ಅರ್ಧ ಕೆಜಿ
ಬಾಸ್ಮತಿ ಅಕ್ಕಿ – ಅರ್ಧ ಕೆಜಿ
ಅರಿಸಿನ – ಅರ್ಧ ಸ್ಪೂನ್
ಶುಂಠಿ ಬೆಳ್ಳುಳ್ಳಿ ಪೇಸ್ಟ್ – 1 ಸ್ಪೂನ್
ಚಿಲ್ಲಿ ಪೇಸ್ಟ್ – 1 ಸ್ಪೂನ್
ಕಾಳುಮೆಣಸಿನ ಪುಡಿ – ಅರ್ಧ ಸ್ಪೂನ್
ಮೊಟ್ಟೆ – 2
ಈರುಳ್ಳಿ – 2
ಕ್ಯಾರೆಟ್ ತುರಿ – ಅರ್ಧ ಕಪ್
ಬೀನ್ಸ್ – ಅರ್ಧ ಕಪ್
ಕೊತ್ತಂಬರಿ ಪುಡಿ – 3 ಸ್ಪೂನ್
ಕೊತ್ತಂಬರಿ ಸೊಪ್ಪು
ಸೋಯಾ ಸಾಸ್ – 1 ಸ್ಪೂನ್
ಉಪ್ಪು – ರುಚಿಗೆ ತಕ್ಕಷ್ಟು
ಎಣ್ಣೆ- ಸ್ವಲ್ಪ
ಪ್ರಾನ್ಸ್ ಫ್ರೈಡ್‌ ರೈಸ್ ಮಾಡುವ ವಿಧಾನ:
* ಮೊದಲು ಕ್ಯಾರೆಟ್ ಅನ್ನು ತುರಿದುಕೊಂಡು, ಬೀನ್ಸ್ ಅನ್ನು ಚಿಕ್ಕದಾಗಿ ಹೆಚ್ಚಿಕೊಳ್ಳಬೇಕು.
* ಕ್ಯಾರೆಟ್ ಮತ್ತು ಬೀನ್ಸ್ ಅನ್ನು ಒಂದು ಪಾತ್ರೆಯಲ್ಲಿ ಹಾಕಿ ಮತ್ತು ನೀರು ಸೇರಿಸಿ ಮತ್ತು 10 ನಿಮಿಷ ಬೇಯಿಸಿಕೊಳ್ಳಬೇಕು.
* ನಂತರ ನೀರನ್ನು ಸೋಸಿ ಪಕ್ಕಕ್ಕೆ ಇರಿಸಿ.
* ಈಗ ಒಂದು ಬೌಲ್‌ಗೆ ಮೊಟ್ಟೆಗಳನ್ನು ಒಡೆದು ಹಾಕಿ, ಉಪ್ಪು ಮತ್ತು ಕಾಳುಮೆಣಸಿನ ಪುಡಿಯನ್ನು ಸೇರಿಸಿ ಮತ್ತು ಚೆನ್ನಾಗಿ ವಿಸ್ಕ್ ಮಾಡಿಕೊಳ್ಳಿ.
* ಚೆನ್ನಾಗಿ ಮಿಕ್ಸ್ ಮಾಡಿಕೊಂಡ ಮೊಟ್ಟೆಯನ್ನು ಆಮ್ಮೆಟ್ ಮಾಡಿ. ಆಮ್ಲೆಟ್ ಅನ್ನು ಚಿಕ್ಕ ಚಿಕ್ಕ ತುಂಡುಗಳಾಗಿ ಕತ್ತರಿಸಿಟ್ಟುಕೊಳ್ಳಿ.
* ಈಗ ಸಿಗಡಿ(ಪ್ರಾನ್ಸ್)ಗಳನ್ನು ಒಂದು ಬೌಲ್‌ಗೆ ಹಾಕಿ ಸ್ವಲ್ಪ ಉಪ್ಪು ಮತ್ತು ಕಾಳುಮೆಣಸಿನ ಪುಡಿಯನ್ನು ಹಾಕಿ ನೀರು ಸೇರಿಸಿ. ಸ್ವಲ್ಪ ಸಮಯದವರೆಗೆ ಅವುಗಳನ್ನು ಬೇಯಿಸಿ.
* ಸಿಗಡಿ 90% ನೀರಿನಲ್ಲಿ ಬೇಯಬೇಕು.
* ಬಳಿಕ ಬಾಸ್ಮತಿ ರೈಸ್‌ನಿಂದ ಉದುರುದುರಾದ ಅನ್ನ ಮಾಡಿಟ್ಟುಕೊಳ್ಳಬೇಕು.
* ಈಗ ಒಂದು ಬಾಣಲೆಯನ್ನು ಒಲೆಯ ಮೇಲಿಟ್ಟು ಎಣ್ಣೆ ಹಾಕಿಕೊಳ್ಳಬೇಕು.
* ಎಣ್ಣೆ ಬಿಸಿಯಾದ ಮೇಲೆ ಕತ್ತರಿಸಿಟ್ಟುಕೊಂಡ ಈರುಳ್ಳಿ ಸೇರಿಸಿ. ಬಣ್ಣ ಬದಲಾಗುವವರೆಗೂ ಹುರಿದುಕೊಳ್ಳಬೇಕು.
* ನಂತರ ಇದಕ್ಕೆ ಶುಂಠಿ-ಬೆಳ್ಳುಳ್ಳಿ ಪೇಸ್ಟ್, ಬೇಯಿಸಿಟ್ಟುಕೊಂಡ ಸಿಗಡಿಯನ್ನು ಸೇರಿಸಿಕೊಳ್ಳಬೇಕು.
* ಜೊತೆಗೆ ಹಸಿರು ಮೆಣಸಿನಕಾಯಿ ಪೇಸ್ಟ್ ಸೇರಿಸಿ. ಉಪ್ಪು, ಮೆಣಸು ಪುಡಿ ಮತ್ತು ಸೋಯಾ ಸಾಸ್ ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿಕೊಳ್ಳಬೇಕು.
* ಇದಕ್ಕೆ ಮೊದಲೇ ಬೇಯಿಸಿದ ಕ್ಯಾರೆಟ್ ಮತ್ತು ಬೀನ್ಸ್ಗಳನ್ನು ಸೇರಿಸಿ ಎಲ್ಲವನ್ನೂ ಚೆನ್ನಾಗಿ ಮಿಕ್ಸ್ ಮಾಡಿಕೊಳ್ಳಬೇಕು.
* ನಂತರ ಬೇಯಿಸಿಟ್ಟುಕೊಂಡ ಅನ್ನ ಹಾಗೂ ಕತ್ತರಿಸಿಟ್ಟುಕೊಂಡ ಆಮ್ಲೆಟ್ ತುಂಡು ಸೇರಿಸಿ ಎಲ್ಲಾ ಮಿಕ್ಸ್ ಮಾಡಿಕೊಂಡು, ಮೇಲೆ ಕೊತ್ತಂಬರಿ ಸೊಪ್ಪು ಉದುರಿಸಬೇಕು.
* ಈಗ ನಿಮ್ಮ ಮುಂದೆ ರುಚಿಯಾದ ಸಿಗಡಿ ಫ್ರೈಡ್‌ ರೈಸ್ ಸವಿಯಲು ಸಿದ್ದ.
