– ಟ್ರಕ್ಗಳಿಗೆ ADAS ಸುರಕ್ಷತೆಯ ಬಲ
– ಅಪಘಾತ ತಡೆಗೆ ಎಐ ಮಾಸ್ಟರ್ ಪ್ಲಾನ್
ನವದೆಹಲಿ: ಭಾರತೀಯ ಹೆದ್ದಾರಿಗಳಲ್ಲಿ ಟ್ರಕ್ಗಳಿಂದ ಆಗುವ ಅಪಘಾತಗಳಿಗೆ (Accident) ಮುಕ್ತಿ ಹಾಡಲು ಭಾರತೀಯ ಆಟೋಮೊಬೈಲ್ ರಂಗವು ಈಗ ಕೃತಕ ಬುದ್ಧಿಮತ್ತೆ (AI) ಮತ್ತು ಎಡಾಸ್ (ADAS – Advanced Driver Assistance Systems) ತಂತ್ರಜ್ಞಾನದ ಮೊರೆ ಹೋಗಿದೆ.
ವಾಹನ ತಯಾರಕರು (OEMs) ಮತ್ತು ಫ್ಲೀಟ್ ಮ್ಯಾನೇಜ್ಮೆಂಟ್ ಸಂಸ್ಥೆಗಳು ಈ ಆಧುನಿಕ ಸುರಕ್ಷತಾ ವ್ಯವಸ್ಥೆಯನ್ನು ಕಡ್ಡಾಯಗೊಳಿಸಿದ್ದು ಇದು ಭಾರತೀಯ ಸಾರಿಗೆ ವ್ಯವಸ್ಥೆಯನ್ನೇ ಸಂಪೂರ್ಣವಾಗಿ ಬದಲಾಯಿಸಲಿದೆ.
ಎಐ ಹೇಗೆ ಕೆಲಸ ಮಾಡುತ್ತೆ?
ಚಾಲಕನ ಆಯಾಸ ಪತ್ತೆ ಹಚ್ಚುವ ವ್ಯವಸ್ಥೆ
ಭಾರತದಲ್ಲಿ ಹೆಚ್ಚಿನ ಟ್ರಕ್ ಅಪಘಾತಗಳು ಚಾಲಕರು ದೀರ್ಘಾವಧಿ ಪ್ರಯಾಣದಿಂದಾಗಿ ಆಯಾಸಗೊಳ್ಳುವುದರಿಂದ ಅಥವಾ ನಿದ್ದೆಗೆ ಜಾರುವುದರಿಂದ ಸಂಭವಿಸುತ್ತವೆ. ಎಐ ಕ್ಯಾಮೆರಾಗಳು ಚಾಲಕನ ಮುಖದ ಹಾವಭಾವ, ಕಣ್ಣಿನ ಚಲನೆ ಮತ್ತು ತಲೆಯ ನಡುಕವನ್ನು ನಿರಂತರವಾಗಿ ಗಮನಿಸುತ್ತವೆ. ಚಾಲಕನಿಗೆ ತೂಕಡಿಕೆ ಬಂದರೆ ಅಥವಾ ಗಮನ ಬೇರೆಡೆ ಸೆಳೆದರೆ ಈ ಸಿಸ್ಟಮ್ ತಕ್ಷಣವೇ ಚಾಲಕನಿಗೆ ತೀವ್ರ ಧ್ವನಿಯ ಮೂಲಕ ಎಚ್ಚರಿಕೆ ನೀಡುವುದಲ್ಲದೆ, ಫ್ಲೀಟ್ ಮ್ಯಾನೇಜರ್ಗಳಿಗೂ ಮಾಹಿತಿ ರವಾನಿಸುತ್ತದೆ.
ಮುಂಭಾಗದ ಘರ್ಷಣೆ ತಡೆ ವ್ಯವಸ್ಥೆ
ADAS ವ್ಯವಸ್ಥೆಯಲ್ಲಿ ಅಳವಡಿಸಲಾಗಿರುವ ರೇಡಾರ್, ಲಿಡಾರ್ (LiDAR) ಮತ್ತು ಸೆನ್ಸರ್ಗಳು ಟ್ರಕ್ನ ಮುಂಭಾಗದಲ್ಲಿರುವ ವಾಹನಗಳು, ಪಾದಚಾರಿಗಳು ಅಥವಾ ಅಡೆತಡೆಗಳನ್ನು ಮೊದಲೇ ಪತ್ತೆಹಚ್ಚುತ್ತವೆ. ಒಂದು ವೇಳೆ ಅಪಘಾತ ಸಂಭವಿಸುವ ಸಾಧ್ಯತೆ ದಟ್ಟವಾಗಿದ್ದರೆ ಇದು ಚಾಲಕನಿಗೆ ಮುನ್ನೆಚ್ಚರಿಕೆ ನೀಡುತ್ತದೆ. ಎಚ್ಚರಿಕೆಗೆ ಚಾಲಕ ಪ್ರತಿಕ್ರಿಯಿಸದಿದ್ದರೆ ಎಐ ತಂತ್ರಜ್ಞಾನವು ಸ್ವಯಂಚಾಲಿತವಾಗಿ ಎಮರ್ಜೆನ್ಸಿ ಬ್ರೇಕ್ (AEB) ಹಾಕುವ ಮೂಲಕ ಘರ್ಷಣೆಯ ತೀವ್ರತೆಯನ್ನು ಕಡಿಮೆ ಮಾಡುತ್ತದೆ ಅಥವಾ ಅಪಘಾತವನ್ನು ಸಂಪೂರ್ಣವಾಗಿ ತಪ್ಪಿಸುತ್ತದೆ.
ದೋಷದ ಬಗ್ಗೆ ಮುನ್ಸೂಚನೆ
ಇಂಜಿನ್ ತಾಪಮಾನ, ಬ್ರೇಕ್ ಸವೆತ ಮತ್ತು ಟೈರ್ ಒತ್ತಡದ ನೈಜ-ಸಮಯದ (Real-time) ದತ್ತಾಂಶವನ್ನು ಎಐ ಅಲ್ಗಾರಿದಮ್ಗಳು ವಿಶ್ಲೇಷಿಸುತ್ತವೆ. ಟ್ರಕ್ ರಸ್ತೆಯ ಮಧ್ಯದಲ್ಲಿ ಕೆಟ್ಟು ನಿಲ್ಲುವ ಮುನ್ನವೇ ಯಾವ ಭಾಗದಲ್ಲಿ ದೋಷವಿದೆ ಎಂಬುದನ್ನು ಇದು ಮೊದಲೇ ಪತ್ತೆ ಹಚ್ಚಿ ಅಲರ್ಟ್ ಮಾಡುತ್ತದೆ. ಇದರಿಂದ ವಾಹನದ ಜೀವಿತಾವಧಿ ಹೆಚ್ಚುವುದಲ್ಲದೆ, ದುರಸ್ತಿ ವೆಚ್ಚವೂ ಉಳಿಯಲಿದೆ. ಇದನ್ನೂ ಓದಿ: ಕಸದಿಂದ ತಯಾರಿಸಿದ ಹೈಡ್ರೋಜನ್ ಇಂಧನ ಬಳಸಿ ಓಡಲಿವೆ ದೆಹಲಿ ಬಸ್ಗಳು: ಗಡ್ಕರಿ ಘೋಷಣೆ
ಜಾರಿಗೆ ಇರುವ ಸವಾಲುಗಳೇನು?
ಇತ್ತೀಚಿನ ಸಮೀಕ್ಷೆಯೊಂದರ ಪ್ರಕಾರ 91% ರಷ್ಟು ಸಾರಿಗೆ ವಲಯದ ತಜ್ಞರು ADAS ತಂತ್ರಜ್ಞಾನ ಅತ್ಯಗತ್ಯ ಎಂದು ಒಪ್ಪಿಕೊಂಡಿದ್ದಾರೆ. ಆದರೆ ಭಾರತದಲ್ಲಿ ಇದನ್ನು ಸಂಪೂರ್ಣವಾಗಿ ಅನುಷ್ಠಾನಗೊಳಿಸಲು ಕೆಲವು ಪ್ರಮುಖ ಸವಾಲುಗಳಿವೆ.
ಭಾರತದ ಹೆದ್ದಾರಿಗಳಲ್ಲಿ ಲೇನ್ ಮಾರ್ಕಿಂಗ್ಗಳು (ರಸ್ತೆ ಗೆರೆಗಳು) ಸರಿಯಾಗಿಲ್ಲದಿರುವುದು ಎಡಾಸ್ ಸಿಸ್ಟಮ್ಗಳಿಗೆ ಕೆಲವೊಮ್ಮೆ ಗೊಂದಲ ಉಂಟುಮಾಡಬಹುದು. ವಾಣಿಜ್ಯ ವಾಹನಗಳಲ್ಲಿ ಇಂತಹ ಹೈ-ಟೆಕ್ ಸೆನ್ಸರ್ ಮತ್ತು ಕ್ಯಾಮೆರಾಗಳನ್ನು ಅಳವಡಿಸಲು ಭಾರೀ ಬಂಡವಾಳದ ಅಗತ್ಯವಿರುತ್ತದೆ.
ಪ್ರಸ್ತುತ ಭಾರತ ಸರ್ಕಾರ, ಆಟೋಮೊಬೈಲ್ ನಿಯಂತ್ರಣ ಮಂಡಳಿಗಳು ಮತ್ತು ಸ್ಟಾರ್ಕೆನ್ (Starkenn), ನೆಟ್ರಾಡೈನ್ (Netradyne) ನಂತಹ ತಂತ್ರಜ್ಞಾನ ಸಂಸ್ಥೆಗಳು ಜಂಟಿಯಾಗಿ ಭಾರತೀಯ ರಸ್ತೆಗಳಿಗೆ ಹೊಂದುವಂತಹ ಎಡಾಸ್ ತಂತ್ರಜ್ಞಾನವನ್ನು ಸ್ಥಳೀಯವಾಗಿ ಅಭಿವೃದ್ಧಿಪಡಿಸುತ್ತಿವೆ. ಮುಂಬರುವ ದಿನಗಳಲ್ಲಿ ಟ್ರಕ್ಗಳು ಪರಸ್ಪರ ಸಂವಹನ ನಡೆಸುವ (Vehicle-to-Vehicle Communication) ತಂತ್ರಜ್ಞಾನವೂ ಬರಲಿದ್ದು, ಭಾರತದ ರಸ್ತೆಗಳು ಮತ್ತಷ್ಟು ಸುರಕ್ಷಿತವಾಗಲಿವೆ.
ಏಪ್ರಿಲ್ 1, 2026 ರಿಂದ ಮಾರುಕಟ್ಟೆಗೆ ಬಿಡುಗಡೆಯಾಗುವ ನಿರ್ದಿಷ್ಟ ವಾಣಿಜ್ಯ ವಾಹನಗಳ (N2 ಮತ್ತು N3 ವರ್ಗದ ಟ್ರಕ್ಗಳು ಹಾಗೂ ಭಾರೀ ಬಸ್ಗಳು ಸೇರಿದಂತೆ) ಎಲ್ಲಾ ಹೊಸ ಮಾದರಿಗಳಿಗೆ ಈ ಸುಧಾರಿತ ಎಐ ಸುರಕ್ಷತಾ ವೈಶಿಷ್ಟ್ಯಗಳನ್ನು ಅಳವಡಿಸುವುದು ಕಡ್ಡಾಯ ಮಾಡಲಾಗಿದೆ.
ಅಕ್ಟೋಬರ್ 1, 2026 ರಿಂದ ಈ ನಿಯಮವನ್ನು ಮತ್ತಷ್ಟು ವಿಸ್ತರಿಸಲಾಗುತ್ತಿದ್ದು, ಮಾರುಕಟ್ಟೆಯಲ್ಲಿ ಈಗಾಗಲೇ ಮಾರಾಟವಾಗುತ್ತಿರುವ ಎಲ್ಲಾ ಹಳೆಯ ಹಾಗೂ ಅಸ್ತಿತ್ವದಲ್ಲಿರುವ ಮಾದರಿಗಳ ವಾಹನಗಳಿಗೂ ಈ ತಂತ್ರಜ್ಞಾನವನ್ನು ಕಡ್ಡಾಯವಾಗಿ ಅಳವಡಿಸಬೇಕಾಗುತ್ತದೆ.
ಭಾರತದಲ್ಲಿ ಪ್ರತಿವರ್ಷ ಹೆದ್ದಾರಿಗಳಲ್ಲಿ ನಡೆಯುವ ಅಪಘಾತಗಳಲ್ಲಿ ವಾಣಿಜ್ಯ ವಾಹನಗಳ ಪಾತ್ರ ದೊಡ್ಡದಾಗಿರುತ್ತದೆ. ಕೇಂದ್ರ ಸರ್ಕಾರದ ಈ ಹೊಸ ಎಐ ಕಡ್ಡಾಯ ನಿಯಮವು ಚಾಲಕರ ತಪ್ಪುಗಳನ್ನು ತಿದ್ದಿ, ಲಕ್ಷಾಂತರ ಜನರ ಜೀವ ಉಳಿಸುವಲ್ಲಿ ಮೈಲಿಗಲ್ಲಾಗಲಿದೆ ಎಂದು ಸಾರಿಗೆ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
