ವಿಚ್ಛೇದನಕ್ಕೆ ಅರ್ಜಿ ಹಾಕಿ ಬಳಿಕ ಪತಿಯಿಂದ ಮಗುಬೇಕೆಂದ ಮಹಿಳೆ

ಮುಂಬೈ: ವಿಚ್ಛೇದನಕ್ಕೆ ಅರ್ಜಿ ಹಾಕಿದ ಬಳಿಕ ಪತಿಯಿಂದ ಮಗುಬೇಕು ಎಂದ ಮಹಿಳೆ ಕೋರ್ಟ್ ಗೆ ಮನವಿ ಮಾಡಿರುವ ವಿಚಿತ್ರ ಪ್ರಕರಣವೊಂದು ಮಹಾರಾಷ್ಟ್ರದ ಕೌಂಟುವಿಕ ನ್ಯಾಯಾಲದಲ್ಲಿ ನಡೆದಿದೆ.

ಪತಿ ಜೊತೆ ಬಾಳಲು ಸಾಧ್ಯವಿಲ್ಲ ಎಂದು 35 ವರ್ಷದ ಮಹಿಳೆಯೊಬ್ಬರು ವಿಚ್ಛೇದನಕ್ಕೆ ಅರ್ಜಿ ಹಾಕಿದ್ದರು. ಆದರೆ ಈಗ ಪತಿಯಿಂದಲೇ ಐವಿಎಫ್(ಇನ್-ವಿಟ್ರೋ ಫಲೀಕರಣ) ವಿಧಾನದ ಮೂಲಕ ಮಗು ಪಡೆಯಲು ಅವಕಾಶ ನೀಡುವಂತೆ ಮಹಿಳೆ ನಾಂದೇಡ್ ಕುಟುಂಬ ನ್ಯಾಯಾಲಯದ ಮೊರೆ ಹೋಗಿದ್ದು, ಈ ಮನವಿಗೆ ಕೋರ್ಟ್ ಅನುಮತಿ ನೀಡಿದೆ.

ವಿಚ್ಛೇದನಕ್ಕೆ ಸಂಬಂಧಿಸಿದಂತೆ ವಿಚಾರಣೆ ನಡೆಯುತ್ತಿರುವಾಗಲೇ ಮಹಿಳೆ ಮಗುಗಾಗಿ ಮನವಿ ಮಾಡಿರುವ ಅರ್ಜಿಯನ್ನು ಕೋರ್ಟ್ ಪುರಸ್ಕರಿಸಿದ್ದು, ಸಂತಾನೋತ್ಪತ್ತಿ ಹಕ್ಕುಗಳಿಗೆ ಸಂಬಂಧಿಸಿದಂತೆ ಅಂತಾರಾಷ್ಟ್ರೀಯ ಕಾನೂನು ಪ್ರಕಾರ ಮಹಿಳೆಗೆ ಮಗು ಪಡೆಯುವ ಹಕ್ಕಿದೆ ಎಂದು ಅಭಿಪ್ರಾಯ ವ್ಯಕ್ತಪಡಿಸಿದೆ.

ಈ ರೀತಿ ಪ್ರಕರಣಕ್ಕೆ ಸಂಬಂಧಿಸಿದಂತೆ ಭಾರತದ ಕಾನೂನುನಲ್ಲಿ ಯಾವುದೇ ಪ್ರಸ್ತಾವ ಇಲ್ಲದಿರುವ ಕಾರಣಕ್ಕೆ ಕೋರ್ಟ್ ಅಂತಾರಾಷ್ಟ್ರೀಯ ಕಾನೂನುಗಳ ಮೊರೆ ಹೋಗಿದೆ. ಅಷ್ಟೇ ಅಲ್ಲದೆ ಜೂನ್ 24ರ ಒಳಗೆ ಆಪ್ತ ಸಲಹೆಗಾರರ ನೆರವಿನಿಂದ ಐವಿಎಫ್ ಪರಿಣಿತರನ್ನು ಭೇಟಿ ಮಾಡಿ ಎಂದು ನ್ಯಾಯಾಲಯ ದಂಪತಿಗೆ ಸೂಚಿಸಿದೆ ಎನ್ನಲಾಗಿದೆ.

ಪತ್ನಿಯ ಆಗ್ರಹವನ್ನು ಪತಿ ವಿರೋಧಿಸಿದ್ದು, ಸಾಮಾಜಿಕ ನಿಯಮಗಳಿಗೆ ಇದು ವಿರುದ್ಧವಾಗಿದೆ. ಅಷ್ಟೇ ಅಲ್ಲದೆ ಇದು ಅಕ್ರಮವೆಂದು ವಾದಿಸಿದ್ದಾರೆ. ಆದರೆ ಕೋರ್ಟ್ ಪತಿ ವಾದವನ್ನು ನಿರಾಕರಿಸಿದ್ದರಿಂದ, ಪತಿ ಅನಿವಾರ್ಯವಾಗಿ ವೀರ್ಯದಾನ ಮಾಡಬೇಕಿದೆ.

ದಂಪತಿ 2017ರಲ್ಲಿ ವಿಚ್ಛೇದನಕ್ಕೆ ಅರ್ಜಿ ಸಲ್ಲಿಸಿದ್ದರು. ಅಲ್ಲದೆ ಈಗಾಗಲೇ ಅವರಿಬ್ಬರಿಗೆ ಒಂದು ಮಗುವನ್ನು ಕೂಡ ಇದೆ. ಆದರೆ ಇನ್ನೊಂದು ಮಗು ಬೇಕು ಎಂಬ ಕಾರಣಕ್ಕೆ 2018ರಲ್ಲೇ ಪತ್ನಿ ಕೋರ್ಟ್ ಮೊರೆ ಹೋಗಿದ್ದರು. ಈ ಬಗ್ಗೆ ಕೋರ್ಟ್ ವಿಚಾರಣೆ ನಡೆಸಿದ್ದು, ಮಹಿಳೆ ಸಂತಾನ ಪಡೆಯುವ ಹಕ್ಕಿದೆ. ಇದು ಮನುಷ್ಯನ ಮೂಲ ನಾಗರಿಕ ಹಕ್ಕು ಎಂದು ಪರಿಗಣಿಸಿ ಮಹಿಳೆ ಮನವಿಯನ್ನು ಕೋರ್ಟ್ ಸಮ್ಮತಿಸಿದೆ.