ಭಾನುವಾರ ಬಂತೆಂದರೆ ಸಾಕು ನಾಲಿಗೆಗೆ ರುಚಿ ರಚಿಯಾದ ಅಡುಗೆಗಳು ಬೇಕೇ ಬೇಕು. ಹಾಗಂತ ರುಚಿ ರುಚಿಯಾದ ಅಡುಗೆಯನ್ನು ಸವಿಯಲು ಹೋಟೆಲ್‍ಗೆ ಹೋಗೋದೇನು ಬೇಕಾಗಿಲ್ಲ. ಬದಲಿಗೆ ನಿಮ್ಮ ಮನೆಯಲ್ಲೇ ಅತ್ಯಂತ ಸರಳವಾದ ಮತ್ತು ರುಚಿ ರುಚಿಯಾದ ಅಡುಗೆಯನ್ನು ಮಾಡಬಹುದು. ಅದಕ್ಕೆ ಈ ಚೈನೀಸ್ ಫಿಶ್ ಕರ್ರಿಯೇ ಸಾಕ್ಷಿ.
ಚೈನೀಸ್ ಫಿಶ್ ಕರ್ರಿ ಮಾಡಲು ಬೇಕಾಗು ಸಾಮಾಗ್ರಿಗಳು
* 4 ಮೀನು (ಮಧ್ಯಮಗಾತ್ರದ ಮೀನು)
* ಶುಂಠಿ ಮತ್ತು ಬೆಳ್ಳುಳ್ಳಿ ಪೇಸ್ಟ್ 2 ಟೇಬಲ್ ಸ್ಪೂನ್
* ಈರುಳ್ಳಿ 4
* ಕಾಳು ಮೆಣಸಿನ ಪುಡಿ 2 ಟೇಬಲ್ ಸ್ಪೂನ್
* ಧನಿಯಾ ಪುಡಿ 2 ಟೇಬಲ್ ಸ್ಪೂನ್
* ಅರಿಶಿನ ಪುಡಿ ಒಂದು ಚಿಟಿಕೆ
* ಕೆಂಪು ಮೆಣಸಿನ ಪುಡಿ 2 ಟೇಬಲ್ ಸ್ಪೂನ್
* ಹುಣಸೆ ಹುಳಿ ರಸ ಅರ್ಧ ಕಪ್
* ಟೊಮೆಟೊ 2
* ಉಪ್ಪು
* ಕೊತ್ತಂಬರಿ ಸೊಪ್ಪು
* ಕೊಬ್ಬರಿ ಎಣ್ಣೆ 2 ಚಮಚ
* ಕುಕ್ಕಿಂಗ್ ವೈನ್ ಅರ್ಧ ಟೆಬಲ್ ಸ್ಪೂನ್
ಚೈನೀಸ್ ಫಿಶ್ ಕರ್ರಿ ಮಾಡುವ ವಿಧಾನ
* ಮೊದಲು ಒಂದು ಜಾರ್‍ಗೆ ಹೆಚ್ಚಿದ 2 ಈರುಳ್ಳಿ, 1 ಟೇಬಲ್ ಸ್ಪೂನ್ ಧನಿಯಾಪುಡಿ, 1 ಟೇಬಲ್ ಸ್ಪೂನ್ ಕಾಳು ಮೆಣಸಿನ ಪುಡಿ, 1 ಟೇಬಲ್ ಸ್ಪೂನ್ ಕೆಂಪು ಮೆಣಸಿನ ಪುಡಿ ಮತ್ತು ಹೆಚ್ಚಿದ 2 ಟೊಮೆಟೊವನ್ನು ಮಕ್ಸಿಗೆ ಹಾಕಿ ರುಬ್ಬಿಕೊಳ್ಳಿ.
* ಒಂದು ದೊಡ್ಡ ಪ್ಯಾನ್‍ಗೆ ಕೊಬ್ಬರಿ ಎಣ್ಣೆ ಹಾಕಿ ಬಿಸಿ ಆದ ನಂತರ ಅದಕ್ಕೆ ಉಳಿದ ಈರುಳ್ಳಿ, ಶುಂಠಿ ಮತ್ತು ಬೆಳ್ಳುಳ್ಳಿ ಪೇಸ್ಟ್ ಹಾಕಿ ಕಂದು ಬಣ್ಣ ಬರುವವರೆಗೆ ಹುರಿಯಿರಿ.
* ನಂತರ ಮಿಕ್ಸಿಯಲ್ಲಿ ಕಡೆದ ಮಿಶ್ರಣವನ್ನು ಹಾಕಿ ಸಣ್ಣ ಉರಿಯಲ್ಲಿ ಕುದಿಸಿ.
* ಅದಕ್ಕೆ ಹುಣಸೆ ರಸವನ್ನು ಹಾಕಿ ಮಿಶ್ರಣ ಮಾಡಿ ಅದಕ್ಕೆ ಸ್ವಲ್ಪ ನೀರು ಸೇರಿಸಿ ತಿರುವಿ.
* ನಂತರ ಅದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪನ್ನು ಹಾಕಿ.
* ನಂತರ ಕುದಿಯುತ್ತಿರುವಾಗ ತೊಳೆದ ಮೀನನ್ನು ಹಾಕಿ ಮಿಕ್ಸ್ ಮಾಡಿ ಪ್ಯಾನ್ ಮುಚ್ಚಳವನ್ನು ಮುಚ್ಚಿ 10 ನಿಮಿಷ ಸಣ್ಣ ಉರಿಯಲ್ಲಿ ಬೇಯಿಸಿ.
* ನಂತರ ಮೀನು ಬೆಂದ ಬಳಿಕ ಅದನ್ನು ಒಂದು ಬೌಲ್‍ಗೆ ಹಾಕಿ ಅದರ ಮೇಲೆ ಕೊತ್ತಂಬರಿ ಸೊಪ್ಪನ್ನು ಉದುರಿಸಿ ಅದಕ್ಕೆ ಮುಚ್ಚಳವನ್ನು ಮುಚ್ಚಿ ಅರ್ಧ ಗಂಟೆ ಬಿಡಿ.
* ನಂತರ ಆ ಮುಚ್ಚಳವನ್ನು ತೆಗೆದರೆ ಚೈನೀಸ್ ಫಿಶ್ ಕರ್ರಿ ಸವಿಯಲು ಸಿದ್ಧ.
