ಬಾಗಲಕೋಟೆ: ಪೋಕ್ಸೊ ಪ್ರಕರಣಕ್ಕೆ ಸಂಬಂಧಿಸಿದಂತೆ ಆರೋಪಿ ಪರ ಕೋರ್ಟ್ ನಲ್ಲಿ ಸಾಕ್ಷಿ ಹೇಳಲು ಬಂದ ಯುವತಿಗೆ ಮನೆಯವರೇ ಹಲ್ಲೆ ಮಾಡಿದ ಘಟನೆ ಬಾಗಲಕೋಟೆಯಲ್ಲಿ ನಡೆದಿದೆ.
ಯುವತಿ ಆರೋಪಿ ಯಂಕಪ್ಪ ಪರ ಬಾಗಲಕೋಟೆ ಜಿಲ್ಲಾ ನ್ಯಾಯಾಲಯಕ್ಕೆ ಸಾಕ್ಷಿ ಹೇಳಲು ಬಂದಿದ್ದಳು. ಈ ವೇಳೆ ನ್ಯಾಯಾಲಯದ ಆವರಣದ ಮುಂದೆ ಯುವತಿಯ ಚಿಕ್ಕಪ್ಪ ಹಲ್ಲೆ ಮಾಡಿದ್ದಾರೆ.
ಘಟನೆಯ ವಿವರ:
ಮೂಲತಃ ಬಾಗಲಕೋಟೆ ಜಿಲ್ಲೆಯ ಜಮಖಂಡಿ ತಾಲೂಕಿನ ಚಿಮ್ಮಡ ಗ್ರಾಮದ ನಿವಾಸಿಯಾದ ಆರೋಪಿ ಯಂಕಪ್ಪ ಸಂಬಂಧದಲ್ಲಿ ಯುವತಿಗೆ ಸಹೋದರನಾಗುತ್ತಾನೆ. ಆದರೆ ಈ ಸಂಬಂಧವನ್ನೂ ಲೆಕ್ಕಿಸದೇ ಯಂಕಪ್ಪ ಹಾಗೂ ಯುವತಿ ಒಬ್ಬರನ್ನೊಬ್ಬರು ಪ್ರೀತಿಸುತ್ತಿದ್ದರು.
ಗ್ರಾಮದ ಹಿರಿಯರು ಹಾಗೂ ಯುವತಿ ಮನೆಯವರು ಇವರ ಪ್ರೀತಿಗೆ ಒಪ್ಪಿಗೆ ನೀಡಿರಲಿಲ್ಲ. ಆದ್ದರಿಂದ ಯಂಕಪ್ಪ ಹುಡುಗಿಯ ಮನೆಯವರಿಗೆ ಗೊತ್ತಾಗದಂತೆ ಆಕೆಯನ್ನು ಕರೆದುಕೊಂಡು ಹೋಗಿದ್ದನು. ಈ ವಿಷಯ ತಿಳಿದ ಮನೆಯವರು ಯುವತಿ ಅಪ್ರಾಪ್ತ ವಯಸ್ಕಳಾಗಿದ್ದ ಕಾರಣ ಇಬ್ಬರನ್ನು ಪತ್ತೆ ಹಚ್ಚಿ ಯಂಕಪ್ಪನ ಮೇಲೆ ಬನಹಟ್ಟಿ ಠಾಣೆಯಲ್ಲಿ ದೂರು ದಾಖಲಿಸಿದ್ದರು. ಯಂಕಪ್ಪನ ಮೇಲೆ ಪೋಕ್ಸೊ ಕಾಯ್ದೆಯಡಿ ಕೇಸ್ ದಾಖಲಾಗಿತ್ತು.
ಸದ್ಯ ಯಂಕಪ್ಪ ಬೇರೆ ಹುಡುಗಿಯೊಂದಿಗೆ ಮದುವೆಯಾಗಲು ಮುಂದಾಗಿದ್ದನು. ಆದ್ದರಿಂದ ಕೋರ್ಟ್ ನಲ್ಲಿದ್ದ ಕೇಸ್ ಹಿಂಪಡೆಯುವಂತೆ ಒತ್ತಾಯಿಸಿ ಯುವತಿಯನ್ನು ಬಾಗಲಕೋಟೆ ಕೋರ್ಟ್ ಗೆ ಕರೆದೊಯ್ದಿದ್ದನು. ಇದೇ ವೇಳೆ ವಿಚಾರಣೆ ಹಿನ್ನೆಲೆಯಲ್ಲಿ ಯುವತಿಯ ಪೋಷಕರು ನ್ಯಾಯಾಲಯಕ್ಕೆ ಬಂದಿದ್ದರು.
ಈ ವೇಳೆ ಯಂಕಪ್ಪ ಪರ ಸಾಕ್ಷಿ ಹೇಳಲು ಮುಂದಾದ ಯುವತಿ ಮೇಲೆ ಹಲ್ಲೆ ಮಾಡಲಾಗಿದೆ. ನಂತರ ಸ್ಥಳದಲ್ಲಿದ್ದ ಪೊಲೀಸರು ಜಗಳ ಬಿಡಿಸಿ ಯುವತಿಯನ್ನು ರಕ್ಷಿಸಿ ಬೇರೆ ಕಡೆ ಕಳುಹಿಸಿದ್ದಾರೆ.
