ಹೈದರಾಬಾದ್: ಸಿನಿಮಾ ಥಿಯೇಟರ್ ನಲ್ಲಿ 19 ವರ್ಷದ ಯುವತಿಯೊಬ್ಬರ ಮೇಲೆ ಸ್ನೇಹಿತನೇ ಅತ್ಯಾಚಾರ ಎಸಗಿರುವ ಘಟನೆ ಹೈದರಾಬಾದ್‍ನಲ್ಲಿ ನಡೆದಿದೆ.
ಆರೋಪಿ ಕಂದಕಟ್ಲಾ ಭಿಕ್ಷಪಾತಿಯನ್ನು ಪೊಲೀಸರು ಬಂಧಿಸಿದ್ದಾರೆ. ಸಂತ್ರಸ್ತೆಗೆ ಆರೋಪಿ 2 ತಿಂಗಳ ಹಿಂದೆ ಫೇಸ್‍ಬುಕ್‍ನಲ್ಲಿ ಪರಿಚಯವಾಗಿದ್ದ. ಪರಿಚಯ ಸ್ನೇಹವಾಗಿದ್ದು, ಇಬ್ಬರು ಭೇಟಿ ಮಾಡಲು ನಿರ್ಧರಿಸಿದ್ದರು. ಇತ್ತೀಚೆಗೆ ಬಿಡುಗಡೆಯಾದ `ಪದ್ಮಾವತ್’ ಹಿಂದಿ ಸಿನಿಮಾ ನೋಡಲು ನಿರ್ಧರಿಸಿ ಸೋಮವಾರ ಇಬ್ಬರೂ ಹೈದರಾಬಾದ್‍ನ ಪ್ರಶಾಂತ್ ಥಿಯೇಟರ್ ಗೆ ಬಂದಿದ್ದಾರೆ. ಅಂದು ಥಿಯೇಟರ್ ಲ್ಲಿ ಕಡಿಮೆ ಜನರಿದ್ದರು. ಅಲ್ಲದೇ ಇವರಿಬ್ಬರ ಅಕ್ಕಪಕ್ಕ ಯಾರೂ ಕುಳಿತಿರಲಿಲ್ಲ. ಈ ಸಂದರ್ಭವನ್ನು ಆರೋಪಿ ದುರುಪಯೋಗಪಡಿಸಿಕೊಂಡು ಥಿಯೇಟರ್ ನಲ್ಲೇ ಯುವತಿ ಮೇಲೆ ಅತ್ಯಾಚಾರ ಎಸಗಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಸಂತ್ರಸ್ತೆಯ ಗುಪ್ತಾಂಗದಲ್ಲಿ ಗಾಯಗಳಾಗಿದ್ದು, ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಆರೋಪಿಯನ್ನು ಬಂಧಿಸಿ ಆತನ ವಿರುದ್ಧ ಐಪಿಸಿ ಸೆಕ್ಷನ್ 376 ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ. ನಿರ್ಲಕ್ಷ್ಯತನದ ಆರೋಪದ ಮೇಲೆ ಥಿಯೇಟರ್ ಮಾಲೀಕನ ವಿರುದ್ಧವೂ ಕ್ರಮಕ್ಕೆ ಮುಂದಾಗಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.
