ನಿವೇಶನ ವಿವಾದ ಮಹಿಳೆಯರ ನಡುವೆ ಮಾರಾಮಾರಿ

ಚಿಕ್ಕಬಳ್ಳಾಪುರ: ನಿವೇಶನ ವಿವಾದ ವಿಚಾರಕ್ಕೆ ಸಂಬಂಧಿಸಿದಂತೆ ಇಬ್ಬರು ಮಹಿಳೆಯರು ಮಾರಾಮಾರಿ ಮಾಡಿಕೊಂಡಿರುವ ಘಟನೆ ಚಿಕ್ಕಬಳ್ಳಾಪುರ ಜಿಲ್ಲೆಯ ಶಿಡ್ಲಘಟ್ಟ ತಾಲೂಕಿನ ಮುತ್ತೂರು ಗ್ರಾಮದಲ್ಲಿ ನಡೆದಿದ್ದು, ಈ ವಿಡಿಯೋ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.

ಫೆಬ್ರವರಿ 07ರಂದು ಈ ಘಟನೆ ನಡೆದಿದ್ದು, ಗ್ರಾಮದ ಮಂಜುಳಾ ಹಾಗೂ ಅನುಪಮಾ ಎಂಬವರು ನಾನಾ ನೀನಾ ಎಂದು ಕಿತ್ತಾಡಿಕೊಂಡಿದ್ದಾರೆ. ಅಸಲಿಗೆ ಹಳೆಯ ಮನೆಯ ಜಾಗವನ್ನು ಖರೀದಿ ಮಾಡಿದ್ದ ಅನುಪಮಾ ಕುಟುಂಬಸ್ಥರು ಕೆಡವಿ ಅಲ್ಲಿ ಹೊಸ ಮನೆ ನಿರ್ಮಾಣ ಮಾಡಿಕೊಂಡಿದ್ದಾರೆ. ಇನೂ ಸ್ವಲ್ಪ ಜಾಗ ಉಳಿದಿದ್ದು, ಆ ಜಾಗದಲ್ಲಿ ಶೀಟ್‍ಗಳನ್ನು ಹಾಕಿಕೊಳ್ಳುವುದಕ್ಕೆ ಸಿದ್ಧತೆ ಮಾಡಿಕೊಂಡಿದ್ದರು.

ಮೊದಲಿನಿಂದಲೂ ಈ ಜಾಗ ತನಗೆ ಸೇರಬೇಕು ಎಂದು ಮಂಜುಳಾ, ಅನುಪಮಾ ಕುಟುಂಬಸ್ಥರ ಜೊತೆ ಜಗಳ ಮಾಡುತ್ತಿದ್ದಳು ಎನ್ನಲಾಗಿದೆ. ಇನ್ನೂ ಫೆಬ್ರವರಿ 07ರಂದು ಸಹ ಖಾಲಿ ಜಾಗದಲ್ಲಿ ಹಸು ಕಟ್ಟಿ ಹಾಕೋಕೆ ಬಂದ ಮಂಜುಳಾ ಹಾಗೂ ಅನುಪಮಾ ನಡುವೆ ಜಗಳ ನಡೆದಿದೆ. ಈ ಜಗಳದ ವಿಡಿಯೋವನ್ನು ಮಂಜುಳಾ ಮಗ ತನ್ನ ಮೊಬೈಲ್ ಸೆರೆ ಹಿಡಿದ್ದಾನೆ ಎನ್ನಲಾಗಿದೆ.

ಈ ಘಟನೆಯಲ್ಲಿ ಮಂಜುಳಾ ಹಾಗೂ ಅನುಪಮಾ ಸೇರಿ ಅವರ ಮಾವ ಭಾವನಿಗೆ ಗಾಯವಾಗಿದ್ದು, ಆಸ್ಪತ್ರೆಗೆ ದಾಖಲಾಗಿ ಚಿಕಿತ್ಸೆ ಪಡೆದುಕೊಂಡಿದ್ದಾರೆ. ಇನ್ನೂ ಈ ನಿವೇಶನ ವಿವಾದ ಈಗಾಗಲೇ ಕೋರ್ಟ್ ಮೆಟ್ಟಿಲೇರಿದೆ. ಈ ಸಂಬಂಧ ಶಿಡ್ಲಘಟ್ಟ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ದೂರು ಹಾಗೂ ಪ್ರತಿದೂರು ದಾಖಲಾಗಿದೆ.