ಡ್ರಾಮಾ ಜೂನಿಯರ್ಸ್ ಚಿತ್ರಾಲಿ, ಶ್ರೀಷಾನಿಗೆ ಬಾಲಿವುಡ್‍ನಿಂದ ಆಫರ್

ಮುಂಬೈ: ಹಿಂದಿಯ ದೊಡ್ಡ ಜನಪ್ರಿಯ ಕಾರ್ಯಕ್ರಮವೊಂದರಲ್ಲಿ `ಡ್ರಾಮಾ ಜೂನಿಯರ್’ ವಿನ್ನರ್ ಚಿತ್ರಾಲಿ ಭಾಗವಹಿಸುತ್ತಿದ್ದು, ಈಗ ಈ ಕಾರ್ಯಕ್ರಮದ ಮೂಲಕ ಬಾಲಿವುಡ್‍ಗೆ ಎಂಟ್ರಿ ಕೊಡಲಿದ್ದಾರೆ.

ಚಿತ್ರಾಲಿ ಹಾಗೂ ಆರ್.ಎಸ್.ಶ್ರೀಷಾ ಶನಿವಾರ ನಡೆದ ಕಾರ್ಯಕ್ರಮದಲ್ಲಿ ವೃದ್ಧ ಪತಿ-ಪತ್ನಿಯ ಪಾತ್ರವನ್ನು ನಿರ್ವಹಿಸಿದ್ದರು. ವಯಸ್ಸಾದ ಪತಿ-ಪತ್ನಿ ನಡುವೆ ನಡೆಯುವ ಪ್ರೀತಿ, ಜಗಳ ಹಾಗೂ ಹಾಸ್ಯದ ಸನ್ನಿವೇಶಗಳನ್ನು ನಟಿಸಿ ತೋರಿಸಿದ್ದರು. ವಯಸ್ಸಾದ ಮೇಲೆ ಯಾರ ಸಹಾಯ ಪಡೆಯದೇ ವೃದ್ಧರು ಹೇಗೆ ವಾಸಿಸುತ್ತಾರೆ ಎಂಬುದು ತಮ್ಮ ಡ್ರಾಮಾದಲ್ಲಿ ತೋರಿಸಿಕೊಟ್ಟಿದ್ದರು.

ಈ ಕಾರ್ಯಕ್ರಮದಲ್ಲಿ ಚಿತ್ರಾಲಿ ಹಾಗೂ ಶ್ರೀಷಾ ನಟನೆಯನ್ನು ನೋಡಿದ ತೀರ್ಪುಗಾರರು ಸಂತೋಷಪಟ್ಟರು. ಅಲ್ಲದೇ ನಿರ್ದೇಶಕ ಒಮಂಗ್ ಚಿತ್ರಾಲಿ ಹಾಗೂ ಶ್ರೀಷಾ ಅವರಿಗೆ ತಮ್ಮ ಚಿತ್ರದಲ್ಲಿ ನಟಿಸಲು ಅವಕಾಶ ನೀಡಿದ್ದಾರೆ.

ಚಿತ್ರಾಲಿ ಹಾಗೂ ಶ್ರೀಷಾ ಅವರ ನಟನೆ ನೋಡಿ ನಟಿ ಹುಮಾ ಖುರೇಶಿ ಖುಷಿಪಟ್ಟರು. ಅಲ್ಲದೇ ಚಿತ್ರಾಲಿ ಅವರ ಎಕ್ಸ್ ಪ್ರೆಶನ್ ಬಗ್ಗೆ ಹೊಗಳಿದ್ದಾರೆ. ಅಲ್ಲದೇ ಮತ್ತೊಬ್ಬ ತೀರ್ಪುಗಾರರಾದ ನಟ ವಿವೇಕ್ ಓಬರಾಯ್ ಕನ್ನಡದಲ್ಲಿ ‘ತುಂಬಾ ತುಂಬಾ ಚೆನ್ನಾಗಿದೆ’ ಎಂದು ಹೇಳಿ ಇಬ್ಬರ ನಟನೆ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದರು.

ನಿರ್ದೇಶಕ ಒಮಂಗ್ ಇವರ ನಟನೆಯನ್ನು ನೋಡಿ ನನ್ನ ಸಿನಿಮಾದಲ್ಲಿ ನಟಿಸುತ್ತೀರಾ ಎಂದು ಬಾಲಿವುಡ್ ಚಿತ್ರದ ಆಫರ್ ನೀಡಿದ್ದರು. ಇದರಿಂದ ಖುಷಿಗೊಂಡ ಚಿತ್ರಾಲಿ ಹಾಗೂ ಶ್ರೀಷಾ ಅವರ ಚಿತ್ರದಲ್ಲಿ ನಟಿಸಲು ಒಪ್ಪಿಗೆ ಸೂಚಿಸಿದ್ದರು.

ಒಮಂಗ್ ಈಗಾಗಲೇ ಬಾಲಿವುಡ್‍ನಲ್ಲಿ ಸಾಕಷ್ಟು ಹಿಟ್ ಚಿತ್ರಗಳನ್ನು ನಿರ್ದೇಶನ ಮಾಡಿದ್ದಾರೆ. ಪ್ರಿಯಾಂಕಾ ಚೋಪ್ರಾ ಅಭಿನಯದ ‘ಮೇರಿ ಕೋಮ್’, ‘ಸರ್ಬಜಿತ್’ ಹಾಗೂ ಭೂಮಿ ಚಿತ್ರವನ್ನು ನಿರ್ದೇಶಿಸಿದ್ದಾರೆ.