ಹೈದರಾಬಾದ್: ಸಿನಿಮಾಗಳಲ್ಲಿ ದ್ವಿಪಾತ್ರ- ತ್ರಿಪಾತ್ರ ಸೇರಿದಂತೆ ಅನೇಕ ಪಾತ್ರಗಳಿಗೆ ಒಬ್ಬರೇ ಬಣ್ಣ ಹಚ್ಚಿಕೊಂಡು ಅಭಿನಯಿಸುತ್ತಿದ್ದರು. ನಟ ಕಮಲ್ ಹಾಸನ್ ಅವರು `ದಶಾವತಾರಂ’ ಸಿನಿಮಾದಲ್ಲಿ ಬರೋಬ್ಬರಿ 10 ಗೆಟಪ್ಗಳಲ್ಲಿ ಕಾಣಿಸಿಕೊಂಡಿದ್ದರು. ಇದೀಗ ಕಾಲಿವುಡ್ ನಟ ಬರೋಬ್ಬರಿ 25 ಗೆಟಪ್ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.
ಕಾಲಿವುಡ್ ನಟ ವಿಕ್ರಮ್ ಅವರು 25 ಗೆಟಪ್ನಲ್ಲಿ ಕಾಣಿಸಿಕೊಳ್ಳುವ ಮೂಲಕ ಹೊಸದೊಂದು ದಾಖಲೆ ಬರೆಯುವುದಕ್ಕೆ ಮುಂದಾಗಿದ್ದಾರೆ. ಇನ್ನೂ ಹೆಸರಿಡದ ಸಿನಿಮಾವೊಂದರಲ್ಲಿ ಅವರು 25 ಅವತಾರಗಳಲ್ಲಿ ಪ್ರೇಕ್ಷಕರ ಎದುರು ಕಾಣಿಸಿಕೊಳ್ಳಲಿದ್ದಾರೆ ಎಂದು ತಿಳಿದು ಬಂದಿದೆ.
`ಇಮೈಕಾ ನೋಡಿಗಲ್’ ಖ್ಯಾತಿಯ ಅಜಯ್ ಜ್ಞಾನಮುತ್ತು ನಿರ್ದೇಶನ ಮಾಡಲಿರುವ ಈ ಸಿನಿಮಾದಲ್ಲಿ ವಿಕ್ರಮ್ ಇಂಥದ್ದೊಂದು ಸಾಹಸ ಮಾಡಲಿದ್ದಾರೆ. ವಿಕ್ರಮ್ ಅವರಿಗೆ ಸಿನಿಮಾದಲ್ಲಿ ಅಮೆರಿಕ ಮೂಲದ ಸಂಸ್ಥೆಯೊಂದು ಮೇಕಪ್ ಮಾಡಲಿದೆ. ಇವರಿಗೆ ಜೋಡಿಯಾಗಿ ಪ್ರಿಯಾ ಭವಾನಿಶಂಕರ್ ಅಭಿನಯಿಸಲಿದ್ದಾರೆ.
ಇತ್ತೀಚೆಗೆ ವಿಕ್ರಮ್ ಅಭಿನಯದ ‘ಕಡರಾಮ್ ಕೊಂಡನ್’ ಸಿನಿಮಾ ರಿಲೀಸ್ ಆಗಿದ್ದು, ಯಶಸ್ವಿಯಾಗಿ ಪ್ರದರ್ಶನ ಕಾಣುತ್ತಿದೆ. ಈ ಹಿಂದೆ 1964ರಲ್ಲಿ ತೆರೆಕಂಡಿದ್ದ ಶಿವಾಜಿ ಗಣೇಶನ್ ಅಭಿನಯದ `ನವರಾತ್ರಿ’ ಸಿನಿಮಾದಲ್ಲಿ ಅವರು 9 ಪಾತ್ರಗಳನ್ನು ನಿರ್ವಹಿಸಿದ್ದರು.
2009ರಲ್ಲಿ ನಟಿ ಪ್ರಿಯಾಂಕಾ ಅಭಿನಯದ `ವಾಟ್ಸ್ ಯುವರ್ ರಾಶಿ’ ಸಿನಿಮಾದಲ್ಲಿ 12 ಪಾತ್ರಗಳಲ್ಲಿ ಪ್ರಿಯಾಂಕಾ ಚೋಪ್ರಾ ನಟಿಸುವ ಮೂಲಕ ಮೋಡಿ ಮಾಡಿದ್ದರು. ಆಗ ಒಂದೇ ಚಿತ್ರದಲ್ಲಿ ಹೆಚ್ಚು ಗೆಟಪ್ಗಳಲ್ಲಿ ಕಾಣಿಸಿಕೊಂಡ ಕಲಾವಿದೆ ಎಂಬ ಹೆಗ್ಗಳಿಕೆಗೆ ಪ್ರಿಯಾಂಕಾ ಅವರು ಪಾತ್ರರಾಗಿದ್ದರು.