ಸಾವಿನಲ್ಲೂ ಒಂದಾದ ಸ್ನೇಹಿತರನ್ನು ಕಂಡು ಕಣ್ಣೀರಿಟ್ಟ ಪೊಲೀಸರು

Public TV
1 Min Read
kpl police dog 2

ಕೊಪ್ಪಳ: ಶ್ವಾನ ದಳದಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದ ಶ್ವಾನವೊಂದು ಸಾವನ್ನಪ್ಪಿದ ರಾತ್ರಿಯೇ ಅದರ ಸ್ನೇಹಿತನಾಗಿದ್ದ ಇನ್ನೊಂದು ಶ್ವಾನ ಕೂಡ ಕೊನೆಯುಸಿರೆಳೆದಿದ್ದು, ಈ ಮೂಲಕ ಸಾವಿನಲ್ಲೂ ಒಂದಾದ ಅಪರೂಪದ ಘಟನೆ ಕೊಪ್ಪಳದಲ್ಲಿ ನಡೆದಿದೆ.

ಹೌದು. ಕೊಪ್ಪಳ ಪೊಲೀಸ್ ಇಲಾಖೆಯಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದ ಚೇತಕ್ ಹಾಗೂ ಟೆರರ್ ಹೆಸರಿನ ಎರಡು ಶ್ವಾನಗಳು ಶನಿವಾರ ಅಸುನೀಗಿವೆ. ಈ ಎರಡು ಶ್ವಾನಗಳು ಹಲವು ಅಪರಾಧ ಪ್ರಕರಣಗಳನ್ನು ಬೇಧಿಸುವಲ್ಲಿ ಪೊಲೀಸರಿಗೆ ಸಹಾಯ ಮಾಡಿದ್ದವು. ಕಳೆದ ಎರಡು ತಿಂಗಳಿಂದ ಚೇತಕ್ ಕ್ಯಾನ್ಸರ್ ನಿಂದ ಬಳಲುತ್ತಿದ್ದು, ಶನಿವಾರ ಮಧ್ಯಾಹ್ನ ಸಾವನ್ನಪ್ಪಿತ್ತು. ಈ ವೇಳೆ ಪೊಲೀಸರು ಸರ್ಕಾರಿ ಗೌರವಗಳೊಂದಿಗೆ ಶ್ವಾನದ ಅಂತ್ಯಕ್ರಿಯೆ ಮಾಡಿದ್ದರು.

kpl police dog

ಸ್ನೇಹಿತನನ್ನು ಕಳೆದುಕೊಂಡ ನೋವಿನಲ್ಲಿ ಶನಿವಾರ ರಾತ್ರಿ ಶ್ವಾನ ಟೆರರ್ ಕೂಡ ಸಾವನ್ನಪ್ಪಿದೆ. ಹಲವಾರು ಅಪರಾಧ ಪ್ರಕರಣವನ್ನು ಪತ್ತೆ ಹಚ್ಚುವಲ್ಲಿ ಯಶಸ್ವಿಯಾದ ಎರಡೂ ಶ್ವಾನಗಳನ್ನ ಕಳೆದುಕೊಂಡ ಕೊಪ್ಪಳ ಪೊಲೀಸ್ ಸಿಬ್ಬಂದಿಯ ಕಣ್ಣಲ್ಲಿ ನೀರು ಜಿನುಗುತ್ತಿತ್ತು. ಒಟ್ಟಿನಲ್ಲಿ ಒಂದೇ ದಿನ ಎರಡೂ ಶ್ವಾನಗಳು ಮೃತಪಟ್ಟು ಸಾವಿನಲ್ಲೂ ಒಂದಾಗಿವೆ.

Share This Article
Leave a Comment

Leave a Reply

Your email address will not be published. Required fields are marked *