ಹಾವೇರಿ: ಕೆಲವು ತಿಂಗಳ ಹಿಂದೆ ಮದಗಮಾಸೂರು ಕೆರೆಯಲ್ಲಿ ಹನಿ ನೀರು ಇರಲಿಲ್ಲ. ಕೆರೆಯ ನೀರಿನಿಂದ ಕೋಡಿ ಬಿದ್ದು ಎರಡು ಜಲಪಾತಗಳು ಸೃಷ್ಟಿಯಾಗಿವೆ. ಮಿನಿ ಜೋಗ್ ಫಾಲ್ಸ್ ಎನ್ನುವಂತೆ ಸುಂದರ ನಿಸರ್ಗದ ಮಡಿಲಲ್ಲಿ ಹಾಲಿನ ನೊರೆಯಂತೆ ಧುಮ್ಮಿಕ್ಕಿ ಬೀಳುತ್ತಿರೋ ಫಾಲ್ಸ್ ನೋಡಲು ಜನರ ದಂಡೇ ಇಲ್ಲಿಗೆ ಬರುತ್ತಿದೆ.
ಹಾವೇರಿ ಜಿಲ್ಲೆಯ ಹಿರೇಕೆರೂರು ತಾಲೂಕಿನ ಮದಗಮಾಸೂರು ಕೆರೆಯ ಬಳಿ ಎರಡು ಜಲಪಾತಗಳು ಸೃಷ್ಟಿಯಾಗಿವೆ. ಕಳೆದ ಮೂರ್ನಾಲ್ಕು ವರ್ಷಗಳಿಂದ ಎದುರಾಗಿದ್ದ ಬರಗಾಲದಿಂದ ಕೆರೆ ಸಂಪೂರ್ಣ ಬತ್ತಿ ಬರಿದಾಗಿ ಹೋಗಿತ್ತು. ಮತ್ತೊಂದು ಕಡೆ ಜನರು ಕೆರೆಯನ್ನು ಒತ್ತುವರಿ ಮಾಡಿಕೊಂಡು ಕೆರೆಯ ಸೌಂದರ್ಯವನ್ನೇ ಹಾಳು ಮಾಡಿದ್ದರು.
ಬ್ರಿಟಿಷರ ಕಾಲದಲ್ಲಿ ನಿರ್ಮಾಣವಾಗಿದ್ದ ಈ ಐತಿಹಾಸಿಕ ಕೆರೆಗೆ ಈಗ ಮಾಯದಂತಾ ಮಳೆ ನೀರು ತಂದಿದೆ. ಕೆರೆ ತುಂಬಿ ಹರಿಯುತ್ತಿರುವಾಗ ಕೋಡಿ ಬಿದ್ದು ಎರಡು ಜಲಪಾತಗಳು ಸೃಷ್ಟಿಯಾಗಿವೆ. ಜಲಪಾತಗಳನ್ನು ನೋಡಲು ಜನರು ತಂಡೋಪ ತಂಡವಾಗಿ ಇಲ್ಲಿಗೆ ಆಗಮಿಸುತ್ತಿದ್ದಾರೆ. ಹಾಲಿನ ನೊರೆಯಂತೆ ಧುಮ್ಮಿಕ್ಕಿ ಬೀಳುತ್ತಿರೋ ಜಲಪಾತವನ್ನ ನೋಡಿ ಕಣ್ಣು ತುಂಬಿಕೊಳ್ಳುತ್ತಿದ್ದಾರೆ.
ಮದಗಮಾಸೂರು ಕೆರೆಗೆ ಹಲವಾರು ವರ್ಷಗಳ ಇತಿಹಾಸವಿದೆ. ಈ ಕೆರೆಯ ಕುರಿತು ಜಾನಪದ ಗೀತೆಗಳು ಮತ್ತು ನಾಟಕಗಳು ಸಹ ಹೊರಬಂದಿದೆ. ಈ ಕೆರೆ ಹಿರೇಕೆರೂರು ತಾಲೂಕಿನ ನೂರಾರು ಎಕರೆ ಪ್ರದೇಶದ ರೈತರಿಗೆ ಆಸರೆಯಾಗಿದೆ. ಕೆಲವು ದಿನಗಳಿಂದ ಸುರಿದ ಮಾಯದಂತ ಮಳೆಗೆ ಮದಗದ ಕೆರೆಗೆ ನೀರು ಬಂದಿದೆ. ಇದರಿಂದ ಕೆರೆ ನೀರಿನಿಂದ ತುಂಬಿ ಕಂಗೊಳಿಸ್ತಿದ್ದು ಮಿನಿ ಜೋಗ ಜಲಪಾತ ಸೃಷ್ಟಿಯಾಗಿದೆ.
ಕೆರೆಯ ನೀರಿನಿಂದ ಕುಮುದ್ವತಿಗೆ ಹರಿದು ಹೋಗುವಲ್ಲಿ ಬೀಳುವ ಜಲಪಾತವನ್ನು ನೋಡಲು ಜನರ ದಂಡೇ ಇಲ್ಲಿಗೆ ಆಗಮಿಸ್ತಿದೆ. ಸುಂದರ ನಿಸರ್ಗದ ಮಡಿಲಲ್ಲಿ ಹಾಲಿನ ನೊರೆಯಂತೆ ಬೀಳ್ತಿರೋ ಜಲಪಾತವನ್ನು ನೋಡಿವುದೇ ಕಣ್ಣಿಗೆ ಹಬ್ಬ ಎಂಬಂತಿದೆ. ಮದಗಮಾಸೂರು ಕೆರೆಗೆ ಸರ್ಕಾರ ಮತ್ತು ಪ್ರವಾದೋದ್ಯಮ ಇಲಾಖೆ ಕಾಯಕಲ್ಪ ನೀಡಬೇಕಿದೆ.
ಕೆರೆಗೆ ನೀರಿನಲ್ಲದ ವೇಳೆ ಊರ ಗೌಡ ತನ್ನ ಸೊಸೆಯನ್ನೆ ಕೆರೆಗೆ ಹಾರವಾಗಿ ನೀಡಿದ್ದರಿಂದ ಕೆರೆಗೆ ನೀರು ಬಂದಿತ್ತು ಅನ್ನೋದು ಇತಿಹಾಸ. ಕೆಂಚಮ್ಮನ ಕೆರೆ ಈಗ ಪ್ರವಾಸಿಗರ ಕಣ್ಣಿಗೆ ಹಬ್ಬ. ಮನಸ್ಸಿಗೆ ಆನಂದವನ್ನುಂಟು ಮಾಡುತ್ತಿದೆ. ಕುಟುಂಬ ಸಮೇತ ಜನರು ಇಲ್ಲಿಗೆ ಬಂದು ಕೆರೆಯ ಸೌಂದರ್ಯದ ಜೊತೆಗೆ ಜಲಪಾತವನ್ನು ನೋಡಿಕೊಂಡು ಹೋಗ್ತಿದ್ದಾರೆ.
