ಚಿಕ್ಕಬಳ್ಳಾಪುರ: ಸಾಮಾನ್ಯವಾಗಿ ಮನುಷ್ಯರು ತಮ್ಮ ಹುಟ್ಟು ಹಬ್ಬವನ್ನು ಆಚರಿಸಿಕೊಳ್ಳುವುದನ್ನು ನೀವು ನೋಡಿರಬಹುದು. ಆದರೆ ದಂಪತಿ ತಮ್ಮ ಮನೆಯಲ್ಲಿರುವ ಸೀಮೆಹಸುವಿನ ಕರುವಿನ ಹುಟ್ಟು ಹಬ್ಬವನ್ನು ಸಡಗರ ಸಂಭ್ರಮದಿಂದ ಆಚರಿಸಿ ಈಗ ಸುದ್ದಿಯಾಗಿದ್ದಾರೆ.
ಬೆಂಗಳೂರು ಗ್ರಾಮಾಂತರ ಜಿಲ್ಲೆ ಹೊಸಕೋಟೆ ತಾಲೂಕಿನ ತಿಮ್ಮಸಂದ್ರ ಗ್ರಾಮದಲ್ಲಿ ಸಾವಿತ್ರಿ-ಮುನಿಕೆಂಪಯ್ಯ ದಂಪತಿ ಸೀಮೆ ಹಸು ಕರುವಿಗೆ ಹುಟ್ಟು ಹಬ್ಬ ಆಚರಣೆ ಮಾಡಿದ್ದಾರೆ. ನೆರೆ-ಹೊರೆಯವರಿಗೆಲ್ಲಾ ಸಿಹಿ ಹಂಚಿ ಗಮನ ಸೆಳೆದಿದ್ದಾರೆ. ಸೀಮೆ ಹಸುವಿನ ಬರ್ತ್ಡೇ ಸೆಲೆಬ್ರೇಷನ್ ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ಸದ್ದು ಮಾಡಿದೆ. ಈ ಮೂಲಕ ಮೂಕ ಪ್ರಾಣಿಯ ಮೇಲೆ ತಮ್ಮಗಿರುವ ಪ್ರೀತಿ, ಮಮತೆಯನ್ನು ದಂಪತಿ ವ್ಯಕ್ತಪಡಿಸಿದ್ದಾರೆ.
ಯಾರೆಲ್ಲ ಬಂದಿದ್ದರು?
ಎರಡು ಮಿಶ್ರ ತಳಿ ಸೀಮೆ ಹಸುಗಳನ್ನಿಟ್ಟುಕೊಂಡು ಹೈನುಗಾರಿಕೆ ಜೊತೆಗೆ ಬಿಡುವಿನ ವೇಳೆಯಲ್ಲಿ ಕೂಲಿ ಕೆಲಸ ಮಾಡಿಕೊಂಡು ಜೀವನ ಸಾಗಿಸುತ್ತಿದ್ದ ಈ ದಂಪತಿ ಮನೆಯಲ್ಲಿರುವ ಸೀಮೆ ಹಸುವೊಂದು 2017ರ ಜೂನ್ 2ರಂದು ಕರುವಿಗೆ ಜನ್ಮ ನೀಡಿತ್ತು. ಮನೆಯ ಮಗಳಂತೆ ಬೆಳೆಸಿದ ಕರುವಿಗೆ 2018 ಜೂನ್ 02ರಂದು ಒಂದು ವರ್ಷ ತುಂಬಿದ ಹಿನ್ನಲೆಯಲ್ಲಿ ಗ್ರಾಮದಲ್ಲಿ ಅಕ್ಕ-ಪಕ್ಕದವರಿಗೆಲ್ಲಾ ಆಹ್ವಾನ ನೀಡಿ, ಅದರ ಹುಟ್ಟುಹಬ್ಬವನ್ನು ತುಂಬಾ ಅದ್ಧೂರಿಯಾಗಿ ಮಾಡಿದ್ದಾರೆ. ನೆಂಟರು, ಸ್ನೇಹಿತರು, ಬಂಧು ಬಳಗದವರು, ತಮ್ಮ ಅಕ್ಕಪಕ್ಕದ ಮನೆಯವರು, ಊರಿನ ಮುಖಂಡರಿಗೆ ಆಹ್ವಾನ ನೀಡಿ, ಮನೆಯನ್ನು ಶೃಂಗರಿಸಿ ಹುಟ್ಟು ಹಬ್ಬವನ್ನ ಆಚರಣೆ ಮಾಡಿದ್ದಾರೆ.
ಹುಟ್ಟುಹಬ್ಬ ಸುಂದರಿ!
ಕರು ಹುಟ್ಟಿದಾಗಲೇ ಅದಕ್ಕೆ ಸುಂದರಿ ಎಂದು ನಾಮಕರಣ ಮಾಡಿದ್ದ ಮನೆಯವರು ಸಂಜೆಯಾಗುತ್ತಿದ್ದಂತೆ ಸುಂದರಿಯನ್ನು ತೊಳೆದು ಕುಂಕುಮವಿಟ್ಟು ಪೂಜೆ ಮಾಡಿದರು. ಕೊರಳಿಗೊಂದು ಹಾರ, ಮೈತುಂಬ ಬಲೂನ್ಗಳನ್ನು ಕಟ್ಟಿ ಸಿಂಗರಿಸಿದ್ದರು. ಸುಂದರಿ ಹೆಸರು ಬರೆಯಿಸಿ ಸಿದ್ಧಪಡಿಸಿಕೊಂಡು ತಂದಿದ್ದ ಕೇಕ್, ಎಲೆ ಅಡಿಕೆ, ಬಾಳೆಹಣ್ಣು ಇತ್ಯಾದಿ ತಿಂಡಿ ತಿನ್ನಿಸುಗಳನ್ನಿಟ್ಟು, ಟೇಬಲ್ ಮುಂದೆ ಸುಂದರಿಯನ್ನು ತಂದು ನಿಲ್ಲಿಸಿದ್ದರು. ನಂತರ ಸೇರಿದ್ದ ಜನ ಸಮೂಹದ ನಡುವೆ ಬರ್ತ್ ಡೇಯನ್ನು ಭರ್ಜರಿಯಾಗಿ ಆಚರಣೆ ಮಾಡಿ ಖುಷಿಪಟ್ಟಿದ್ದಾರೆ.
ಬರ್ತ್ ಡೇ ಪಾರ್ಟಿಯನ್ನು ವೀಕ್ಷಣೆ ಮಾಡಲು ಗ್ರಾಮಸ್ಥರು ಹೆಚ್ಚಿನ ಸಂಖ್ಯೆಯಲ್ಲಿ ಸೇರಿ ಸುಂದರಿಗೆ ಶುಭ ಹಾರೈಸಿದರು. ತಮ್ಮ ಮನೆಯ ಮಗಳ ಹುಟ್ಟು ಹಬ್ಬದಂತೆ ಬಂದವರಿಗೆ ತಾಂಬೂಲ, ಅರಿಶಿಣ- ಕುಂಕುಮ ಸಿಹಿ ಕೊಟ್ಟು ಹುಟ್ಟು ಹಬ್ಬಕ್ಕೆ ಬಂದಿದ್ದಕ್ಕೆ ಧನ್ಯವಾದ ಅರ್ಪಿಸಿ ಕಳುಹಿಸಿಕೊಟ್ಟಿದ್ದಾರೆ.
ಸುಂದರಿ ಕರುವಿನ ಬರ್ತಡೆಯಲ್ಲಿ ಪಾಲ್ಗೊಂಡಿದ್ದ ಗ್ರಾಮ ಯುವಕರು ಬರ್ತ್ ಡೇಯ ಸಂಭ್ರಮವನ್ನು ಸೋಶಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡು ಶುಭ ಹಾರೈಸಿದ್ದಾರೆ. ಫೇಸ್ಬುಕ್ ವಾಲ್ನಲ್ಲಿ ಸುಂದರಿ ಕರುವಿನ ಫೋಟೋ ಸಮೇತ ಬರ್ತ್ ಡೇ ಚಿತ್ರವನ್ನು ಹಲವರು ಶೇರ್ ಮಾಡಿದ್ದು, ಬಹಳಷ್ಟು ಮೆಚ್ಚುಗೆನಳನ್ನ ವ್ಯಕ್ತಪಡಿಸಿ ಶುಭಾಶಯಗಳನ್ನ ಕೋರಿದ್ದಾರೆ. ಇನ್ನೂ ಕೆಲವರು ಹುಬ್ಬೇರಿಸಿ ಶುಭಾಶಯದ ಕಾಮೆಂಟ್ ಕೂಡ ಮಾಡಿದ್ದಾರೆ.
