ರಾಯ್ಪುರ್‌: ಛತ್ತೀಸ್‌ಗಢ (Chhattisgarh) – ತೆಲಂಗಾಣ ಗಡಿಯಲ್ಲಿ ನಕ್ಸಲರ ವಿರುದ್ಧ ನಡೆದ ಕಾರ್ಯಾಚರಣೆಯ ವೇಳೆ ಜೇನುನೊಣಗಳ ದಾಳಿಗೆ ಸಿಆರ್ಪಿಎಫ್ (CRPF) ಪಡೆಯಲ್ಲಿದ್ದ ಸ್ನಿಫರ್ ಶ್ವಾನ (Sniffer Dog) ಸಾವನ್ನಪ್ಪಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಕೊರ್ಗೋಟಾಲು ಬೆಟ್ಟಗಳಲ್ಲಿ ಏ.27 ರಂದು ನಡೆದ ಅತಿದೊಡ್ಡ ಮಾವೋವಾದಿ ವಿರೋಧಿ ಕಾರ್ಯಾಚರಣೆಯ ವೇಳೆ ಈ ಘಟನೆ ನಡೆದಿದೆ. ಕಾರ್ಯಾಚರಣೆ ವೇಳೆ, ಎರಡು ವರ್ಷದ ಹೆಣ್ಣು ನಾಯಿ ರೋಲೋ (Rolo) ಮೇಲೆ ಜೇನುನೊಣಗಳು ದಾಳಿ ನಡೆಸಿದ್ದವು. ದಾಳಿಯಿಂದ ಗಾಯಗೊಂಡಿದ್ದ ರೋಲೋಗೆ ಸ್ಥಳದಲ್ಲಿ ಚಿಕಿತ್ಸೆ ನೀಡಲಾಯಿತು. ಹೆಚ್ಚಿನ ಚಿಕಿತ್ಸೆಗಾಗಿ ಕರೆತರುವಾಗ, ಮಾರ್ಗ ಮಧ್ಯೆ ಅದು ಸಾವನ್ನಪ್ಪಿತು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಜೇನು ದಾಳಿ ನಡೆದ ವೇಳೆ, ರೋಲೋಗೆ ಸಿಆರ್ಪಿಎಫ್ ಸಿಬ್ಬಂದಿ ಪಾಲಿಥಿನ್ ಹಾಳೆಯಿಂದ ಮುಚ್ಚಿದ್ದರು. ಆದರೂ ಸಹ ಜೇನುನೊಣಗಳು ಒಳಗೆ ಹೋಗಿ ಅದನ್ನು ಕಚ್ಚಿದವು. ಇದರಿಂದ ಕಿರಿಕಿರಿಯಾಗಿ ಅದು ಹೊರಗೆ ಬಂದಿತ್ತು. ಈ ವೇಳೆ, ಜೇನುನೊಣಗಳು ಮತ್ತಷ್ಟು ದಾಳಿ ಮಾಡಿದವು ಎಂದು ಹಿರಿಯ ಅಧಿಕಾರಿಯೊಬ್ಬರು ಹೇಳಿಕೊಂಡಿದ್ದಾರೆ.
ಕಾರ್ಯಾಚರಣೆಯಲ್ಲಿ ರೋಲೋ, ಸ್ಫೋಟಕಗಳು ಮತ್ತು ಸುಧಾರಿತ ಸ್ಫೋಟಕ ಸಾಧನಗಳನ್ನು (IED) ಪತ್ತೆ ಹಚ್ಚಲು ನೆರವಾಗುತ್ತಿತ್ತು. ಮೇ 11 ರಂದು ಮುಕ್ತಾಯಗೊಂಡ 21 ದಿನಗಳ ಈ ಕಾರ್ಯಾಚರಣೆಯಲ್ಲಿ ರೋಲೋ ಪಾತ್ರ ಬಹಳ ಮುಖ್ಯವಾಗಿತ್ತು. ಸಿಆರ್ಪಿಎಫ್ ಡಿಜಿ, ಮರಣೋತ್ತರವಾಗಿ ಶ್ವಾನಕ್ಕೆ ಪದಕವನ್ನು ನೀಡಿದ್ದಾರೆ.
ಕೇಂದ್ರ ಮೀಸಲು ಪೊಲೀಸ್ ಪಡೆ (CRPF) ಮತ್ತು ಛತ್ತೀಸ್‌ಗಢ ಪೊಲೀಸ್ ಘಟಕಗಳ ನೇತೃತ್ವದಲ್ಲಿ ನಡೆದ ಈ ಕಾರ್ಯಾಚರಣೆಯಲ್ಲಿ 31 ಮಾವೋವಾದಿಗಳನ್ನು ಹತ್ಯೆಗೈಯ್ಯಲಾಗಿತ್ತು. ಈ ವೇಳೆ ಒಟ್ಟು 18 ಸೈನಿಕರು ಗಾಯಗೊಂಡಿದ್ದರು.
ಬೆಲ್ಜಿಯಂ ಶೆಫರ್ಡ್ ಶ್ವಾನ ರೋಲೋ, ಬೆಂಗಳೂರಿನ (Bengaluru) ಬಳಿಯ ಸಿಆರ್ಪಿಎಫ್ ಶ್ವಾನ ತರಬೇತಿ ಕೇಂದ್ರದಲ್ಲಿ ಪಳಗಿತ್ತು. ಕಳೆದ ವರ್ಷ ಏಪ್ರಿಲ್‌ನಲ್ಲಿ ಛತ್ತೀಸ್‌ಗಢದಲ್ಲಿ ಮಾವೋವಾದಿ ವಿರೋಧಿ ಕಾರ್ಯಾಚರಣೆಗಾಗಿ ಅದನ್ನು ನಿಯೋಜಿಸಲಾಗಿತ್ತು.
