ಬೆಂಗಳೂರು: ಸಿದ್ದರಾಮಯ್ಯ (Siddaramaiah) ಏನ್ ಹೇಳ್ತಾರೋ ಅದು ಇದುವರೆಗೂ ಉಲ್ಟಾ ಆಗಿದೆ. ಅವರು ಬಿಜೆಪಿಯೇ ಅಧಿಕಾರಕ್ಕೆ ಬರೋದು, ಬೊಮ್ಮಾಯಿ (Basavaraj Bommai) ಅವರೇ ಸಿಎಂ ಆಗೋದು ಅನ್ನಲಿ, ಅದಕ್ಕೆ ಉಲ್ಟಾ ಆಗುತ್ತೆ ಎಂದು ಬಿಜೆಪಿ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಸಿ.ಟಿ ರವಿ (CT Ravi) ವ್ಯಂಗ್ಯವಾಡಿದ್ದಾರೆ.

ನಗರದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, `ಮೋದಿ (Narendra Modi) ನೂರು ಸಲ ಬಂದ್ರೂ ಕಾಂಗ್ರೆಸ್ಸೇ ಅಧಿಕಾರಕ್ಕೆ ಬರೋದು’ ಎಂಬ ಸಿದ್ದರಾಮಯ್ಯ ಹೇಳಿಕೆಗೆ ತಿರುಗೇಟು ನೀಡಿದ್ದಾರೆ. ಇದನ್ನೂ ಓದಿ: ಸಂಜೆ 7ಕ್ಕೆ ‘ಆಸ್ಕರ್’ ನಾಮಿನೇಷನ್ ಲಿಸ್ಟ್ ಪ್ರಕಟ: ಕನ್ನಡ ಸಿನಿಮಾಗಳಿಗೆ ಸಿಗಲಿದೆಯಾ ಅವಕಾಶ?

ಸಿದ್ದರಾಮಯ್ಯ ಏನ್ ಹೇಳ್ತಾರೋ ಅದು ಇದುವರೆಗೂ ಉಲ್ಟಾ ಆಗಿದೆ. ಮೋದಿಯವರು ಅವರಪ್ಪನಾಣೆಗೂ ಪಿಎಂ ಆಗಲ್ಲ ಅಂದ್ರು, ಮೋದಿ ಪಿಎಂ ಆದ್ರು. ಕಳೆದ ಸಲ ನಾನೇ ಮುಂದಿನ ಸಿಎಂ ಅಂದಿದ್ದರು, ಅಧಿಕಾರ ಕಳ್ಕೊಂಡ್ರು. ಸಿದ್ದರಾಮಯ್ಯ ಅವರಿಗೆ ಒಂದು ಕಿವಿಮಾತು ಹೇಳ್ತೀನಿ. ಅವರು ಬಿಜೆಪಿಯೇ ಅಧಿಕಾರಕ್ಕೆ ಬರೋದು, ಬೊಮ್ಮಾಯಿ ಅವರೇ ಸಿಎಂ ಆಗೋದು ಅನ್ನಲಿ, ಅದಕ್ಕೆ ಉಲ್ಟಾ ಆಗುತ್ತೆ. ಇದನ್ನು ಸಿದ್ದರಾಮಯ್ಯ ಹೇಳಿ ನೋಡಲಿ ಎಂದು ವ್ಯಂಗ್ಯವಾಡಿದ್ದಾರೆ.

ಸಿದ್ದರಾಮಯ್ಯ ಆಡಳಿತದ ಅವಧಿಯಲ್ಲಿ ಅನೇಕ ಹಗರಣಗಳು ನಡೆದವು. ಲೋಕೋಪಯೋಗಿ ಇಲಾಖೆ ಹಗರಣ, ಹಾಸಿಗೆ ದಿಂಬು ಹಗರಣ ನಡೀತು. ಎಮ್‌ಎಲ್‌ಸಿ ಗೋವಿಂದರಾಜು ಅವರ ಡೈರಿ ದೆಹಲಿಗೆ ಕಪ್ಪ ಕಾಣಿಕೆ ಕೊಟ್ಟ ಕತೆ ಹೇಳುತ್ತೆ. ಪ್ರಾಮಾಣಿಕರು ಕಪ್ಪ ಕಾಣಿಕೆಗಳನ್ನು ಕೊಡ್ತಾರಾ? ಸಿದ್ದರಾಮಯ್ಯನವರು ನಾವು ನಿರ್ದೋಷಿಗಳು, ಒಂದೇ ಒಂದು ಪೈಸೆ ಭ್ರಷ್ಟಾಚಾರ ಮಾಡಿಲ್ಲ ಅಂತ ಹೇಳ್ತಾರೆ. ಅವರು ಹೇಳಿದ್ದು ನಿಜ, ಪೈಸೆ ಲೆಕ್ಕದಲ್ಲಿ ಹಗರಣ, ಅಕ್ರಮ ನಡೆಯಲ್ಲ. ನೀವು ಪೈಸೆ ಲೆಕ್ಕದಲ್ಲಿ ಹಗರಣ ಮಾಡಿಲ್ಲ. ಮಾಡಿರೋದೆಲ್ಲ ಸಾವಿರಾರು ಕೋಟಿ ಲೆಕ್ಕದಲ್ಲಿ, ದೊಡ್ಡ ದೊಡ್ಡ ಲೆಕ್ಕದಲ್ಲಿ ಅಕ್ರಮ ಮಾಡಿದ್ದೀರಿ. ನಾವು ಸಣ್ಣೋರಿದ್ದಾಗಲೇ ಪೈಸೆ ತನ್ನ ಮೌಲ್ಯ ಕಳ್ಕೊಂಡಿತ್ತು ಎಂದು ಹೇಳಿದ್ದಾರೆ.

ಕಾಂಗ್ರೆಸ್ ಅವಧಿಯಲ್ಲಿ ದಲಿತರು, ಹಿಂದುಳಿದವರನ್ನ ವಿಭಜಿಸಲು ಮುಂದಾಗಿದ್ರು, ಇದು ಅವರಿಗೆ ತಿರುಗು ಬಾಣ ಆಯ್ತು. ಲಿಂಗಾಯತ ಧರ್ಮ ಮಾಡಲು ಹೋದ್ರು. ಇದೆಲ್ಲ ಆಗದ ಹಿನ್ನೆಲೆಯಲ್ಲಿ ಹತಾಷರಾಗಿ ಪ್ರತಿಭಟನೆ ಮಾಡಿದ್ದಾರೆ ಎಂದಿದ್ದಾರೆ. ಇದನ್ನೂ ಓದಿ: ನನಗೆ ಬೆಂಬಲ ಕೊಡಿ.. ನಾನು ನಿಮಗೆ ಹಿಂದೂ ರಾಷ್ಟ್ರ ಕೊಡುತ್ತೇನೆ – ಧೀರೇಂದ್ರ ಶಾಸ್ತ್ರಿ

`ಬಿಜೆಪಿಗೆ ರವಿ ಅನ್ನೋರದ್ದೇ ಕಾಟ ಆಗಿಹೋಗಿದೆ’ ಎಂಬ ಬಿ.ಕೆ ಹರಿಪ್ರಸಾದ್ ಹೇಳಿಕೆಗೆ ತಿರುಗೇಟು ನೀಡಿರುವ ಸಿ.ಟಿ ರವಿ, ಹರಿಪ್ರಸಾದ್ ಸಂಸದೀಯ ಕಾರ್ಯ ಪದ್ದತಿ ಬಗ್ಗೆ ಅರಿವಿಲ್ಲದಂತೆ ಮಾತಾಡ್ತಾರೆ. ಸದನದಲ್ಲಿ ಚರ್ಚೆಗೆ ತಯಾರಿದ್ರೆ, ಮಾಡಲಿ. ಅವರನ್ನು ಯಾರು ಕಟ್ಟಿ ಹಾಕಿದ್ದಾರೆ? ಹರಿಪ್ರಸಾದ್ ಸವಾಲನ್ನು ನಾನು ಸ್ವೀಕರಿಸಿದ್ದೇನೆ. ಅವರೇ ಸ್ಥಳ, ದಿನಾಂಕ ನಿಗದಿ ಮಾಡಲಿ, ನಾವು ಚರ್ಚೆಗೆ ಬರ್ತೇವೆ. ಜೈಲಿಂದ ಶುರುವಾಗಿ ಯರ‍್ಯಾರು ಎಲ್ಲೆಲ್ಲಿ ಅಡ್ಡಾಡ್ತಿದ್ದಾರೆ ಅಂತ ಬಿಚ್ಚಿಡ್ತೀವಿ ಎಂದು ಕುಟುಕಿದ್ದಾರೆ.