ರಜಿನಿಕಾಂತ್ ಭೇಟಿ ಆಗಬೇಕೆಂದ ಬ್ರಾವೋ

ಚೆನ್ನೈ: ಸೂಪರ್ ಸ್ಟಾರ್ ರಜಿನಿಕಾಂತ್ ಅವರನ್ನು ಭೇಟಿಯಾಗಬೇಕು ಎಂದು ಚೆನ್ನೈ ಸೂಪರ್ ಕಿಂಗ್ಸ್ ತಂಡ ಆಟಗಾರ ಬ್ರಾವೋ ಇಚ್ಛೆ ವ್ಯಕ್ತಪಡಿಸಿದ್ದಾರೆ.

ಐಪಿಎಲ್ ಹಲವು ಆವೃತ್ತಿಗಳಲ್ಲಿ ವೆಸ್ಟ್ ಇಂಡೀಸ್ ಆಟಗಾರ ಚೆನ್ನೈ ತಂಡದ ಪರ ಆಡುತ್ತಿದ್ದು, ಭಾರತವೆಂದರೆ ತಮಗೆ ಇಷ್ಟ ಎಂದು ಕಾರ್ಯಕ್ರಮವೊಂದರಲ್ಲಿ ಹೇಳಿದ್ದಾರೆ. ಅಲ್ಲದೇ ಇಲ್ಲಿನ ಸಂಸ್ಕೃತಿ, ಆಹಾರ ಹಾಗೂ ಜೀವನದ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

ಇದೇ ವೇಳೆ ಒಮ್ಮೆಯಾದರೂ ನಟ ರಜಿನಿಕಾಂತ್ ಅವರನ್ನು ನಾನು ಭೇಟಿ ಮಾಡಬೇಕೆಂಬ ಇಚ್ಛೆ ಇದೆ. ಅವರ ಬಗ್ಗೆ ಸಾಕಷ್ಟು ಸಂಗತಿಗಳನ್ನು ಕೇಳಿದ್ದೇನೆ. ಆದರೆ ಅವರು ನಟಿಸಿರುವ ಸಿನಿಮಾ ನೋಡಲು ಅವಕಾಶ ಲಭಿಸಿಲ್ಲ. ಇಷ್ಟರಲ್ಲೇ ಅವರ ಸಿನಿಮಾಗಳನ್ನು ನೋಡುತ್ತೇನೆ ಎಂದು ಹೇಳಿದ್ದಾರೆ.

ಸಂಗೀತ ಕ್ಷೇತ್ರದಲ್ಲೂ ತಮ್ಮ ಪ್ರತಿಭೆಯನ್ನು ತೋರಿಸಿರುವ ಬ್ರಾವೋ ಮಕ್ಕಳಿಗಾಗಿ ವಿಶೇಷ ಹಾಡೊಂದನ್ನು ಸಿದ್ಧಪಡಿಸಿದ್ದು, ನಮ್ಮ ತಂಡದ ಆಟಗಾರರ ಮಕ್ಕಳು ಈ ಹಾಡು ತಯಾರಿಸಲು ನನಗೆ ಪ್ರೇರಣೆ. ಹರ್ಭಜನ್ ಸಿಂಗ್ ಮಗಳು ನನ್ನನ್ನು ಚಾಂಪಿಯನ್ ಎಂದೇ ಕರೆಯುತ್ತಾಳೆ. ಈ ಹಾಡು ಬರೆಯಲು ಸಿಎಸ್‍ಕೆ ಅಭಿಮಾನಿ ಬಳಗ ನನಗೆ ಸಾಕಷ್ಟು ಸಹಾಯ ಮಾಡಿದೆ ಎಂದಿದ್ದಾರೆ. 2020ರ ಟೂರ್ನಿಯಲ್ಲಿ ಧೋನಿಗಾಗಿಯೇ ಹಾಡೊಂದನ್ನು ಸಿದ್ಧಪಡಿಸಲು ಈಗಾಗಲೇ ತಯಾರಿ ನಡೆಸಿದ್ದೇನೆ ಎಂದಿದ್ದಾರೆ.