ರೋಗಿಯ ಸಂಬಂಧಿಕರಿಂದ ಹಣ ಕಸಿಯಲು ಯತ್ನ – ಪೊಲೀಸ್ ವಶದಲ್ಲಿ ತಮಿಳುನಾಡಿನ ಗ್ಯಾಂಗ್

ಬೆಂಗಳೂರು: ಆಸ್ಪತ್ರೆಗೆ ಬರುವ ರೋಗಿಗಳ ಸಂಬಂಧಿಕರ ಬಳಿಯಿಂದ ಹಣ ಕಸಿದು ಪರಾರಿಯಾಗುವ ವೇಳೆ ಸಿಕ್ಕಿಬಿದ್ದ ಮೂವರು ಖದೀಮರನ್ನು ಸಾರ್ವಜನಿಕರು ಹಿಗ್ಗಾಮುಗ್ಗ ಥಳಿಸಿ ಪೊಲೀಸರಿಗೆ ಒಪ್ಪಿಸಿದ್ದಾರೆ.

ಈ ಘಟನೆ ಹೊಸೂರು ಮುಖ್ಯರಸ್ತೆಯ ನಾರಾಯಣ ಆಸ್ಪತ್ರೆ ಬಳಿ ನಡೆದಿದೆ. ರಾಜು, ಕಿರಣ್ ಹಾಗೂ ಸುರೇಶ್ ಬಂಧಿತ ಅರೋಪಿಗಳಾಗಿದ್ದು, ಈ ಮೂವರನ್ನು ಆಸ್ಪತ್ರೆಯ ಕೊಠಡಿಯಲ್ಲಿ ಕಟ್ಟಿಹಾಕಿ ಥಳಿಸಿ ನಂತರ ಅಂಬುಲೆನ್ಸ್ ನಲ್ಲಿ ಕರೆದೊಯ್ದು ಹೆಬ್ಬಗೋಡಿ ಪೊಲೀಸರಿಗೆ ಒಪ್ಪಿಸಿದ್ದಾರೆ. ಮಂಗಳವಾರ ಸಂಜೆ ಆಸ್ಪತ್ರೆಗೆ ಹಣ ಕಟ್ಟಲು ಬಂದಿದ್ದ ಮಹಿಳೆಯ ಬಳಿ ಹಣ ಕಸಿದು ಪರಾರಿಯಾಗುವ ವೇಳೆ ಸಾರ್ವಜನಿಕರ ಕೈಗೆ ಈ ಖದೀಮರು ಸಿಕ್ಕಿಬಿದ್ದಿದ್ದಾರೆ.

ಈ ಕುರಿತು ಪ್ರಕರಣ ದಾಖಲಿಸಿಕೊಂಡ ಹೆಬ್ಬಗೋಡಿ ಪೊಲೀಸರು, ಕಳ್ಳರ ಪೂರ್ಣ ಜಾತಕ ಬಾಯ್ಬಿಡಿಸುವ ಕಾರ್ಯದಲ್ಲಿ ತೊಡಗಿದ್ದಾರೆ. ಆಸ್ಪತ್ರೆಗೆ ಬರುವ ಒಂಟಿ ಮಹಿಳೆಯರನ್ನ ಟಾರ್ಗೆಟ್ ಮಾಡಿ ಕಳ್ಳತನ ಮಾಡುತ್ತಿದ್ದ ಈ ಗ್ಯಾಂಗ್, ಈ ಹಿಂದೆ 1 ಲಕ್ಷ 80 ಸಾವಿರ ರೂ. ಹಣ ಕದ್ದು ಪರಾರಿಯಾಗಿದ್ರು ಎಂದು ತಿಳಿದುಬಂದಿದೆ.

ಈ ಗ್ಯಾಂಗ್ ಸದಸ್ಯರೆಲ್ಲರೂ ಪಕ್ಕದ ತಮಿಳುನಾಡಿನವರಾಗಿದ್ದು, ಆನೇಕಲ್ ತಾಲೂಕಿನಾದ್ಯಂತ ಇರುವ ಬ್ಯಾಂಕ್ ಹಾಗು ಪ್ರತಿಷ್ಠಿತ ಅಸ್ಪತ್ರೆಗಳೇ ಇವರ ಕಾರ್ಯಕ್ಷೇತ್ರವಾಗಿದೆ ಎಂದು ಹೇಳಲಾಗುತ್ತಿದೆ. 5 ಜನರ ಈ ಗುಂಪು ಒಂದೊಂದು ಜಾಗದಲ್ಲಿ ನಿಂತು ಹಣವಿರುವವರ ಬಗ್ಗೆ ಮಾಹಿತಿ ಪಡೆದು ಕೊನೆಗೆ ಅವರ ಗಮನ ಬೇರೆಡೆ ಸೆಳೆದು ಹಣ ದೋಚಿ ಕ್ಷಣಮಾತ್ರದಲ್ಲಿ ಪರಾರಿಯಾಗುತ್ತಿದ್ದರು.