ಮುಂಬೈ: ದರೋಡೆಕೋರನಿಂದ ರಾಜಕಾರಣಿಯಾಗಿ ಬದಲಾದ ಮಾಜಿ ಗ್ಯಾಂಗ್ಸ್ಟರ್ ಅರುಣ್ ಗಾವ್ಳಿ (Arun Gawli) ಬಿಎಂಸಿ ಎರಡು ದೊಡ್ಡ ಹಿನ್ನಡೆಗಳಾಗಿವೆ. ಆತನ ಇಬ್ಬರು ಪುತ್ರಿಯರೂ ಸೋಲು ಕಂಡಿದ್ದಾರೆ.
2026 ರ ಬೃಹನ್ಮುಂಬೈ ಮುನ್ಸಿಪಲ್ ಕಾರ್ಪೊರೇಷನ್ (BMC) ಚುನಾವಣೆಯಲ್ಲಿ ಗೀತಾ ಮತ್ತು ಯೋಗಿತಾ ಗಾವ್ಳಿ ಸೋತಿದ್ದಾರೆ. ಈ ಇಬ್ಬರು ಸಹೋದರಿಯರು ಆಕೆಯ ತಂದೆ ಸ್ಥಾಪಿಸಿದ ಅಖಿಲ ಭಾರತೀಯ ಸೇನೆಯ ಅಭ್ಯರ್ಥಿಗಳಾಗಿದ್ದರು. ಇದನ್ನೂ ಓದಿ: ಠಾಕ್ರೆ ಕೋಟೆ ಧ್ವಂಸ – 30 ವರ್ಷದ ಬಳಿಕ ಮುಂಬೈಗೆ ಬಿಜೆಪಿ ಮೇಯರ್?
ಬೈಕುಲ್ಲಾದಲ್ಲಿ 212 ನೇ ವಾರ್ಡ್ನಲ್ಲಿ ಸಮಾಜವಾದಿ ಪಕ್ಷದ ಅಮರೀನ್ ಶೆಹಜಾನ್ ಅಬ್ರಹಾನಿ ವಿರುದ್ಧ ಗೀತಾ ಗಾವ್ಳಿ ಸೋಲನುಭವಿಸಿದ್ದಾರೆ. ವಾರ್ಡ್ 207ರಲ್ಲಿ ಬಿಜೆಪಿಯ ರೋಹಿದಾಸ್ ಲೋಖಂಡೆ ವಿರುದ್ಧ ಯೋಗಿತಾ ಗಾವ್ಲಿ ಸೋತಿದ್ದಾರೆ. ಈ ಸಹೋದರಿಯರ ಸೋಲು ಮುಂಬೈನಲ್ಲಿ ಗಾವ್ಳಿ ಕುಟುಂಬದ ರಾಜಕೀಯ ಪ್ರಭಾವ ಕಡಿಮೆಯಾಗುತ್ತಿರುವುದನ್ನು ಸೂಚಿಸುತ್ತದೆ.
ಅರುಣ್ ಗಾವ್ಳಿ 1970 ರ ದಶಕದಲ್ಲಿ ಮುಂಬೈ ಭೂಗತ ಜಗತ್ತನ್ನು ಪ್ರವೇಶಿಸಿದ ಭಯಾನಕ ದರೋಡೆಕೋರ. ಅವನು ಮತ್ತು ಆತನ ಸಹೋದರ ಕಿಶೋರ್ ‘ಬೈಕುಲ್ಲಾ ಕಂಪನಿ’ಯ ಭಾಗವಾಗಿದ್ದರು. ಇದು ಮಧ್ಯ ಮುಂಬೈ ಪ್ರದೇಶಗಳಾದ ಬೈಕುಲ್ಲಾ, ಪರೇಲ್ ಮತ್ತು ಸಾತ್ ರಾಸ್ತಾದಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಕ್ರಿಮಿನಲ್ ಗ್ಯಾಂಗ್ ಆಗಿತ್ತು.
ಅರುಣ್ ಗಾವ್ಳಿ 1988 ರಲ್ಲಿ ಈ ಗ್ಯಾಂಗ್ ಅನ್ನು ವಹಿಸಿಕೊಂಡ. 80 ಮತ್ತು 90 ರ ದಶಕದ ಅಂತ್ಯದಲ್ಲಿ ಭೂಗತ ಪಾತಕಿ ದಾವೂದ್ ಇಬ್ರಾಹಿಂ ಗ್ಯಾಂಗ್ ಜೊತೆ ಅಧಿಕಾರಕ್ಕಾಗಿ ಹೋರಾಟದಲ್ಲಿ ತೊಡಗಿದ್ದ. 1980 ರ ದಶಕದಲ್ಲಿ, ಶಿವಸೇನೆಯ ಕುಲಪತಿ ಬಾಳಾಸಾಹೇಬ್ ಠಾಕ್ರೆ ಅವರ ರಾಜಕೀಯ ಪ್ರೋತ್ಸಾಹ ಪಡೆದ. ಆದರೆ 1990 ರ ದಶಕದ ಮಧ್ಯಭಾಗದಲ್ಲಿ ಶಿವಸೇನೆಯೊಂದಿಗಿನ ಬಿಕ್ಕಟ್ಟಿನ ನಂತರ, ತನ್ನದೇ ಆದ ರಾಜಕೀಯ ಪಕ್ಷವನ್ನು ಸ್ಥಾಪಿಸಿದ. 2004 ಮತ್ತು 2009 ರ ನಡುವೆ ಚಿಂಚ್ಪೋಕ್ಲಿ ಕ್ಷೇತ್ರದಿಂದ ಶಾಸಕನಾಗಿ ಸೇವೆ ಸಲ್ಲಿಸಿದ. ಇದನ್ನೂ ಓದಿ: ಮಹಾರಾಷ್ಟ್ರ ಚುನಾವಣೆ| ಗೌರಿ ಲಂಕೇಶ್ ಹತ್ಯೆ ಪ್ರಕರಣದ ಆರೋಪಿಗೆ ಜಯ
ಮುಂಬೈ ಶಿವಸೇನಾ ಕಾರ್ಪೊರೇಟರ್ ಕೊಲೆ ಪ್ರಕರಣದಲ್ಲಿ 2008 ರಲ್ಲಿ ಅರುಣ್ ಗಾವ್ಳಿ ಜೈಲಿಗೆ ಹೋಗಿದ್ದ. 17 ವರ್ಷಗಳ ಜೈಲುವಾಸದ ನಂತರ ಕಳೆದ ಸೆಪ್ಟೆಂಬರ್ನಲ್ಲಿ ಜಾಮೀನಿನ ಮೇಲೆ ಬಿಡುಗಡೆಯಾಗಿದ್ದಾನೆ.
