ಬೀದಿನಾಯಿಗೆ ತಿಂಡಿ ಹಾಕಿದ್ದಕ್ಕೆ ಯುವತಿಗೆ ಥಳಿತ

ಬೆಂಗಳೂರು: ಬೀದಿನಾಯಿಗಳಿಗೆ ತಿಂಡಿ ಹಾಕಿದ್ದಕ್ಕೆ ಯುವತಿಯೋರ್ವಳಿಗೆ ಸ್ಥಳೀಯರೇ ಥಳಿಸಿದ ಘಟನೆ ನಗರದ ಮಹಾಲಕ್ಷ್ಮೀ ಲೇಔಟ್ ನಲ್ಲಿ ನಡೆದಿದೆ.

ಮಹಾಲಕ್ಷ್ಮೀ ಲೇಔಟ್‍ನ ತಾರಿಣಿ ಹಲ್ಲೆಗೊಳಗಾದ ಯುವತಿ. ಈಕೆ ದಿನ ನಿತ್ಯ ಬೀದಿ ನಾಯಿಗಳಿಗೆ ತಿಂಡಿ ಹಾಕುತ್ತಿದ್ದಳು. ಎಂದಿನಂತೆ ಬುಧವಾರವು ಸಹ ತಾರಿಣಿ ನಾಯಿಗಳಿಗೆ ತಿಂಡಿಹಾಕುತ್ತಿದ್ದಾಗ ಸ್ಥಳೀಯರು ಆಕೆಯ ವಿರುದ್ಧ ಕಿಡಿಕಾರಿದ್ದಾರೆ. ಅಲ್ಲದೇ ನೀನು ನಾಯಿಗಳಿಗೆ ತಿಂಡಿ ಹಾಕುವುದರಿಂದ ಎಲ್ಲಾ ನಾಯಿಗಳು ಮನೆ ಹತ್ತಿರವೇ ಬರುತ್ತವೆ ಎಂದು ಹಲ್ಲೆ ನಡೆಸಿದ್ದಾರೆ.

ನೀನು ಯಾಕೆ ಬೀದಿ ನಾಯಿಗಳಿಗೆ ತಿಂಡಿ ಹಾಕುತ್ತೀಯಾ ಎಂದು ಪ್ರಶ್ನಿಸಿ ಯುವತಿ ಮೇಲೆಯೇ ಹಲ್ಲೆ ನಡೆಸಿದ್ದಾರೆ. ಅಲ್ಲದೇ ಈ ಸಂಬಂಧ ಯುವತಿಯ ವಿರುದ್ಧವೇ ಸ್ಥಳೀಯರು ಮಹಾಲಕ್ಷ್ಮೀ ಲೇಔಟ್ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಅಲ್ಲದೇ ಸ್ಥಳೀಯರು ಅವಾಚ್ಯ ಶಬ್ದಗಳಿಂದ ಬೈದು, ಹೊಡೆಯಲು ಯತ್ನಿಸಿರುತ್ತಿರುವ ವಿಡಿಯೋವನ್ನು ರೇಕಾರ್ಡ್ ಮಾಡಲು ಯುವತಿ ಮುಂದಾದಾಗ ಯುವತಿಯ ಮೊಬೈಲ್ ಕಿತ್ತುಕೊಂಡಿದ್ದಾರೆ ಎಂದು ತಿಳಿದುಬಂದಿದೆ.