ಲಂಡನ್: ಟೈರ್ ಇಲ್ಲದಿದ್ದರೂ ಕಾರ್ ಓಡಿಸಿಕೊಂಡು ಹೋಗುತ್ತಿದ್ದ ಪಾನಮತ್ತ ಚಾಲಕನನ್ನು ಪೊಲೀಸರು ಬಂಧಿಸಿದ್ದಾರೆ.
ಇಂಗ್ಲೆಂಡಿನ ಸೌತ್ ಯಾರ್ಕ್ಶೈರ್ ಪ್ರದೇಶದಲ್ಲಿ ಘಟನೆ ನಡೆದಿದ್ದು, ಕುಡುಕ ಕಾರು ಚಾಲಕನನ್ನು ಪೊಲೀಸರು ಬಂಧಿಸಿದ್ದಾರೆ. ಕುಡಿದ ಮತ್ತಿನಲ್ಲಿದ್ದ ಚಾಲಕ ಕಾರಿನಲ್ಲಿ ಟೈರ್ ಇದೆಯೇ ಇಲ್ಲವೇ ಎಂಬುದನ್ನೂ ಪರಿಶೀಲಿಸದೇ ಹಾಗೇ ಚಲಾಯಿಸಿಕೊಂಡು ಹೋಗಿದ್ದಾನೆ.
https://twitter.com/SYP_Specials/status/1205720171949764609?
ಘಟನೆಯ ವಿಡಿಯೋವನ್ನು ಸೌತ್ ಯಾರ್ಕ್ಶೈರ್ ಪೊಲೀಸರು ಟ್ವಿಟ್ಟರಿನಲ್ಲಿ ಹಂಚಿಕೊಂಡಿದ್ದು, ವಿಡಿಯೋ ನೋಡಿದ ನೆಟ್ಟಿಗರು ಬೆಚ್ಚಿಬಿದ್ದಿದ್ದಾರೆ. ವಿಡಿಯೋದಲ್ಲಿ ಕಾರ್ ಚಕ್ರದಲ್ಲಿ ಟೈರ್ ಇಲ್ಲದ್ದ ಚಿತ್ರವನ್ನು ತೋರಿಸಲಾಗಿದೆ. ಅಲ್ಲದೆ ಚಾಲಕನ ಪರವಾನಿಗೆಯ ಅವಧಿ ಮುಗಿದಿತ್ತು. ವಾಹನಕ್ಕೆ ವಿಮೆ ಸಹ ಇರಲಿಲ್ಲ. ಹೀಗಾಗಿ ಚಾಲಕನನ್ನು ಬಂಧಿಸಲಾಗಿದೆ. ಕುಡಿದ ಮತ್ತಿನಲ್ಲಿದ್ದ ಡ್ರೈವರ್ ಕಾರು ಚಕ್ರದಲ್ಲಿ ಟೈರ್ ಇದೆಯೇ ಎಂಬುದನ್ನು ಪರಿಶೀಲಿಸಲು ಸಹ ಮರೆತಿದ್ದಾನೆ ಎಂದು ಪೊಲೀಸರು ಟ್ವೀಟ್ ಮಾಡಿದ್ದಾರೆ.
ಚಾಲಕ ಸಿಕ್ಕಾಪಟ್ಟೆ ಕುಡಿದಿದ್ದರಿಂದ ಸ್ಟೇರಿಂಗ್ ಸಹ ನಿಯಂತ್ರಣದಲ್ಲಿರಲಿಲ್ಲ, ಪರವಾನಗಿ ಹೊಂದಿರಲಿಲ್ಲ. ಅಲ್ಲದೆ ಪ್ರಕರಣ ದಾಖಲಿಸಿದ್ದರ ಕುರಿತು ಈ ಹಿಂದೆ ಕೋರ್ಟಿಗೆ ಹಾಜರಾಗುವುದನ್ನು ಸಹ ತಪ್ಪಿಸಿದ್ದ ಎಂದು ಪೊಲೀಸರು ಟ್ವಿಟ್ಟರಿನಲ್ಲಿ ಬರೆದುಕೊಂಡಿದ್ದಾರೆ.
ಆರೋಪಿಗೆ ದಂಡ ಹಾಗೂ 6 ತಿಂಗಳು ಜೈಲು ಶಿಕ್ಷೆ ವಿಧಿಸಲಾಗಿದೆ. ಅಲ್ಲದೆ ಒಂದು ವರ್ಷ ವಾಹನ ಚಾಲನೆ ಮಾಡದಂತೆ ನಿಷೇಧ ಹೇರಲಾಗಿದೆ ಎಂದು ಸುದ್ದಿ ಸಂಸ್ಥೆ ವರದಿ ಮಾಡಿದೆ.
