ದರ್ಶನ್ ಕೈಯಿಂದ ಲಾಂಚ್ ಆಗಲಿದೆ ನನ್ನ ಪ್ರಕಾರ ಟ್ರೇಲರ್!

ಬೆಂಗಳೂರು: ತಾವು ಸಾಲುಸಾಲಾಗಿ ಅದೆಷ್ಟು ಚಿತ್ರಗಳಲ್ಲಿ ಬ್ಯುಸಿಯಾಗಿದ್ದರೂ ಹೊಸಬರ ತಂಡಗಳ ನಡೆಗಳತ್ತ ಸದಾ ಒಂದು ಕಣ್ಣಿಟ್ಟು, ಸಕಾಲಿಕವಾಗಿ ಅಂಥಾ ತಂಡಗಳಿಗೆ ಸಾಥ್ ಕೊಟ್ಟು ಪೊರೆಯುತ್ತಾ ಬಂದಿರುವವರು ಚಾಲೆಂಜಿಂಗ್ ಸ್ಟಾರ್ ದರ್ಶನ್. ಇದುವರೆಗೂ ಅದೆಷ್ಟೋ ಹೊಸಬರು ಅವರ ಸಹಾಯದಿಂದಲೇ ನಿರಾಳವಾಗಿದ್ದಾರೆ. ಗೆದ್ದು ದಡ ಸೇರಿದ್ದಾರೆ. ಇದೀಗ ದೊಡ್ಡ ಮಟ್ಟದಲ್ಲಿ ಸೌಂಡ್ ಮಾಡುತ್ತಾ ಇದೇ ಇಪ್ಪತ್ಮೂರರಂದು ಬಿಡುಗಡೆಗೆ ರೆಡಿಯಾಗಿರೋ ನನ್ನಪ್ರಕಾರ ಚಿತ್ರಕ್ಕೂ ದರ್ಶನ್ ಸಾಥ್ ಕೊಟ್ಟಿದ್ದಾರೆ. ಈ ಚಿತ್ರದ ಟ್ರೇಲರ್ ಅನ್ನು ದರ್ಶನ್ ಬಿಡುಗಡೆಗೊಳಿಸಲಿದ್ದಾರೆ.

ಇಂಥಾದ್ದೊಂದು ಖುಷಿಯ ಸಂಗತಿಯನ್ನು ಚಿತ್ರತಂಡವೇ ಜಾಹೀರು ಮಾಡಿದೆ. ಆ ಪ್ರಕಾರವಾಗಿ ಹೇಳೋದಾದರೆ ಇದೇ ಹದಿನೈದನೇ ತಾರೀಕು ಗುರುವಾರ ಚಾ.ಲೆಂಜಿಂಗ್ ಸ್ಟಾರ್ ದರ್ಶನ್ ನನ್ನ ಪ್ರಕಾರದ ಟ್ರೇಲರ್ ಲಾಂಚ್ ಮಾಡಲಿದ್ದಾರೆ. ಆರಂಭದಿಂದಲೂ ದರ್ಶನ್ ಅವರು ನವ ನಿರ್ದೇಶಕ ವಿನಯ್ ಅವರ ಚೊಚ್ಚಲ ಚಿತ್ರವಾದ ನನ್ನ ಪ್ರಕಾರವನ್ನು ಗಮನಿಸುತ್ತಾ ಬಂದಿದ್ದರಂತೆ. ಅದರ ಕ್ರಿಯೇಟಿವಿಟಿ, ಅದು ಹುಟ್ಟು ಹಾಕಿರೋ ಕ್ರೇಜ್ ಕಂಡು ಖುಷಿಗೊಂಡಿರೋ ದರ್ಶನ್ ಆಡಿಯೋ ಲಾಂಚ್ ಮಾಡಲು ಒಪ್ಪಿಕೊಂಡಿದ್ದಾರೆ. ಈ ಚಿತ್ರತಂಡಕ್ಕೆ ಸದಾ ಸಾಥ್ ನೀಡುವ ಭರವಸೆಯನ್ನೂ ಕೊಟ್ಟಿದ್ದಾರೆ.

ಚಾಲೆಂಜಿಂಗ್ ಸ್ಟಾರ್ ಸಾಥ್ ಸಿಕ್ಕಿತೆಂದರೆ ಆನೆಬಲ ಸಿಕ್ಕಷ್ಟೇ ಚಿತ್ರತಂಡಗಳು ಸಂಭ್ರಮಿಸುತ್ತವೆ. ಅದರಲ್ಲಿಯೂ ಹೊಸ ಅಲೆಯ, ಹೊಸ ಬಗೆಯ ಚಿತ್ರವಾದ ನನ್ನಪ್ರಕಾರ ಚಿತ್ರತಂಡವೂ ಕೂಡಾ ಅಂಥಾದ್ದೇ ಸಂಭ್ರಮದಲ್ಲಿದೆ. ಪ್ರಿಯಾಮಣಿ ಮುಖ್ಯಭೂಮಿಕೆಯಲ್ಲಿ ನಟಿಸಿರೋ ಈ ಚಿತ್ರದಲ್ಲಿ ಕಿಶೋರ್, ಮಯೂರಿ ಮುಂತಾದವರೂ ನಟಿಸಿದ್ದಾರೆ. ಈಗಾಗಲೇ ಪೋಸ್ಟರ್, ಹಾಡು ಮುಂತಾದವುಗಳಿಂದ ಬಹುನಿರೀಕ್ಷಿತ ಚಿತ್ರವಾಗಿಯೂ ನನ್ನಪ್ರಕಾರ ಹೊರ ಹೊಮ್ಮಿದೆ. ಇದೇ ಇಪ್ಪತ್ಮೂರರಂದು ಬಿಡುಗಡೆಯಾಗಲಿರೋ ಈ ಚಿತ್ರಕ್ಕಾಗಿ ಪ್ರೇಕ್ಷಕರು ಕಾತರರಾಗಿದ್ದಾರೆ. ಇದೀಗ ಚಾಲೆಂಜಿಂಗ್ ಸ್ಟಾರ್ ದರ್ಶನ ಅವರೇ ಸಾಥ್ ಕೊಟ್ಟಿರೋದರಿಂದ ನನ್ನಪ್ರಕಾರದ ಗೆಲುವು ಮತ್ತಷ್ಟು ನಿಚ್ಚಳವಾಗಿದೆ.