ನವದೆಹಲಿ: ವಿಮಾನಗಳಲ್ಲಿನ ಶೇ. 60 ರಷ್ಟು ಸೀಟುಗಳ ಆಯ್ಕೆಯನ್ನು ಉಚಿತಗೊಳಿಸುವ ತನ್ನ ಹಿಂದಿನ ಆದೇಶವನ್ನು ಕೇಂದ್ರ ನಾಗರಿಕ ವಿಮಾನಯಾನ ಸಚಿವಾಲಯವು ತಾತ್ಕಾಲಿಕವಾಗಿ ಅಮಾನತುಗೊಳಿಸಿದೆ.
ಸಚಿವಾಲಯವು(Civil Aiation Mnistry) ಮಾರ್ಚ್ 18 ರಂದು ನಿರ್ದೇಶನ ಹೊರಡಿಸಿ ಏಪ್ರಿಲ್ 20 ರಿಂದ ಈ ನಿಯಮ ಅನುಷ್ಠಾನಗೊಳಿಸುವಂತೆ ನಾಗರಿಕ ವಿಮಾನಯಾನ ಮಹಾನಿರ್ದೇಶನಾಲಯಕ್ಕೆ (DGCA) ಸೂಚಿಸಿತ್ತು. ಆದರೆ ವಿಮಾನಯಾನ ಕಂಪನಿಗಳು ಈ ನಿಯಮವನ್ನು ತೀವ್ರವಾಗಿ ವಿರೋಧಿಸಿದ್ದವು.
ಇದು ಟಿಕೆಟ್ ದರ ನಿರ್ಧಾರ ವ್ಯವಸ್ಥೆಯನ್ನು ಅಸ್ತವ್ಯಸ್ತಗೊಳಿಸುತ್ತದೆ ಮತ್ತು ವಾಣಿಜ್ಯ ಕಾರ್ಯಾಚರಣೆಗಳಿಗೆ ತೊಂದರೆ ಉಂಟುಮಾಡುತ್ತದೆ ಎಂದು ಕಂಪನಿಗಳು ವಾದಿಸಿದ್ದವು. ಈ ವಿರೋಧದ ನಡುವೆ ಸಚಿವಾಲಯವು ಸಮಗ್ರ ಪರಿಶೀಲನೆ ಅಗತ್ಯವಿದೆ ಎಂದು ಹೇಳಿ ನಿಯಮವನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಿದೆ.
ಈ ನಿರ್ದೇಶನ ಹೊರಡಿಸಿದ ಮೂರು ವಾರಗಳೊಳಗೆಯೇ ಈ ನಿಯಮವನ್ನು ಹಿಂಪಡೆಯಲಾಗಿದೆ. ಪ್ರಸ್ತುತ ವ್ಯವಸ್ಥೆಯಲ್ಲಿ ವಿಮಾನದಲ್ಲಿ ಕೇವಲ 20% ಸೀಟುಗಳನ್ನು ಮಾತ್ರ ಉಚಿತವಾಗಿ ಆಯ್ಕೆ ಮಾಡಿಕೊಳ್ಳಬಹುದು. ಉಳಿದ ಸೀಟುಗಳಿಗೆ 200 ರೂ. ಗಳಿಂದ 2100 ರೂ.ಗಳವರೆಗೆ ಶುಲ್ಕ ವಿಧಿಸಲಾಗುತ್ತದೆ.
60% ಉಚಿತ ಸೀಟು ಆಯ್ಕೆ ನಿಯಮ ಜಾರಿಗೆ ಬಂದಿದ್ದಲ್ಲಿ ವಿಮಾನ ಕಂಪನಿಗಳ ಸೀಟು ಆಯ್ಕೆ ಶುಲ್ಕದಿಂದ ಬರುವ ಆದಾಯ ಗಣನೀಯವಾಗಿ ಕುಸಿಯುವ ಸಾಧ್ಯತೆ ಇತ್ತು.
ಕಂಪನಿಗಳ ವಾದ ಏನಿತ್ತು?
ಸೀಟು ಆಯ್ಕೆ ಶುಲ್ಕದಿಂದ ಬರುವ ಆದಾಯ ಸ್ಥಗಿತಗೊಂಡರೆ, ಆ ನಷ್ಟವನ್ನು ಸರಿದೂಗಿಸಲು ಮೂಲ ಟಿಕೆಟ್ ದರಗಳನ್ನು ಹೆಚ್ಚಿಸಬೇಕಾಗುತ್ತದೆ. ಇದು ಕಡಿಮೆ ದರದಲ್ಲಿ ಪ್ರಯಾಣಿಸಲು ಬಯಸುವ ಪ್ರಯಾಣಿಕರಿಗೆ ಹೊರೆಯಾಗಲಿದೆ.
ಕಡಿಮೆ ವೆಚ್ಚದ ವಿಮಾನಯಾನ ಸಂಸ್ಥೆಗಳಿಗೆ (LCC) ಸೀಟು ಆಯ್ಕೆಯಂತಹ ಹೆಚ್ಚುವರಿ ಸೇವೆಗಳಿಂದ ಬರುವ ಆದಾಯವು ಬಹಳ ಮುಖ್ಯವಾಗಿದೆ. ಈ ಆದಾಯ ಕಡಿಮೆಯಾದರೆ ಕಂಪನಿಗಳ ಆರ್ಥಿಕ ಲಾಭಾಂಶದ ಮೇಲೆ ತೀವ್ರ ಪರಿಣಾಮ ಬೀರುತ್ತದೆ.
ಯಾವ ಸೀಟಿಗೆ ಎಷ್ಟು ದರ ನಿಗದಿಪಡಿಸಬೇಕು ಎಂಬುದು ಕಂಪನಿಗಳ ವಾಣಿಜ್ಯ ನಿರ್ಧಾರವಾಗಿದ್ದು, ಇದರಲ್ಲಿ ಸರ್ಕಾರ ಕನಿಷ್ಠ ಮಿತಿಯನ್ನು ಹೇರುವುದು ಸರಿಯಲ್ಲ. ಪಶ್ಚಿಮ ಏಷ್ಯಾದ ಸಂಘರ್ಷಗಳಿಂದಾಗಿ ವಿಮಾನ ಇಂಧನ (ATF) ಬೆಲೆಗಳು ಏರಿಕೆಯಾಗುತ್ತಿದ್ದು, ಇಂತಹ ಸಮಯದಲ್ಲಿ ಆದಾಯ ತಗ್ಗಿಸುವ ನಿಯಮಗಳು ಕಾರ್ಯಾಚರಣೆಗೆ ತೊಂದರೆ ನೀಡುತ್ತವೆ ಎಂದು ವಿಮಾನಯಾನ ಒಕ್ಕೂಟ (FIA) ಪತ್ರ ಬರೆದಿತ್ತು.
