ಮುಂಬೈ: ವೃದ್ಧೆಯೊಬ್ಬರು ಸಾಯುವ ಮುಂಚೆ ತನ್ನೆಲ್ಲಾ ಆಸ್ತಿಯನ್ನ ಬಾಲಿವುಡ್ ನಟ ಸಂಜಯ್ ದತ್ ಹೆಸರಿಗೆ ವಿಲ್ ಮಾಡಿಟ್ಟಿದ್ದು, ಕುಟುಂಬಸ್ಥರು ಅಚ್ಚರಿಪಟ್ಟಿದ್ದಾರೆ.
ಮುಂಬೈನ ಮಲಬಾರ್ ಹಿಲ್ ನಿವಾಸಿಯಾದ 62 ವರ್ಷದ ವೃದ್ಧೆ ನಿಶಿ ಹರಿಶ್ಚಂದ್ರ ತ್ರಿಪಾಠಿ ಸಂಜಯ್ ದತ್ ಹೆಸರಿಗೆ ವಿಲ್ ಮಾಡಿದ್ದು, ಅನಾರೋಗ್ಯದಿಂದ ಮೃತಪಟ್ಟಿದ್ದಾರೆ. ತನ್ನ ಹೆಸರಿಗೆ ಅಭಿಮಾನಿಯೊಬ್ಬರು ಈ ರೀತಿ ಆಸ್ತಿಯನ್ನ ಬರೆದಿರುವ ವಿಷಯ ತಿಳಿದ ಸಂಜಯ್ ದತ್ ಕೂಡ ಆಶ್ಚರ್ಯಪಟ್ಟಿದ್ದಾರೆ.
ಪತ್ರಿಕೆಯೊಂದರ ವರದಿಯ ಪ್ರಕಾರ, ಸಂಜಯ್ ದತ್‍ಗೆ ಜನವರಿ 29ರಂದು ಪೊಲೀಸರು ಕರೆ ಮಾಡಿ, ನಿಮ್ಮ ಅಭಿಮಾನಿಯೊಬ್ಬರು 15 ದಿನಗಳ ಮುಂಚೆ ಸಾವನ್ನಪ್ಪಿದ್ದು, ತನ್ನ ಖಾತೆ ಹಾಗು ಬ್ಯಾಂಕ್ ಲಾಕರ್‍ನಲ್ಲಿರುವ ಎಲ್ಲಾ ಹಣವನ್ನ ನಿಮ್ಮ ಹೆಸರಿಗೆ ವಿಲ್ ಬರೆದಿದ್ದಾರೆ ಎಂದು ತಿಳಿಸಿದ್ದರು. ವೃದ್ಧೆ ಸಂಜಯ್ ದತ್ ಅವರ ದೊಡ್ಡ ಅಭಿಮಾನಿಯಾಗಿದ್ದರಿಂದ ಈ ರೀತಿ ಆಸ್ತಿಯನ್ನ ಅವರ ಹೆಸರಿಗೆ ಬರೆದಿರಬಹುದು ಎಂದುಕೊಂಡು ಪೊಲೀಸರು ನಟ ಸಂಜ್ ದತ್ ಗಮನಕ್ಕೆ ಈ ವಿಷಯವನ್ನ ತರಬೇಕೆಂದು ಅಂದುಕೊಂಡಿದ್ದರು.
ವೃದ್ಧೆ ಸಾಯುವುದಕ್ಕೆ ಕೆಲವು ತಿಂಗಳ ಹಿಂದೆ ಬ್ಯಾಂಕಿಗೆ ವಿವರವಾಗಿ ಬರೆದ ಪತ್ರ ಹಾಗು ನಾಮಿನೇಷನ್ ಅಜಿಯನ್ನ ಸಲ್ಲಿಸಿದ್ದರು. ಸಂಜಯ್ ದತ್ ಅವರ ಪಾಲಿ ಹಿಲ್ ವಿಳಾಸವನ್ನ ನೀಡಿ, ಸಂಜಯ್ ದತ್ ಅವರೇ ನಾಮಿನಿ ಎಂದು ಪತ್ರದಲ್ಲಿ ಸ್ಪಷ್ಟವಾಗಿ ತಿಳಿಸಿದ್ದರು.
ಆಸ್ತಿ ಬೇಡವೆಂದ ಸಂಜಯ್: ನಟ ಸಂಜಯ್ ದತ್ ಅಭಿಮಾನಿಯ ಆಸ್ತಿಯನ್ನ ನಿರಾಕರಿಸಿದ್ದಾರೆ. ಹಣವನ್ನ ವೃದ್ಧೆಯ ಕುಟುಂಬಸ್ಥರಿಗೆ ವಾಪಸ್ ನೀಡುವಂತೆ ವೃದ್ಧೆ ಖಾತೆ ಹೊಂದಿರುವ ವಾಲ್ಕೆಶ್ವರ್ ನ ಬ್ಯಾಂಕ್ ಆಫ್ ಬರೋಡಾ ಶಾಖೆಯ ಅಧಿಕಾರಿಗಳಿಗೆ ತಿಳಿಸಿದ್ದಾರೆ. ಕಾನೂನು ಪ್ರಕ್ರಿಯೆಯ ಪ್ರಕಾರ ವೃದ್ಧೆಯ ಎಲ್ಲಾ ಹಣ ಹಾಗೂ ಬೆಲೆಬಾಳುವ ವಸ್ತುಗಳನ್ನ ಮರಳಿ ಕುಟುಂಬಸ್ಥರಿಗೆ ವರ್ಗಾಯಿಸುವಂತೆ ನಟ ಹೇಳಿರುವುದಾಗಿ ಸಂಜಯ್ ದತ್ ಪರ ವಕೀಲರಾದ ಸುಭಾಷ್ ಜಾಧವ್ ತಿಳಿಸಿದ್ದಾರೆ.
ಸಂಜಯ್ ದತ್ ಸದ್ಯ ಸಾಹೇಬ್ ಬೀವಿ ಔರ್ ಗ್ಯಾಂಗ್‍ಸ್ಟರ್ 3 ಚಿತ್ರದ ಚಿತ್ರೀಕರಣದಲ್ಲಿ ಬ್ಯುಸಿಯಾಗಿದ್ದಾರೆ. ಸಂಜಯ್ ದತ್ ಜೀವನಾಧಾರಿತ ಚಿತ್ರವಾದ ‘ಸಂಜು’ ದಲ್ಲಿ ರಣಬೀರ್ ಕಪೂರ್ ಸಂಜಯ್ ದತ್ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ರಾಜ್‍ಕುಮಾರ್ ಹಿರಾನಿ ಈ ಚಿತ್ರವನ್ನ ನಿರ್ದೇಶಿಸಿದ್ದಾರೆ. ಜೂನ್ ವೇಳೆಗೆ ಚಿತ್ರ ಬಿಡುಗಡೆಯಾಗುವ ನಿರೀಕ್ಷೆ ಇದೆ.
